బ్రహ్మ పూజించే రఘుపతి - పెదతిరుమలాచార్య సంకీర్తన(Bramha Poojinche - Peda Tirumalacharya Keerthana)

బ్రహ్మ పూజించే రఘుపతి - పెదతిరుమలాచార్య సంకీర్తన (Bramha Poojinche - Peda Tirumalacharya Sankeerthana) Singer - Smt. Dwaram Lakshmi garu; Composer - Sri Kalaga Krishnamohan garu; (Courtesy - TTD & Sri Venkateswara Recording Project) Lyrics - బ్రహ్మ పూజించే రఘుపతి విభీషణు కిచ్చె బ్రహ్మణ్యుఁడీ రంగపతిఁ గొలువరో కావేరీ మధ్య రంగక్షేత్ర మల్లదిగో శ్రీవిమాన మదిగో శేషపర్యంక మిదె దేవుఁ డల్లదె వాఁడే దేవి శ్రీలక్ష్మి యదె సేవించరో నాభిఁ జిగురించె నతఁడూ యేడు గోడలు నవిగో యెసఁగు పూఁదోఁపు లవె కూడి దామోదరపుర గోపురమదె తోడ వేయిగంబాల దొడ్డమంటప మదిగో చూడరో పసిఁడిమించులకంబ మదిగో ఆళువారలు వారే యంగరంగవిభవ మదే వాలు శ్రీ వైష్ణవపు వాడ లవిగో ఆలీల శ్రీ వేంకటేశుఁడై వర మిచ్చీని తాలిముల శ్రీరంగ దైవముఁ గొలువరో భావమాధుర్యం : పెదతిరుమలయ్య ఈ అధ్యాత్మ కీర్తనలో శ్రీ రంగనాథస్వామి వారి విభూతిని వర్ణిస్తున్నారు. నేటికాలంలో కావేరీనది ఒడ్డున గల శ్రీరంగంలో వెలసిన రంగనాథుని అర్చామూర్తిని అలనాడు రఘుపతిచే విభీషణునికి కానుకగా నొసగబడినది. మరి ఆ రాఘవునికి బ్రహ్మదేవుడే స్వయంగా తానుకొలిచే ఆ అర్చామూర్తిని ఇచ్చాడు. బ్రహ్మణ్యుడైన ఆ శ్రీరంగనాథుని కొలువరయ్యా! అల్లదిగో ఉభయ కావేరీనదీ మధ్యంలో శ్రీరంగక్షేత్రము. అదిగో దేవదేవుని ఆలయ విమానము. అదిగో ఆది శేషతల్పము. అదిగో వాడే శ్రీరంగనాథుడు. అదే రంగనాథుని దేవేరి శ్రీలక్ష్మి. అదిగో ఆయన నాభికమలంలోంచి చిగురించాడు “అత”డైన బ్రహ్మదేవుడు. వారిని సేవించండయ్యా! అవిగో ఏడు గోడలు ఆలయమును పరివేష్ఠించినవి. అదిగో శ్రీరంగనాథుని పూదోట. అదిగో దామోదరపుర గోపురము. అదిగో వేయిస్తంభముల దొడ్డమండపము. అదిగో అపరంజిలా మెఱసిపోతున్న స్థంభము. చూడరయ్యా భక్తులారా! అల్లదిగో వారే పన్నెండుమంది ఆళ్వారులు. అంగరంగ వైభవమని ప్రసిద్ధికెక్కినది (అంగములకు అనగా దేవతా విగ్రములకు, రంగమునకు అనగా ఆలయమునకు అన్ని భోగాలతో వూరేగింపు చేయుట) అదిగో అవిగో వైష్ణవ వాడలు. ఆ విధముగా శ్రీవేంకటేశ్వరుడే తానైన శ్రీరంగనాథుడు కొలిచి ధన్యులౌదురు గాక! తాలిముల - క్షమగల బ్రహ్మణ్యుడు - బ్రాహ్మణులకు హితుడు (సంకీర్తనమునకు భావవాణి… శ్రీ అమరవాది సుబ్రహ్మణ్య దీక్షితులు గారు)