ပျောက်ဆုံးနေသူလူ ၅၀ အတွက်မျှော်လင့်ချက်နည်းသွားတဲ့တရုတ်မြေပြိုမှု | People's Spring

တရုတ်မြေပြိုမှုမှာပျောက်ဆုံးနေသူလူ ၅၀ အတွက်မျှော်လင့်ချက်နည်းပါး ဇူလိုင်လ- ၂၄ ၊၂၀၂၆ ။People’s Spring တရုတ်နိုင်ငံ အနောက်တောင်ပိုင်းမှာ ပြီးခဲ့တဲ့ အပတ်က ဖြစ်ပွားခဲ့တဲ့ မြေပြိုမှုကြီးအပြီး သေဆုံးသူဦးရေ ထပ်တိုးလာနေပြီး လူပေါင်း ၅၀ လောက် ပျောက်ဆုံးနေဆဲ ဖြစ်ပါတယ်။ မိုးသည်းသည်းထန်ထန် ရွာသွန်းမှုတွေအပြီး ချုံချင်းပြည်နယ်ထဲက ပန်ရှူခရိုင်မှာ ဇူလိုင် ၁၇ ရက်နေ့တုန်းက ဆိုးရွားတဲ့ မြေပြိုမှုကြီးတစ်ခု ဖြစ်ပွားခဲ့ပါတယ်။ တောင်စောင်းကနေ ကျောက်တုံးတချို့ စတင် လိမ့်ဆင်းလာတာကို သတိပြုမိတဲ့အတွက် ဒေသခံတွေကို ရွှေ့ပြောင်းပေးနေတုန်းမှာပဲ လူနေဧရိယာအပေါ် ရွှံ့နွံတွေ၊ ကျောက်တုံးကြီးတွေ ဒလဟော ပြိုကျခဲ့တာ ဖြစ်ပါတယ်။ အခင်းဖြစ်တဲ့ နေရာဟာ ပြည်နယ်မြို့တော် ချုံချင်းကနေ ကီလိုမီတာ ၂၇၀ လောက် ကွာဝေးပြီး သဘာဝ တောတောင်ရှုခင်း အလှအပတွေကြောင့် ထင်ရှားတဲ့ ဧရိယာတစ်ခု ဖြစ်ပါတယ်။ မြေပြိုမှုတွေအတွင်း လူနေအဆောက်အအုံ အများအပြား ပိမိခဲ့သလို လုံးဝဥဿုံ ပြိုကျပျက်စီးသွားတာတွေလည်း ရှိခဲ့ပါတယ်။ ကယ်ဆယ်ရေးတွေကတော့ တစ်ပတ်လောက် ကြာမြင့်ပြီးချိန် ပျောက်ဆုံးနေသူတွေ အတွက်လည်း မျှော်လင့်ချက် မရှိနိုင်တော့ဘူးလို့ ဝန်ခံပါတယ်။ အစောပိုင်းတုန်းက သေဆုံးသူ ဦးရေကို ၈ ယောက်လို့ ကြေညာထားခဲ့ပေမယ့် ဇူလိုင် ၂၃ ရက် ညနေပိုင်းထိ အခြေအနေအရ အလောင်း ၁၁ လောင်းထိ ရှာတွေ့ထားပါပြီ။ ပျောက်ဆုံးနေသူ ၅၀ လောက် စာရင်းရထားပြီး ဒဏ်ရာရသူကတော့ ၁၀ ဦးရှိခဲ့ကြောင်း အစိုးရပိုင် ရှင်ဟွာ သတင်းဌာနက ဖော်ပြခဲ့ပါတယ်။ ===== အိန္ဒိယရဲ့ အာသံပြည်နယ်မှာ ရေကြီးမှုတွေကြောင့် လူ ၄၀ ကျော်သေဆုံး ဇူလိုင်လ- ၂၄ ၊၂၀၂၆ ။People’s Spring အိန္ဒိယနိုင်ငံ အရှေ့မြောက်ပိုင်းမှာ မိုးသည်းသည်းထန်ထန် ရွာသွန်းရာက ရေကြီးမှုတွေကြောင့် လူ ၄၀ ကျော် သေဆုံးခဲ့ကြောင်း သိရပါတယ်။ ဇူလိုင် ၂၃ ရက်နေ့က အာသံပြည်နယ် အုပ်ချုပ်ရေးဌာန တာဝန်ရှိသူတွေက ရေကြီးမှုတွေအတွင်း လူ ၄၁ ဦးထက်မနည်း အသက်ဆုံးရှုံးကြောင်း ကြေညာခဲ့ပြီး ကယ်ဆယ်ရေးနဲ့ ကူညီနေရာချထားရေး အစီအစဉ်တွေကို အပူတပြင်း လုပ်ဆောင်နေတယ်လို့ ပြောပါတယ်။ မိုးရာသီမှာ အိန္ဒိယနိုင်ငံအနှံ့ ဆိုးဆိုးရွားရွား ရေကြီးမှုတွေ ဖြစ်ပေါ်လေ့ရှိပြီး နွေရာသီ ဆိုရင်တော့ နိုင်ငံရဲ့ အစိတ်အပိုင်း အများအပြားဟာ အလွန်အကျွံ ပူပြင်းတာ၊ ရေခန်းတာတွေ ကြုံရလေ့ ရှိပါတယ်။ အိန္ဒိယဟာ ကမ္ဘာပေါ်မှာ ရာသီဥတု ဖောက်ပြန်ပြောင်းလဲမှုဒဏ် အခံရဆုံး နိုင်ငံတွေထဲက တစ်ခုလို့လည်း သိပ္ပံ ပညာရှင်တွေက ပြောကြားထားပါတယ်။ ဇွန်လမှာ စတင်တဲ့ မိုးရာသီကနေ လက်ရှိ အချိန်ထိတော့ အဖိုးတန် လူ့အသက် ၄၁ ချောင်းထိ အာသံက ရေကြီးမှုတွေအတွင်း ဆုံးရှုံးခဲ့တယ်ဆိုတာ အတည်ပြု သိရှိထားကြောင်း ပြည်နယ် ဝန်ကြီးချုပ် ဟိုင်မာတာ ဘစ္စဝါ ဆာမားက လူမှုကွန်ရက်မှာ ရေးသား ကြေညာခဲ့ပါတယ်။ အခုနှစ်အတွင်း အာသံက မိုးရွာသွန်းမှုတွေဟာ ပျမ်းမျှ မိုးရေချိန်ထက် လေးဆခွဲလောက်ထိ ပိုများပြားတာကြောင့်လည်း မြို့ရွာတွေမှာ မကြုံစဖူး ရေလွှမ်းမိုးမှုတွေ ကြုံတွေ့ခဲ့တယ်လို့ ဆာမားက ဆိုပါတယ်။ ပြည်နယ်ထဲက အေဂျင်စီတွေအပြင် အိန္ဒိယ လေတပ်နဲ့ တခြား အဖွဲ့အစည်းတွေဟာ ကယ်ဆယ်ရေး လုပ်ငန်းတွေအတွက် နာရီမလပ် အစွမ်းကုန် ကြိုးစား ဆောင်ရွက်နေကြောင်း၊ အာသံမှာ ကယ်ဆယ်ရေးစခန်း ၁၅၀ ဖွင့်လှစ်ပေးထားပြီး လူပေါင်း ၃ သောင်းလောက်ကို ယာယီ နေရာထိုင်ခင်း စီစဉ်ပေးထားကြောင်း ပြည်နယ် ဝန်ကြီးချုပ်က ပြောပါတယ်။ 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #ChinaLandslide #RescueMission #GlobalNews #PeoplesSpring #တရုတ်မြေပြိုမှု #နိုင်ငံတကာသတင်း #AssamFloods #IndiaNews #ClimateChange #PeoplesSpring #အာသံရေကြီးမှု #အိန္ဒိယသတင်း #နိုင်ငံတကာသတင်း