Жауынгерлік дайындықты жетілдіруге бағытталған сабақтар өткізілді

Сарыөзек гарнизонындағы 12740 әскери бөлімнің базасында әскери қызметшілердің кәсіби даярлығын жетілдіруге бағытталған әдістемелік-нұсқаулық сабақтары ұйымдастырылды. Аталған іс-шара таңғы дене шынықтыру жаттығуларын тиімді ұйымдастыру, әскери қызметшілердің жауынгерлік әзірлігін арттыру және заманауи қауіп-қатерлерге қарсы әрекет ету машықтарын жетілдіру мақсатында өткізілді. Іс-шара әскери бөлімнің саптық алаңында өтті. Мұнда бірнеше арнайы оқу нүктелері қойылып, әскери қызметшілерге тәжірибелік және теориялық бағыттағы дайындықтар көрсетілді. Сабақ барысында таңғы дене шынықтыру жаттығуларының түрлері, алғашқы медициналық көмек көрсету тәсілдері, ұшқыссыз ұшу аппараттарына қарсы іс-қимыл әрекеттері, атыс позицияларын дұрыс таңдау, атыс алаңдарында бірлескен іс-қимыл жасау және күштік дене жаттығулары кеңінен қамтылды. Әскери қызметшілер әр оқу нүктесінде нақты тапсырмалар орындап, жауынгерлік жағдайда қажетті болатын дағдыларды тәжірибе жүзінде пысықтады. Дәріске әскери бөлімнің барлық жеке құрамы қатысып, әр бағыт бойынша өз білімдері мен машықтарын жетілдіруге мүмкіндік алды.