Отан қорғаушылар және Ұлы Жеңіс күніне арналған тартысты дода

Сарыөзек гарнизонындағы спорт кешенінде 7 мамыр – Отан қорғаушылар және 9 – мамыр Отан қорғаушылар күніне орай әскери прокуратура қызметкерлерінің ұйымдастыруымен әскери бөлімдер мен мемлекеттік мекемелер арасында шағын футболдан жарыс өтті. Ел қорғаны болып жүрген азаматтардың бірлігін нығайтып, салауатты өмір салтын насихаттауды мақсат еткен спорттық шара жоғары деңгейде ұйымдастырылды. Аталған сайысқа жалпы саны тоғыз команда қатысты. Атап айтқанда, 12740 әскери бөлімнің «А» және «Б» командалары, 29108, 54380, 40275 әскери бөлімдерінің командалары, әскери полиция бөлімі, аудандық пайдалану бөлімі, аудандық өрт сөндіру бөлімі, және әскери прокуратура қызметкерлерінен құралған командалар жасыл алаңда өзара бақ сынасты. Жарыстың ашылу салтанатында әскери прокурор, әділет полковнигі Жанболат Аекенов, әскери прокуратураның ардагері Сайлаубек Қайсаров, және Ауған соғысының ардагері, отставкадағы майор Шерғали Нұрғалиев арнайы қатысып, ойыншыларға сәттілік тіледі. Жарыс қорытындысы бойынша бірінші орынды 29108 әскери бөлімнің командасы жеңіп алды. Екінші орынды 12740 әскери бөлімнің «А» командасының спортшылары иеленді. Ал үшінші орын 12740 әскери бөлімнің «Б» командасының спортшыларына бұйырды. Жеңімпаздарға ауыспалы кубогы мен медальдар табысталды. Ал шағын футболдан үздік нәтиже көрсеткен әр команданың «үздік жартылай қорғаушы», «үздік сұрмерген», «үздік ойыншы», «үздік шабуылдаушы» номинация иегерлері грамотамен марапатталды.