KNLA စစ်ဦးစီးချုပ် ဒုဗိုလ်ချုပ်ကြီးဘောကျော်ဟဲ ဖြစ်လာ | People's Spring

KNLA စစ်ဦးစီးချုပ် ဒုဗိုလ်ချုပ်ကြီးဘောကျော်ဟဲ ဖြစ်လာ ဇူလိုင်-၁၈၊ ၂၀၂၆။ People’s Spring ကရင်အမျိုးသားအစည်းအရုံး(KNU) လက်အောက်ခံ တပ်ဖွဲ့ဖြစ်တဲ့ ကရင်အမျိုးသားလွတ်မြောက်ရေးတပ်မတော်(KNLA)စစ်ဦးစီးချုပ် ဗိုလ်ချုပ်ကြီး စောဂျော်နီ အနားယူသွားလို့ ဒုစစ်ဦးစီးချုပ် ဒုဗိုလ်ချုပ်ကြီးဘောကျော်ဟဲဟာ စစ်ဦးစီးချုပ်အဖြစ် တာဝန်ယူခဲ့ကြောင်း KNU သတင်းရင်းမြစ်က ပြောပါတယ်။ စစ်ဦးစီးချုပ် ဗိုလ်ချုပ်ကြီးစောဂျော်နီ ကျန်းမာရေးမကောင်းလို့ တာဝန်မထမ်းဆောင်နိုင်တဲ့ အခြေအနေမှာ ဇူလိုင် ၁၂ရက်ကစပြီး ဒုစစ်ဦးစီးချုပ်က စစ်ဦးစီးချုပ် တာဝန်စတင်ယူခဲ့ခြင်းဖြစ်တယ်လို့ ပြောပါတယ်။ ဒုစစ်ဦးစီးချုပ်က စစ်ဦးစီးချုပ်ဖြစ်သွားတာကြောင့် ဒုစစ်ဦးစီးချုပ်နေရာကိုတော့ တပ်မဟာ(၃)မှူး ဗိုလ်မှူးချုပ်လေးတြော်က တာဝန်ယူမှာဖြစ်တယ်လို့ KNU သတင်းရင်းမြစ်က ပြောပါတယ်။ စစ်ဦးစီးချုပ်၊ ဒုစစ်ဦးစီးချုပ် အပြောင်းအလဲတွေကြောင့် စစ်ရေးဆိုင်ရာ အပြောင်းအလဲတွေရှိလာမှာ မဟုတ်ဘဲ ပုံမှန်အတိုင်းသာ စစ်ဘက်ခေါင်းဆောင်တွေ စုပေါင်းခေါင်းဆောင်ဆုံးဖြတ်သွားမှာ ဖြစ်တယ်လို့ အသိပေးပါတယ်။ KNU ရဲ့ လမ်းစဥ်ဖြစ်တဲ့ စစ်အာဏာရှင် ပြုတ်ကျရေးကို ဆက်လက်ဆောင်ရွက်သွားဖို့သာရှိတယ်လို့ သတင်းရင်းမြစ်က ဆိုပါတယ်။ လက်ရှိ စစ်ဦးစီးချုပ်ဖြစ်လာတဲ့ ဒုဗိုလ်ချုပ်ကြီး ဘောကျော်ဟဲဟာ ကရင်အမျိုးသားတွေ၊ တော်လှန်ရေးအဖွဲ့တွေ ညီညွတ်ရေးလိုအပ်ကြောင်း အခါအားလျော်စွာ အသိပေးနှိုးဆော်ထားသလို တော်လှန်ရေးကာလဖြတ်သန်းမှုတွေထဲက အားနည်ချက်တွေ ပြန်သုံးသပ်ဖို့၊ ရည်မှန်းချက်ပန်းတိုင်အတွက် အားလုံးကိုယ်စီတာဝန်ယူကြဖို့ ပြောကြားထားပါတယ်။ အတူတကွ စည်းလုံးညီညွတ်စွာ ပူးပေါင်းဆောင်ရွက်ရမယ့် ကိစ္စရပ်တွေမှာ စည်းလုံးမှု ရာခိုင်နှုန်းအများကြီးလိုအပ်နေသေးကြောင်းလည်း ဒုဗိုလ်ချုပ်ကြီးဘောကျော်ဟဲက အခုနှစ်ဆန်းပိုင်းက ကျင်းပခဲ့တဲ့ ၇၇နှစ်မြောက်ကရင်အမျိုးသားတော်လှန်ရေးနေ့ အခမ်းအနားမှာ ပြောကြားထားပါတယ်။ ရဲရဲရင့်ရင့် ညီညီညွတ်ညွတ် အတူတူ လုပ်ဆောင်မှတော်လှန်ရေးက ပိုပြီး အရှိန်အဟုန်ပိုမြင့်လာကာ အချိန်တိုအတွင်းမှာ မြန်မြန်ပြီးဆုံးမှာဖြစ်တယ်လို့လည်း ဒုဗိုလ်ချုပ်ကြီးဘောကျော်ဟဲက ပြောထားပါတယ်။ ===== ရန်ကုန်အဝင် စစ်ဆေးရေးဂိတ်​တွေ ပိုမိုတင်းကြပ် ဇူလိုင်-၁၈၊ ၂၀၂၆။ People's Spring ရန်ကုန်အဝင်စစ်ဆေးရေးဂိတ်တွေမှာ ဇူလိုင်လအတွင်း အာဏာသိမ်းစစ်တပ်က အစစ်အဆေးပိုမိုတင်းကြပ်လာပြီး ခရီးသွားပြည်သူတွေကိုပါ ဓာတ်ပုံမှတ်တမ်းရိုက်ယူထားတာ​တွေလုပ်လာတယ်လို့ ခရီးသွား​တွေနဲ့​ ဒေသခံ​တွေက​ ပြောပါတယ်။ အရင်က စစ်ဆေးရေးဂိတ်တွေမှာပဲ ခရီးသွားတွေရဲ့ မှတ်ပုံတင်ကို ယူစစ်တာမျိုးလုပ်တာက​နေ ဒီရက်ပိုင်းမှာ အစစ်အ​ဆေးပိုတင်းကြပ်လာတာဖြစ်ပါတယ်။ ဒီရက်ပိုင်းတွေမှာ ဂိတ်တွေမှာတော်တော်စစ်ဆေးလာသလို လူတွေလည်း ကားပေါ်ကနေ ဆင်းရတယ်လို့ ခရီးသွားတစ်ဦးက ပြောပါတယ်။ အမည်မဖော်လိုသူစစ်တပ်အရာရှိတစ်ဦးကတော့ အာဇာနည်နေ့ နီးကပ်လာတာကြောင့် စစ်တပ်က လုံခြုံရေးကို အထူးဂရုစိုက်ထားတာဖြစ်တယ်လို့ ဆိုပါတယ်။ ခုရက်ထဲ ဧရာဝတီတိုင်းဘက်ကနေ ရန်ကုန်အဝင်ကိုလည်း တစ်စီးချင်း သေချာစစ်ပြီး လူငယ်အချို့ကိုလည်း မှတ်ပုံတင် တောင်းကြည့်တာမျိုးတွေ လုပ်တယ်လို့ ရန်ကုန်-ပုသိမ် ကားလိုင်းရဲ့ယာဥ်မောင်းတစ်ဦးက ပြောပါတယ်။ ဧရာဝတီတိုင်းမှာ ရခိုင်ပြည်နယ်နဲ့ အစပ်​ဒေသ​တွေမှာ ​AA ဦး​ဆောင်တဲ့​ တော်လှန်​ရေးတပ်​တွေနဲ့ စစ်တပ်ကြားတိုက်ပွဲ​တွေ ပြင်းထန်​နေပါတယ်။ ဒါ့အပြင် ရန်ကုန်မြို့ထဲမှာ အခုရက်ပိုင်းအရပ်ဝတ်တွေနဲ့ စောင့်ကြည့်နေတာရှိသလို လှည့်ကင်းကားတွေနဲ့လည်း လုံခြုံရေးယူထားတာကို တွေ့ရပါတယ်။ အလားတူ ကမ္ဘာအေးဘုရားလမ်းမ၊ ဝေဇယန္တာလမ်းမကြီး၊ တက္ကသိုလ်ရိပ်သာလမ်းအစရှိတဲ့ လမ်မကြီးတွေပေါ်မှာ စစ်တပ်လက်​အောက်ခံလက်နက်ကိုင်​တွေ လုံခြုံရေးပိုချထားတာကိုလည်း တွေ့ရတယ်လို့​ ဒေသခံ​တွေက​ ပြောပါတယ်။ ရွှေတိဂုံခြေတော်ရင်းက အာဇာနည်ကုန်းနားတဝိုက်ကိုလည်း အရင်နှစ်တွေထက် လုံခြုံရေး ပိုမိုတိုးမြှင့်ချထားပြီး အိမ်စီးကားအချို့လည်း အစစ်ဆေးခံရတယ်လို့ ယာဥ်​မောင်းအချို့က​ ပြောပါတယ်။ 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #KNLA #GeneralBawKyawHeh #KNU #KarenNationalLiberationArmy #MyanmarResistance #MilitaryLeadership #KarenState #MyanmarNews #BreakingNews #KNLAစစ်ဦးစီးချုပ် #ဒုဗိုလ်ချုပ်ကြီးဘောကျော်ဟဲ #ကရင်အမျိုးသားလွတ်မြောက်ရေးတပ်မတော် #ကေအဲန်ယူ #မြန်မာ့နွေဦးတော်လှန်ရေး #စစ်ရေးသတင်း #ပြည်တွင်းသတင်း #Yangon #Checkpoints #SecurityTightened #YangonNews #MyanmarSecurity #TravelAlert #YangonEntry #MyanmarNews #BreakingNews #ရန်ကုန် #စစ်ဆေးရေးဂိတ် #လုံခြုံရေးတင်းကြပ် #ရန်ကုန်မြို့အဝင် #ခရီးသွားသတိပေးချက် #ပြည်တွင်းသတင်း #စစ်ရေးသတင်း