နွေဦးတော်လှန်ရေးအတွက် နောက်တန်းက တိုက်ပွဲဝင်နေသူတွေ (ရုပ်/သံ)

"ထောက်ပို့ဟာ တော်လှန်ရေးရဲ့အသက်" လို့ ဆိုကြပါတယ်။ ရှေ့တန်းက ရဲဘော်တယောက်ရဲ့ သေနတ်က ကျည်ထွက်ဖို့၊ ဗိုက်ဝဖို့နဲ့ ဒဏ်ရာရရင် ဆေးကုသနိုင်ဖို့ဆိုတာ နောက်တန်းက ထောက်ပို့တွေရဲ့ ကြိုးပမ်းမှုမပါဘဲ ဘယ်လိုမှ မဖြစ်နိုင်ပါဘူး။ မြန်မာ့နွေဦးတော်လှန်ရေးမှာလည်း ရောက်ရာအရပ်က ကူနေကြတဲ့ "ထောက်ပို့" တွေဟာအားကောင်းတဲ့ နောက်တန်းခံတပ်တခုဖြစ်ပါတယ်။ အမေရိကန်ပြည်ထောင်စုရောက်  မြန်မာအမျိုးသမီးထောက်ပွဲတွေဟာလည်း တော်လှန်ရေးအတွက် အသက်သွေးကြောတခုဖြစ်ပါတယ်။ အမေရိကန်ပြည်ထောင်စု၊ ဝါရှင်တန်ဒီစီ၊ မေရီလန်းနဲ့ ဗားဂျီးနီးယားပြည်နယ်တွေမှာ နေထိုင်ကြတဲ့ မြန်မာပြည်ဖွား အမျိုးသမီးတွေဟာ ၂၀၂၁ ခုနှစ်၊ မတ်လမှာပဲ ချင်း၊ ကချင်နဲ့ ဗမာ စတဲ့ တိုင်းရင်းသူတွေ စုပေါင်းပြီး Women For Myanmar ဆိုတဲ့ အဖွဲ့ကို စတင်ဖွဲ့စည်းခဲ့ပါတယ်။ သူတို့ဟာ လူမျိုးစုံ၊ ဘာသာစုံပေမယ့် ပန်းတိုင်ကတော့ တခုတည်းပါ။ အဲဒါကတော့ "အာဏာရှင်စနစ် ကျဆုံးရေး" ပါပဲ။ ၂၀၂၁ ခုနှစ်ကနေ ဒီကနေ့အထိ ၅ နှစ်တာ ကာလအတွင်းမှာ Women For Myanmar အဖွဲ့ဟာ နွေဦးတော်လှန်ရေးအတွက် အမေရိကန်ဒေါ်လာ ၃ သိန်းကျော် ရှာဖွေပေးနိုင်ခဲ့ပါတယ်။ မြန်မာငွေနဲ့ တွက်ချက်မယ်ဆိုရင် ကျပ်သိန်းပေါင်း ၁ သောင်းခွဲကျော် ရှိပါတယ်။ ဒီငွေတွေဟာ နေပူမရှောင်၊ မိုးရွာမရှောင် ရန်ပုံငွေ ဈေးရောင်းပွဲတွေ ပြုလုပ်ပြီး ရရှိလာတဲ့ ပြည်သူ့ချွေးနည်းစာတွေ ဖြစ်ပါတယ်။ သူတို့ဟာ အလုပ်အားလပ်ရက်တွေမှာ မြန်မာ့ရိုးရာ စားသောက်ဖွယ်ရာတွေကို ချက်ပြုတ်ရောင်းချတယ်၊ ချီတက်ဆန္ဒပြပွဲတွေမှာ ပါဝင်ပြီး နိုင်ငံတကာက သိအောင် အသံလွှင့်ကြပါတယ်။ ဒီအဖွဲ့ကို ဦးဆောင်နေကြတဲ့ မမူ၊ ဒေါ်နီနီဝေ နဲ့ မမေရီဇော်ခိုင် တို့လို အမျိုးသမီးတွေဟာ အဝေးရောက်နေပေမယ့် သူတို့ရဲ့ နှလုံးသားကတော့ မြန်မာပြည်က ရှေ့တန်းရဲဘော်တွေ၊ စစ်ဘေးရှောင်ပြည်သူတွေနဲ့အတူ အမြဲ ရှိနေခဲ့တာပါ။ ထောက်ပို့တွေဟာ ပြည်သူနဲ့ တော်လှန်ရေးတပ်ဖွဲ့ကြားက ပေါင်းကူးတံတားတွေပါ။ Women For Myanmar အဖွဲ့ရဲ့ ပံ့ပိုးမှုတွေကြောင့် ရှေ့တန်းက ရဲဘော်တွေဟာ "ငါတို့ နောက်မှာ ပြည်သူရှိတယ်" ဆိုတဲ့ စိတ်ဓာတ်နဲ့ နောက်ဆံမတင်းဘဲ တိုက်ပွဲဝင်နိုင်ကြတာ ဖြစ်ပါတယ်။ တဖက်မှာလည်း စစ်ဘေးဒဏ်ခံနေရတဲ့ ပြည်သူတွေဆီကို ကယ်ဆယ်ရေးပစ္စည်းတွေ ရောက်ရှိဖို့ သူတို့ကပဲ တတ်နိုင်သလောက် ကြိုးပမ်းပေးနေတာပါ။ Women For Myanmar အဖွဲ့ဝင်တွေလို ထောက်ပို့ရဲဘော်တွေဟာ တိုက်ပွဲဝင်နေတဲ့ ရဲဘော်တွေနည်းတူ အသက်သွေးကြောပမာ အရေးပါလှပါတယ်။ သူတို့ရဲ့ မဆုတ်မနစ်တဲ့ ကြိုးပမ်းမှု၊ အမျိုးသမီးတွေရဲ့ စည်းလုံးမှုနဲ့ ပေးဆပ်မှုတွေဟာ နွေဦးတော်လှန်ရေး အောင်ပွဲဆီသို့ လျှောက်လှမ်းရာမှာ တွန်းအားတခု ဖြစ်နေပါတယ်။ Women For Myanmar အဖွဲ့လိုပဲ နွေဦးတော်လှန်ရေး အတွက် နောက်ကွယ်ကနေ နည်းလမ်းအမျိုးမျိုးနဲ့ ထောက်ပို့နေကြတဲ့အဖွဲ့တွေ နိုင်ငံပေါင်းစုံမှာရှိနေပြီး သူတို့ကို "အသံတိတ်ရဲဘော်တွေ"၊ "နောက်တန်းကတိုက်ပွဲဝင်နေသူတွေ"၊ "နောက်ကွယ်ကသူရဲကောင်းတွေ" စသဖြင့် ဂုဏ်ပြု ခေါ်ဆိုကြပါတယ်။ #မြန်မာ #ဧရာဝတီ #အမျိုးသမီး #ထောက်ပို့ #WomenForMyanmar #အမေရိကန် #WhatsHappensInMyanmar