Ақтөбенің автопаркі «Yutong» маркалы жаңа автобустармен толықты

Ақтөбенің автопаркі жаңа автобустармен толықты. Бұл жолы қалаға Қарағандыда құрастырылған қытайдың «Yutong» маркалы автобустарының оны жеткізілді. 110 орындық қоғамдық көліктер, жуырда жолаушы тасымалдауға шығарылады. Жаңа автобустар қаланың шет аумағына қатынайтын нөмірі 19-шы бағытқа берілмек. Бұл автобустардың әрқайсысы 62 миллион теңгеге сатып алынған. Көліктер жайлы, заман талабына сай. Мүмкіндігі шектеулі жандарға арналған орын мен пандусы да бар. Сондай-ақ, әр автобуста бес бейнекамерадан орнатылған. Жылытқыш пеші де әлдеқайда көп. Жүзден астам жолаушы емін-еркін сиятындай орын жеткілікті дейді автопарк өкілдері. РУСЛАН ЖЫЛҚАМАНОВ, "Автопарк" ЖШС өкілі: – Автопарк ЖШС "Yutong" маркалы 10 автобус сатып алды. Әр автобустың құны 62 миллион теңгені құрайды. Бүгінгі күні 19-шы бағытты жаңалауды жоспарлап отырмыз. Автобустар тіркеуден өту керек. Электронды төлем жүйесін қондырғаннан кейін шығады. Компания жыл басынан бері 55 жаңа автобус алған. Осылайша күн тәртібінен түспей тұрған қоғамдық көлік мәселесі Ақтөбеде біртіндеп шешіліп келеді. Қала көшелерінде күнделікті жүйіткіп жүрген жаңа автобустар жолаушылардың да талабынан шығып отыр. Серіктестік иесі келер жылы автопаркті тағы жаңалаймыз деп уәде берді. Қалада жолаушы тасымалымен 4 компания айналысады. Биыл барлығы 100-дей автобусты жаңартқан. Қызметі көптің көңілінен шығу үшін әлеуметтік маңызы бар бағыттар үшін жергілікті бюджеттен субсидия беріліп келеді. Жалпы сомасы 4 миллиард теңге. Бұл қаржыны қызмет көрсету сапасы жоғары компания ғана иелене алады. Бізді әлеуметтік желіде оқыңыздар: Youtube -   / @informburo31kanal   Facebook -   / informburo31   Instagram -   / informburo31   Vkontakte - https://vk.com/informburo31 TikTok - www.tiktok.com/@informburo31 WhatsApp Информбюро +7 777 331 31 31