ဒေါနလမ်းကျောင်းက လိင်ပိုင်းကျူးလွန် ထိပါးမှုဖြစ်ရပ် ဘာဆက်ဖြစ်နေလဲ - BBC News မြန်မာ

ဒေါနလမ်းကျောင်းက လိင်ပိုင်းကျူးလွန် ထိပါးမှုဖြစ်ရပ် ဘာဆက်ဖြစ်နေလဲ ထိုင်းနိုင်ငံ၊ မဲဆောက်မြို့က ဒေါနလမ်း (Dawna Land) သက်မွေးပညာကျောင်းမှာ အချိန်ပိုင်းကျောင်းဆရာတစ်ဦးနဲ့ ကျောင်းသား ၂ ဦး(V 1 နဲ့ V 2)ဟာ ကျောင်းအုပ်ဖြစ်သူ အသက် ၄၀ အရွယ်အမျိုးသားရဲ့လိင်ပိုင်းကျူးလွန်မှုနဲ့ ထိပါးနှောင့်ယှက်မှုခံခဲ့ရတယ်လို့ ကျောင်းကောင်စီကို တိုင်ကြားမှု ဇွန်လ ၄ ရက်မှာ ထွက်ပေါ်ခဲ့ပါတယ်။ အဲဒီကျောင်းကို ရွှေဝါရောင်ဆရာတော်အရှင်ထာဝရ(နော်ဝေ) ဦးဆောင်တဲ့ အရှင်ထာဝရဖောင်ဒေးရှင်းက မတည်တည်ထောင်ခဲ့တာဖြစ်ပြီး တိုင်ကြားမှုဖြစ်စဉ်ထွက်ပေါ်တဲ့အခါ စုံစမ်းစစ်ဆေးမှုလုပ်ဖို့ ကျောင်းအုပ်ကို ရာထူးကနေ ဖယ်ရှားခဲ့ပြီး စုံစမ်းစစ်ဆေးမှုတွေ ဆက်လုပ်တယ်လို့ ကျောင်းကောင်စီဘက်က သတင်းထုတ်ခဲ့ပါတယ်။ အဲဒီနောက် ရန်ပုံငွေအခက်အခဲကြောင့်ဆိုပြီး ကျောင်းကိုလည်း ပိတ်ခဲ့ပါတယ်။ ကျူးလွန်တယ်လို့ စွပ်စွဲခံရသူ ကျောင်းအုပ်အမျိုးသားကို ကရင်အမျိုးသားအစည်းအရုံး(KNU) တရားရေးအောက်မှာ အမှုဖွင့်ခဲ့ဆိုတဲ့သတင်းတွေလည်း ထွက်ပေါ်ခဲ့ပါတယ်။ ဒေါနလမ်းကျောင်းကို တိုင်ကြားတဲ့ကျောင်းသားတွေဘက်ကနေ လိုက်ပါကူညီပေးနေသူဖြစ်သလို ကျောင်းမှာလည်း အချိန်ပိုင်း ဆရာမလုပ်နေတဲ့ ဒေါ် ခင်သော်တာလင်းကတော့ KNU တရားရေးအောက်က လုပ်ခဲ့တဲ့ဖြစ်စဉ်ကို အပြည့်အဝ မသိရှိခဲ့ရဘူးလို့ဆိုပါတယ်။ ကျူးလွန်သူလို့ စွပ်စွဲခံရသူ ကျောင်းအုပ်ဟောင်း အမျိုးသားကတော့ KNU ရဲဌာနအောက်မှာ သူ့အပေါ် တိုင်ကြားခဲ့တယ်ဆိုတဲ့ နစ်နာသူ (V1)ကျောင်းသားနဲ့ မိဘတွေဟာ အမှုကို ပြန်ပိတ်ခဲ့ပြီဖြစ်လို့ KNU ရဲအချုပ်ကနေ လွတ်လာပြီလို့ လူမှုကွန်ရက်မှာ ရေးပါတယ်။ ဒေါနလမ်းကျောင်းအုပ်ဟောင်း အမျိုးသားကတော့ သူ့ကြောင့် နစ်နာသူ လူငယ်တွေ တရားမျှတမှုအတွက် ထိုင်းဥပဒေအရ အမှုဖွင့်မယ်ဆိုရင်လည်း ပူးပေါင်းမယ်လို့ပြောပါတယ်။ ဒီတော့ ထိုင်းဘက်ခြမ်းမှာ ဥပဒေကြောင်းအရ ဖြေရှင်းဖို့ ကြိုးပမ်းမှု ဘယ်လိုဆက်ရှိနေပါသလဲ။ ဒေါနလမ်း ကျောင်းသားတွေ လိင်ပိုင်းဆိုင်ရာ ကျူးလွန် ထိပါးခံရတဲ့ဖြစ်ရပ် ဘယ်လိုထွက်ပေါ်လာတာပါလဲ။ နစ်နာသူကျောင်းသားဘက်ကနေ လိုက်ကူညီနေသူ ဆရာမ ဒေါ်ခင်သော်တာလင်းကို ဘီဘီစီက ဆက်သွယ် မေးမြန်းထားပါတယ်။ အပြည့်အစုံကို ရုပ်သံမှာ ကြည့်နိုင်ပါတယ်။ #ဘီဘီစီမြန်မာပိုင်း #ဒေါနလမ်း