19.06.2026 Ռոլանդ Պողոսյան

Շունը հասարակության հայելին է. ինչ տալիս ենք, այն էլ հետ ենք ստանում․ Ռոլանդ Պողոսյան «Շների հարձակումը մարդկանց վրա մեր հասարակության դեմքն ու հայելին է. այն, ինչ դուք տալիս եք բնությանը, այն էլ հետ եք ստանում», - «Ուրիշ նորություններում» ասում է շների հոգեբան Ռոլանդ Պողոսյանը։ Մասնագետը շեշտում է, որ իր հիմնական առաքելությունը քաղաքաբնակ շներին վախերից ու ագրեսիայից ձերբազատելն է, մինչդեռ սովորական վարժեցումը «մարդու կողմից հնարված մի երևույթ է, որն օգնում է մանիպուլացնել և աշխատացնել շանը»։ Անդրադառնալով տանը կենդանիների դաստիարակությանը՝ նա ընդգծեց կարգապահության կարևորությունը. «Յուրաքանչյուր կոլեկտիվում, տանն ու կենցաղում պետք է լինի կարգապահություն, փոքրիկ «բանակային» կանոններ, ռեժիմ, որը մեզ օգնում է ձիգ մնալ: Շների հետ ևս պետք է վարվել հետևյալ կերպ՝ սկզբից աշխատել ստանալ, հետո նոր տալ, չափի մեջ, քանի որ ամեն ինչի շատն էլ լավ չէ»: Պողոսյանը վստահեցնում է, որ բոլոր շներն էլ կարող են հավասարապես ենթարկվել ու սովորել, եթե ունեն դրա կարիքը. «Ինչպես մենք ենք աշխատում գումարի համար, այնպես էլ շները՝ սննդի»: Ռոլանդ Պողոսյանը համաձայն չէ, թե շները մարդկանց վրա են հարձակվում սովից. «Դա սխալ կարծիք է: Շատ հաճախ լինում է այնպես, որ ինչ-որ մեկը վատ է վերաբերվում կենդանուն, իսկ պատասխանը ստանում է լրիվ այլ՝ անմեղ մի մարդ, որովհետև շունը տեսնում ու ընդհանրացնում է մեր տեսակը»: Նա նաև անդրադարձավ մեկ այլ տարածված կարծիքի․ «Պոչի արագ շարժումը ոչ թե ընդհանուր ուրախության, այլ պարզապես ակտիվության նշան է, և միայն մասնագետը կարող է կարդալ դրա տակ թաքնված իրական էմոցիան»։