संदेशाचा विषय : मृत्यूची भीती

म्हणून मुले रक्त व मांस यांची बनलेली असल्याने तोही त्यांच्यासारखा रक्तमांसाचा झाला, येशूने हे यासाठी केले की, ज्याच्याकडे मरणाची सत्ता आहे, अशा सैतानाचा मरणाने नाश करावा. आणि जे लोक त्यांच्या सर्व आयुष्यात मरणाचे भय ठेवून त्याचे दास असल्यासारखे जगत होते त्यांना मुक्त करावे. इब्री लोकांस २:१५ प्रिय मित्रांनो, एक दिवस आपल्या सर्वांची मृत्यूशी भेट आहे आणि या पृथ्वीवरील कोणतीही व्यक्ती ही भेट चुकवू शकत नाही. मृत्यू म्हणजे केवळ शरीराचे आत्म्यापासून वेगळे होणे नव्हे तर ते आत्म्याचे देवापासून वेगळे होणे देखील आहे. आपल्या पापांनमुळे आपल्यावर मृत्यू आला, कारण पापाची मजुरी मृत्यू आहे (रोमकरांस ६:२३). आणि शतकानुशतके लोकांनी मृत्यूवर मात करण्याचा प्रयत्न केला परंतु ते करू शकले नाहीत. या समस्येवर मनुष्याचा उपाय म्हणजे त्याबद्दल न बोलणे कारण प्रत्येकाला मृत्यूची भीती वाटते. आता माझा प्रश्न तुम्हाला आहे, तुम्हाला मृत्यूची भीती वाटते का? आणि जर तुमचे उत्तर '*होय*' किंवा "*कोणाला मृत्यूची भीती वाटत नाही*" असे असेल तर माझ्या मित्रांनो, तुम्ही बायबलच्या येशूला कधीही भेटला नाहीत. तुम्हाला कदाचित त्याच्याबद्दल माहिती असेल, पण तुम्ही त्याला ओळखत नाही. कारण येशूही आपल्या पापांची शिक्षा घेण्यासाठी मेला, पण मृत्यू त्याला धरून ठेऊ शकला नाही आणि तिसऱ्या दिवशी येशूने मृत्यूवर विजय मिळविला आणि जो कोणी येशू ख्रिस्त, देवाचा पुत्र म्हणून त्याला देवाच्या न्यायापासून आणि क्रोधापासून वाचविण्यासाठी हाक मारतो, त्याला येशू वाचवितो. आणि येशू केवळ शाश्वत जीवनाची देणगीच देत नाही तर त्या व्यक्तीला मृत्यूच्या भीतीच्या बंधनातून सुद्धा मुक्त करतो. मृत्यूवर येशू ख्रिस्त हाच एकमेव उपाय आहे कारण पॉल म्हणतो “*अरे मरणा तुझा विजय कोठे आहे? मरणा, तुझी नांगी कोठे आहे?”... पण देवाला धन्यवाद असो, जो प्रभू येशू ख्रिस्ताद्वारे आम्हास विजय देतो!.* (1 करिंथकर 55,57). मृत्यूच्या भीतीबद्दल अधिक जाणून घेण्यासाठी कृपया संदेश ऐका.