မုံရွာ ပလဖ စခန်းတွေကို PDF ဝင်ရောက်စီးနင်း (ရုပ်/သံ)

စစ်ကိုင်းတိုင်း၊ မုံရွာမြို့နယ်မှာ အမျိုးသားညီညွတ်ရေးအစိုးရ (NUG) လက်အောက်ခံ အဖွဲ့အစည်းအချင်းချင်းကြား ပစ်ခတ်စီးနင်းမှုတခု ဖြစ်ပွားခဲ့ပါတယ်။ ဇွန်လ ၂၉ ရက်နေ့ ညနေပိုင်းက မုံရွာမြို့နယ် ပြည်သူ့လုံခြုံရေးတပ်ဖွဲ့ (ပလဖ) ရဲ့ စခန်း ၃ ခုကို NUG လက်အောက်ခံ ပြည်သူ့ကာကွယ်ရေးတပ် (PDF) တပ်တွေက ဝင်ရောက်စီးနင်း တိုက်ခိုက်ခဲ့တာပါ။ ဒီတိုက်ခိုက်မှုကြောင့် မုံရွာ ပလဖခေါင်းဆောင် ကိုအာကူး အပါအဝင် တပ်ဖွဲ့ဝင် ၅ ဦးနဲ့ အရပ်သား ၂ ဦး သေဆုံးခဲ့တယ်လို့ NUG ပြည်ထဲရေးနဲ့ လူဝင်မှုကြီးကြပ်ရေးဝန်ကြီးဌာနက အတည်ပြု ပြောကြားထားပါတယ်။ စခန်းအနီးက ဝက်သားတုတ်ထိုးဆိုင်မှာ ထိုင်နေတဲ့ အရပ်သား ၃ ဦး ကျည်ထိမှန်ခဲ့ပြီး အဲဒီထဲက ၂ ဦးကတော့ နေရာမှာတင် သေဆုံးသွားခဲ့တာပါ။ ဒီတိုက်ခိုက်မှုကို NUG ကာကွယ်ရေးဝန်ကြီးဌာန၊ အမှတ် (၁) စစ်ဒေသ လက်အောက်ခံ PDF တပ်ရင်း (၂၂) က ဦးဆောင်လုပ်ဆောင်ခဲ့တာဖြစ်ပေမဲ့ ဒါဟာ ဗဟိုနဲ့ စစ်ရုံးအဆင့်ဆင့်ရဲ့ တရားဝင်ညွှန်ကြားချက်နဲ့ လုပ်ဆောင်ခဲ့တာ မဟုတ်ဘူးလို့ NUG ပြည်ထဲရေးနဲ့ လူဝင်မှုကြီးကြပ်ရေးဝန်ကြီးဌာန (MOHAI) ဒုတိယဝန်ကြီး ဦးကျော်နီက ဧရာဝတီကို ပြောပါတယ်။ #မြန်မာ #ဧရာဝတီ #မုံရွာ #ပလဖ #NUG #WhatshappensInMyanmar