မဲဆောက်ရောက် မြန်မာများရဲ့ အမေစု ၈၁ နှစ်ပြည့် မွေးနေ့အလှူ

မဲဆောက်ရောက် မြန်မာများရဲ့ အမေစု ၈၁ နှစ်ပြည့် မွေးနေ့အလှူ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ရဲ့ ၈၁ နှစ်ပြည့် မွေးနေ့ကို ထိုင်း-မြန်မာ နယ်စပ် ၊ မဲဆောက်မြို့မှာရှိတဲ့ မြန်မာနိုင်ငံသားတွေက သံဃာတော်တွေကို ဆွမ်းကပ်တာ၊သွေးလှူဒါန်းတာနဲ့ စတုဒီသာကျွေးတာတွေကို စည်းကားသိုက်မြိုက်စ္စာ ကျင်းပခဲ့ကြပါတယ်။ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ (၈၁) နှစ်မြောက် မွေးနေ့အထိမ်းအမှတ်ကို ရည်ရွယ်ပြီး မဲဆောက်မြို့ ကျောင်းကြီးကျောင်းမှာ သံဃာတော်တွေကို နေ့ဆွမ်းအလှူဒါနတွေပြုလုပ်ခဲ့ကြပါတယ်။ အဲဒီအခမ်းအနားကို အမျိုးသားဒီမိုကရေစီအဖွဲ့ချုပ် ထိပ်ပိုင်းခေါင်းဆောင်တစ်ဦးဖြစ်တဲ့ ဦးဟံသာမြင့်၊ ရန်ကုန်ဖက်ဒရယ်ယူနစ်လွှတ်တော် ဥက္ကဋ္ဌ ဦးတင့်လွင် ၊ အမျိုးသားညီညွတ်ရေးအစိုးရတာဝန်ရှိသူတွေ၊ အမျိုးသားညီညွတ်ရေးအတိုင်ပင်ခံကောင်စီ အဖွဲ့ဝင်တွေ၊ မြန်မာနိုင်ငံရှေ့နေများကောင်စီ အထွေထွေအတွင်းရေးမှူး နဲ့ အဖွဲ့ဝင်တွေ ၊ မဲဆောက်ရောက်နိုင်ငံရေးအင်အားစုတွေ ရာနဲ့ချီတက်ရောက်ခဲ့ပါတယ်။ ဒါအပြင် မဲဆောက်ဆေးရုံကြီးမှာ စုပေါင်းသွေးလှူဒါန်းပွဲကို လွတ်မြောက်နယ်မြေရောက် နိုင်ငံရေး၊တော်လှန်ရေးအင်အားစုတွေကို အခြေခံစာနပ်ရိက္ခာတွေထောက်ပံ့ပေးနေတဲ့ အဝေးရောက်ဧရာဝတီအသင်း OIA က ဦးဆောင်ကျင်းပတာဖြစ်ပြီး ဒေါ်အောင်ဆန်းစုကြည်မွေးနေ့(၆၀)ပြည့်ကတည်းကပြုလုပ်လာတာ နှစ်ပေါင်း ၂၁ နှစ် ဖြစ်သွားပြီလို့ သိရပါတယ်။ မဲဆောက်နောင်ဘွားမုဒ်ဦးအနီးက OKမြန်မာထမင်းဆိုင်ကလည်း မနက် (၉) နာရီကနေ ညနေ (၅) နာရီအထိ ဘဲဥသီးစုံပဲကုလားဟင်း ဖက်ထမင်းကို ကျွေးမွေးလှူဒါန်းပြီး ဒေါ်အောင်ဆန်းစုကြည်နဲ့ နိုင်ငံရေးအကျဉ်းသားတွေလွတ်မြောက်ရေးဆုတောင်းခဲ့ကြပါတယ်။ ဒါအပြင် မဲဆောက်ရောက်အမျိုးသားဒီမိုကရေစီအဖွဲ့ချုပ်ပါတီဝင်တွေကလည်း ရပ်ကွက်နေအိမ်တွေမှာ ဒေါ်အောင်ဆန်းစုကြည်မွေးနေ့ရည်စူးပြီး သံဃာတော်တွေကို ဆွမ်းကပ်တာနဲ့ စတုဒီသာကျွေးမွေးလှူဒါန်းတာတွေ ပြုလုပ်ခဲ့ကြပါတယ်။ #AungSanSuuKyi #Birthday #LocalNews #မဲဆောက် #htetsoelinvj