కళారంగానికి ప్రభుత్వం పునరుజ్జీవం కల్పించాలి

కళారంగానికి ప్రభుత్వం పునరుజ్జీవం కల్పించాలి -ఎమ్మెల్యే మండలి బుద్ధప్రసాద్ చల్లపల్లిలో ఎన్టీఆర్ కళాపరిషత్ ఆధ్వర్యంలో నాటక ప్రదర్శనలు రాష్ట్ర ప్రభుత్వం కళారంగానికి పునరుజ్జీవం కల్పించాలని అవనిగడ్డ ఎమ్మెల్యే మండలి బుద్ధప్రసాద్ విజ్ఞప్తి చేశారు. ఏపీ నాటక అకాడమీ సౌజన్యంతో ఎన్టీఆర్ జయంతి ఉత్సవాల్లో భాగంగా చల్లపల్లి ఎన్టీఆర్ కళాపరిషత్ ఆధ్వర్యంలో ఎన్టీఆర్ పార్కులో జానపద, పౌరాణిక నాటక ప్రదర్శనలు శనివారం రాత్రి ప్రారంభమయ్యాయి. ఈ సందర్భంగా జరిగిన సభలో ముఖ్య అతిధిగా పాల్గొన్న ఎమ్మెల్యే మండలి బుద్ధప్రసాద్ మాట్లాడుతూ, సాంస్కృతిక రంగానికి ప్రభుత్వం మరిన్ని నిధులు కేటాయించి ప్రోత్సహించాలని కోరారు. ప్రభుత్వం నాటక శిక్షణ కేంద్రం పునరుద్ధరించాలనీ, లేకుంటే ఏపీ నాటక అకాడమీలో భాగంగా ఏర్పాటు చేసి నేటితరాలకు నాటక శిక్షణ ఇప్పించి నాటక కళను భావితరాలకు అందించాలని తెలిపారు. నవ్యాంధ్ర తొలి టీడీపీ ప్రభుత్వంలో సీఎం చంద్రబాబు విశేష ప్రోత్సాహం అందించారనీ, గత వైసీపీ ప్రభుత్వ హయాంలో కళారంగం నిర్లక్ష్యానికి గురై పూర్తిగా కళావిహీనమైందని ఆవేదన వ్యక్తం చేశారు. కూటమి ప్రభుత్వం నాటక రంగాన్ని ప్రోత్సహించి నాటకరంగాన్ని సజీవంగా నిలపాలని ఆకాంక్షించారు. నాటక అకాడమీ చైర్మన్ గుమ్మడి గోపాలకృష్ణ కేంద్ర సంగీత నాటక అకాడమీ అవార్డు అందుకోవటం గర్వకారణమని ఆయనను సన్మానించారు. అమెరికాలో నాటక శిక్షణ ఇచ్చిన గుమ్మడి గోపాలకృష్ణ సేవలు ఇక్కడి కళాభిమానం కలిగిన పేరెంట్స్ సద్వినియోగం చేసుకుని తమ పిల్లలకు నాటక శిక్షణ ఇప్పించి నాటక కళను ప్రోత్సహించాలని కోరారు. ఏపీ నాటక అకాడమీ ఛైర్మన్ గుమ్మడి గోపాలకృష్ణ మాట్లాడుతూ, నాలుగు శిక్షణా కేంద్రాలు, 150 నాటక సమాజాల ఏర్పాటు లక్ష్యంగా పనిచేస్తున్నట్లు తెలిపారు. నాటక రంగానికి విలువ తేవటమే లక్ష్యమని అన్నారు. కళాకారులు పట్టుదలతో ఎదగాలన్నారు. నాటక ప్రదర్శనల నిర్వహణ పట్ల కళాపరిషత్ అధ్యక్షులు బోలెం రామారావును, నిర్వాహకులను అతిధులు అభినందించారు. ఆహ్వాన కమిటీ గౌరవ అధ్యక్షులు ముమ్మనేని రాజ్ కుమార్ (నాని), అధ్యక్షులు బోలెం రామారావు, కమిటీ సభ్యులు ప్రదర్శనలను పర్యవేక్షించారు. మండల టీడీపీ అధ్యక్షుడు మోర్ల రాంబాబు అధ్యక్షతన జరిగిన సభలో జిల్లా టీడీపీ అధ్యక్షుడు వీరంకి గురుమూర్తి, నాటక అకాడమీ డైరెక్టర్ పైడిపాముల స్వప్న, జడ్పీ మాజీ వైస్ చైర్మన్ గొర్రెపాటి వెంకట రామకృష్ణలు ప్రసంగించగా, ఎంపీపీ కోట విజయరాధిక, ఏపీఎస్ ఐడీసీ పైడిపాముల కృష్ణకుమారి, స్వచ్ఛ ఏపీ డైరెక్టర్ బోలెం నాగమణి, ఏఎంసీ చైర్మన్ తోట కనకదుర్గ, వైస్ ఎంపీపీ పిట్టు వెంకటేశ్వరమ్మ, బుల్లా కిషోర్, నియోజకవర్గ ప్రత్యేక అధికారి పెనుమూడి సాయిబాబు, దాసి సీతారామరాజు, దిరిశం వెంకట్రావ్, మోర్ల శివ, ఉప్పల సాంబశివరావు తదితరులు పాల్గొన్నారు. ఈ సందర్భంగా దుర్యోధన మయసభ ఏకపాత్రాభినయంలో ప్రముఖ రంగస్థల కళాకారుల, కార్యక్రమ నిర్వాహకులు బోలెం రామారావు అద్భుతంగా నటించారు. రాష్ట్ర సాంస్కృతిక విభాగం ప్రధాన కార్యదర్శి దిరిశం బాలకోటయ్య, అకాడమీ డైరెక్టర్ పైడిపాముల స్వప్నలను అతిధుల చేతులమీదుగా నిర్వాహకులు ఘనంగా సన్మానించారు. కార్యక్రమంలో ప్రెస్ పూర్ణ, మోర్ల శివ, రావి చిట్టి, రావెళ్ల విజయ్ కుమార్, కొడాలి మురళీ తదితరులు పాల్గొన్నారు.