Putin, Erdogan, Pezeşkian, Tokaýew, Žaparow, Mirziýoýew, Rahmon we Haçaturýan Türkmenistanda

Halkara parahatçylyk we ynanyşmak ýyly, Halkara Bitaraplyk güni we Türkmenistanyň hemişelik Bitaraplygynyň 30 ýyllygy mynasybetli Halkara forum geçirildi. Oňa dünýä döwletleriniň, halkara we sebit guramalarynyň ýokary derejeli wekiliýetleri gatnaşdylar. Bu wekilçilikli foruma dünýäniň dürli döwletlerinden habarçylar hem gatnaşyp, olaryň hatarynda "Ata Watan Media" topary hem çagyryldy. Türkmenistanyň Prezidenti Serdar Berdimuhamdowyň başlyklyk eden forumyň umumy mejlisinde Russiýanyň Prezidenti Wladimir Putin, Türkiýäniň Prezidenti Rejep Taýyp Ärdogan, Eýranyň Prezidenti Masud Pezeşkian, Ermenistanyň Prezidenti Waagn Haçaturýan, Yragyň Prezidenti Abdul Latif Raşid, Gazagystanyň Prezidenti Kasym-Žomart Tokaýew, Gyrgyz Respublikasynyň Prezidenti Sadyr Žaparow, San-Tome we Prinsipiniň Prezidenti Karluş Manuel Wila-Nowa, Täjigistanyň Prezidenti Emomali Rahmon, Özbegistanyň Prezidenti Şawkat Mirziýoýew, Azerbaýjanyň Premýer-ministri Ali Asadow, Gruziýanyň Premýer-ministri Irakliý Kobahidze, Pakistanyň Premýer-ministri Şahbaz Şarif, Mýanmanyň Premýer-ministri Nýo So, Eswatininiň Premýer-ministri Rassel Dlamini çykyş etdi. *** Täjigistanyň Prezidenti Emomali Rahmon: “Häzirki global durnuksyzlyk şertlerinde Türkmenistanyň başlangyçlary, şol sanda 2025-nji ýyly Halkara parahatçylyk we ynanyşmak ýyly diýip yglan etmegi durnukly ösüş we halkara hyzmatdaşlyk üçin aýratyn ähmiýete eýedir” – diýip, belledi. *** Türkmenistanyň Bitaraplygy, türkmen halkynyň häzirki zaman durmuşynyň bir bölegine öwrülip, onuň çuňňur taryhy däp-dessurlaryna, medeni we ruhy gymmatlyklaryna, oňa mahsus asylly häsiýetlere: jomartlyk, sabyr-takatlylyk we hoşniýetli goňşuçylyk ýaly häsiýetlere daýanýar diýip, Özbegistan Respublikasynyň Prezidenti Şawkat Mirziýoýew belläp, hormatly Gurbanguly Mälikgulyýewiç Berdimuhamedowyň kesgitleýji roly bilen bütin dünýäde giňden ykrar edildi – ol häzirki döwürde Türkmenistanyň oňyn Bitaraplyk pelsepesiniň esaslandyryjydyr, diýip aýtdy. *** Azerbaýjanyň Premýer-ministri Ali Asadow Türkmenistanyň Bitaraplygynyň 30 ýyllygyna bagyşlanan Halkara parahatçylyk we ynanyşmak forumynda eden çykyşynda Azerbaýjan Türkmenistanyň Birleşen Milletler Guramasynyň (BMG) goldawy bilen Bitaraplyk uniwersitetini döretmek baradaky başlangyjyny goldaýandygyny belledi. *** Gazagystanyň Prezidenti Kasym-Žomart Tokaýew forumdaky çykyşynda ählumumy suw diplomatiýasyny ösdürmegiň möhümdigini belläp geçdi. Ol BMG-niň ulgamynda diňe suw meselelerine ünsi jemleýän ýöriteleşdirilen gurluş ýokdugyny, şonuň üçin Gazagystan BMG-niň dürli guramalarynyň ähli bar bolan ygtyýarlyklaryny birleşdirip biljek Halkara suw guramasyny döretmegi teklip edýändigini beýan etdi. *** Gyrgyz Respublikasynyň Prezidenti Sadyr Žaparow Bitaraplyk syýasatynyň Türkmenistanyň durnukly ösüşiniň binýady bolup, ýurduň içerki durnuklylygyny, ykdysadyýetiniň döwrebaplaşdyrylmagyny we halkara abraýynyň güýçlenmegini üpjün edendigini nygtady. *** Türkiýe Respublikasynyň Prezidenti Rejep Taýýyp Ärdogan hem bu halkara foruma gatnaşyp, Türkmenistanyň Garaşsyzlygyny ykrar eden ilkinji ýurt hökmünde, şol bir wagtyň özünde hemişelik Bitaraplyk derejesini goldaýanlaryň ilkinjileriň biridiris. Türkmenistanyň 30 ýyl bäri dowam etdirýän bu hukuk derejesiniň umumy medeniýetimiziň parahatçylyk we dostluk düşünjesi bilen ýugrulandygyny görýäris diýip belledi. *** Türkmenistanyň 30 ýyl mundan ozal hemişelik bitaraplyk ugruny saýlap almagy esasan hem, Türkmenistanyň garaşsyz we özbaşdak döwlet hökmünde ösüşiniň strategiki ugruny kesgitledi, diýip Russiýa Federasiýasynyň Prezidenti Wladimir Putin Aşgabatda geçirilen Halkara parahatçylyk we ynanyşmak ýylyna bagyşlanan forumda eden çykyşynda belläp geçdi. Umuman halkara forum türkmen Bitaraplygynyň tutuş dünýäde giňden ykrar edilýändiginiň nobatdaky subutnamasy boldy.