ကွတ်ခိုင်မြို့ မော်ဟန်ရွာအနီး စစ်ဆေးရေးဂိတ်ကိစ္စ KIA နှင့် MNDAAတပ်ဖွဲ့ဝင်များအကြားတင်းမာမှုဖြစ်ပွား

ကွတ်ခိုင်မြို့နယ်၊ မော်ဟန်ရွာအနီးရှိ စစ်ဆေးရေးဂိတ်ကိစ္စနှင့် ပတ်သက်၍ KIA နှင့် MNDAA တပ်ဖွဲ့ဝင်များအကြား တင်းမာမှုဖြစ်ပွား ကွတ်ခိုင် ၊ ဇူလိုင် ၉ ၊ Horizons ရှမ်းပြည်နယ်မြောက်ပိုင်း၊ ကွတ်ခိုင်မြို့နယ်အတွင်းရှိ မော်ဟန်ကျေးရွာအနီးတွင် ယမန်နေ့ (ဇူလိုင်လ ၈ ရက်) ညနေပိုင်းက ကချင်လွတ်လပ်ရေးတပ်မတော် (KIA) နှင့် မြန်မာအမျိုးသား ဒီမိုကရက်တစ် မဟာမိတ်တပ်မတော် (MNDAA) တပ်ဖွဲ့ဝင်များအကြား စစ်ဆေးရေးဂိတ်ဆိုင်ရာ ကိစ္စရပ်နှင့် ပတ်သက်၍ တင်းမာမှုတစ်ရပ် ဖြစ်ပွားခဲ့ကြောင်း သိရသည်။ ဖြစ်စဉ်မှာ မော်ဟန်ရွာအနီးတွင် ချထားသည့် KIA စစ်ဆေးရေးဂိတ်ရှိ အတားအဆီးများကို MNDAA တပ်ဖွဲ့ဝင်များက အထက်အဖွဲ့အစည်း၏ ညွှန်ကြားချက်အရဟုဆိုကာ လာရောက်ဖယ်ရှားရာမှ နှစ်ဖက်မြေပြင်တပ်ဖွဲ့ဝင်များအကြား နားလည်မှုလွဲမှားကာ အခြေအတင် စကားများခဲ့ခြင်း ဖြစ်သည်။ ယင်းသို့ အငြင်းပွားရာမှတစ်ဆင့် ရုန်းရင်းဆန်ခတ်ဖြစ်ကာ ကိုယ်ထိလက်ရောက် ပဋိပက္ခအထိ ကြီးထွားခဲ့ပြီး နှစ်ဖက်တပ်ဖွဲ့ဝင်အချို့ ထိခိုက်ဒဏ်ရာ ရရှိမှုများ ရှိခဲ့ကြောင်း မြေပြင်သတင်းရင်းမြစ်များအရ သိရသည်။ လက်ရှိအချိန်တွင် အဆိုပါဖြစ်ရပ်နှင့် ပတ်သက်၍ နှစ်ဖက်အဖွဲ့အစည်းအကြား ပဋိပက္ခ ထပ်မံမကျယ်ပြန့်စေရေးနှင့် ပြဿနာကို အေးချမ်းစွာ ဖြေရှင်းနိုင်ရေးအတွက် သက်ဆိုင်ရာ တာဝန်ရှိအရာရှိများက မြေပြင်သို့ တိုက်ရိုက်ကွင်းဆင်း စိစစ်မှုများ ပြုလုပ်ကာ ညှိနှိုင်းဆွေးနွေးမှုများကို ဆောင်ရွက်လျက်ရှိကြောင်း သိရသည်။ အဆိုပါကိစ္စနှင့် ပတ်သက်၍ KIA နှင့် MNDAA ဘက်မှ တာဝန်ရှိသူများထံ Horizons News က ဆက်သွယ်မေးမြန်းရန် ကြိုးပမ်းခဲ့သော်လည်း လက်ရှိအချိန်အထိ ဆက်သွယ်၍ မရသေးပေ။ #ကွတ်ခိုင်မြို့နယ် #KIA #MNDAA #ရှမ်းပြည်နယ်မြောက်ပိုင်း #HorizonsNews