మెఱుఁగుఁ జెక్కుల‌ అలమేలుమంగా - అన్నమయ్య సంకీర్తన (Merugu Jekkula - Annamayya Sankeerthana) Lyrics

మెఱుఁగుఁ జెక్కుల‌ అలమేలుమంగా - అన్నమయ్య సంకీర్తన (Merugu Jekkula - Annamayya Sankeerthana) Singer & Composer - Sri G Balakrishna Prasad garu; (Courtesy - TTD & Sri Venkateswara Recording Project) Lyrics - మెఱుఁగుఁ జెక్కుల‌ అలమేలుమంగా తరి(ఱి?) తోడి రతులను దైవారవమ్మా చనవులు నీకిచ్చి చక్కనివదన మెత్తి పెనఁగీ నాతఁడు నిన్నుఁ బ్రేమతోడను కనువిచ్చి చూడవమ్మ కందువల నవ్వవమ్మ మనసిచ్చి యాతనితో మాటలాడవమ్మా పొందులు నీతో నెరపి పూఁచి నీపైఁ జేయివేసి చిందీ నీపై నతఁడు చిఱుఁజెమట విందుల మోవియ్యవమ్మ వేడుకలు చూపవమ్మ అందుకొని ఆకుమడి చాతని కీవమ్మా గక్కుననుఁ గాఁగిలించి కరుణ నీపై నించి ఇక్కువఁ గూడె శ్రీవేంకటేశుఁడు నిన్ను వక్కణ లడుగవమ్మ వన్నెలెల్లాఁ జూపవమ్మ నిక్కుచు నురముమీఁద నిండుకొనవమ్మా భావామృతం : తల్లీ! అలమేలుమంగా! నీవు మెరిసిపోతున్న చెక్కిళ్ళుగల దేవివమ్మా! శ్రీరమణుడు నీకు తఱితోడ (చేరువయై) రతులతో దైవారవమ్మా! (అతిశయించవమ్మా!) ఓ దేవీ! చనవులు (అనురాగము) నీకిచ్చిన స్వామి నీ చక్కని ముఖమును చేతితో పైకెత్తి ప్రేమతో పెనగినాడు. అరవిందాక్షులను విప్పారించి నీ విభుని వీక్షించవమ్మా! కందువల (ఏకాంత స్థలమైనందున) మనస్ఫూర్తిగా నవ్వవమ్మా! మనస్సు విప్పి మాట్లాడవమ్మా! నిన్ను పొందిన నీ స్వామి తన చేతులు నీపై వేసినాడు. స్వామి చెమటలు నీపై చిందినవి. ఇక విందైన నీ అధరమా అందాల స్వామికి అందియ్యవమ్మా! నీ సంతోషము ప్రకటించవమ్మా! ఆయనకు అందుకుని తీసికొని నీ చేతితో సాదరంగా, ఆకుమడి చాతనికి అందియ్యవమ్మా! (తాంబూలం అందియ్యవమ్మా!) ఓ దేవీ! ఆ శ్రీ వేంకటేశుడు గక్కున (హఠాత్తుగా) నిన్ను పరిష్వంగము చేసికొని, నీపై కరుణ జూపి నిన్ను కూడినాడు. నీవు అంతలోనే మైమరచిపోవద్దు. వన్నెలు జూపవమ్మా (నీ చాతుర్యమును చూపి) స్వామిని, ఇక్కువ వక్కణ అడుగవమ్మా! (ఇప్పటిదాకా ఎక్కడ ఉన్నాడో ఈ ఆలస్యానికి కారణమేమిటో, వ్యాఖ్యానించమని అడుగవమ్మా!) ఆ తరువాత నిక్కుచు (గర్వముతో) ఆయన వురము నెక్కవమ్మా! (స్వామి హృదయ పీఠికనధిష్టించవమ్మా! నీదే భాగ్యమంటే). (సంకీర్తనమునకు భావవాణి… శ్రీ అమరవాది సుబ్రహ్మణ్య దీక్షితులు గారు)