చట్టపరంగా పరిపాలన సాగాలి

గొల్లమంద రోడ్డు, ఎదురుమొండి బ్రిడ్జి నిర్మాణానికి కృషి సీఎం చంద్రబాబు, డిప్యూటీ సీఎం పవన్ కళ్యాణ్ ఆకాంక్షలకు అనుగుణంగా అధికారులు పని చేయాలి నాగాయలంక ప్రజా దర్బారులో ఎమ్మెల్యే మండలి బుద్ధప్రసాద్ నాగాయలంక మండలంలో కీలకమైన గొల్లమంద రోడ్డు, ఎదురుమొండి బ్రిడ్జి నిర్మాణానికి కృషి చేస్తున్నామని అవనిగడ్డ ఎమ్మెల్యే మండలి బుద్ధప్రసాద్ స్పష్టం చేశారు. మంగళవారం మధ్యాహ్నం నాగాయలంక మండల పరిషత్ కార్యాలయంలో ప్రజా దర్బార్ నిర్వహించారు. వివిధ గ్రామాల నుంచి వచ్చిన ప్రజల నుంచి ఎమ్మెల్యే బుద్ధప్రసాద్ 36 అర్జీలు స్వీకరించారు. వాటిని పరిశీలించి, సంబంధిత శాఖల అధికారులకు తగు పరిష్కారాలు సూచించారు. అనంతరం గ్రామాల అభివృద్ధి ప్రణాళిక ప్రతిపాదనలను పరిశీలించి వాటిని సాకారం చేసేందుకు అనువుగా అధికారులతో చర్చించారు. ఈ సందర్భంగా ఎమ్మెల్యే మాట్లాడుతూ సీఎం చంద్రబాబు, డిప్యూటీ సీఎం పవన్ కళ్యాణ్ ఆకాంక్షలకు అనుగుణంగా అధికారులు పని చేయాలని ఎమ్మెల్యే మండలి బుద్ధప్రసాద్ స్పష్టం చేశారు. గ్రామ పంచాయతీ ప్రత్యేక అధికారులుగా బాధ్యతలు నిర్వహిస్తున్న అధికారులు తమ గ్రామాల్లో సుదీర్ఘ కాలంగా అపరిష్కృతంగా ఉన్న సమస్యలు పరిష్కరించాలన్నదే రాష్ట్ర ముఖ్యమంత్రి ధ్యేయం అన్నారు. పల్లెసీమలను సమగ్ర అభివృద్ధి చేసి గ్రామీణ అభివృద్ధికి బాటలు వేయాలన్నదే ఉప ముఖ్యమంత్రి పవన్ కళ్యాణ్ ధ్యేయం అన్నారు. డిప్యూటీ సీఎం పవన్ కళ్యాణ్ పంచాయతీ రాజ్ గ్రామీణ అభివృద్ధి శాఖ మంత్రిగా తన శాఖలో విప్లవాత్మక మార్పులు తెచ్చారని తెలిపారు. సుధీర్ఘకాలంగా ప్రమోషన్లకు నోచుకోని వారందరికీ ప్రమోషన్లు కల్పించారన్నారు. డిప్యూటీ సీఎం కృషితోనే గ్రామాల్లో సిమెంటు రోడ్లు, తారు రోడ్ల నిర్మాణం విస్తృతస్థాయిలో జరిగిందన్నారు. ప్రతి బుధవారం, ప్రతి శనివారం జరిగే స్వచ్ఛ పథం, స్వర్ణాంధ్ర స్వచ్ఛ ఆంధ్ర కార్యక్రమాలు బాధ్యతగా నిర్వహించాలని, స్వచ్ఛంద సంస్థల భాగస్వామ్యాన్ని జోడించి స్వచ్ఛభారత్ లక్ష్యాలు సాధించాలని ఆదేశించారు. ప్రతి అధికారి తమ కార్యాలయాన్ని, తమ గ్రామాన్ని పరిశుభ్రంగా ఉంచాలని సూచించారు. వేసవి తీవ్రత నేపథ్యంలో త్రాగునీటి సరఫరాపై దృష్టి సారించి అవసరమైన గ్రామాల్లో ట్యాంకర్లతో సరఫరా చేయాలని సూచించారు. కాలువల ద్వారా త్రాగునీరు విడుదల కాగానే పంచాయతీ త్రాగునీటి చెరువులన్నీ పూర్తిస్థాయిలో నింపాలని స్పష్టం చేశారు. గ్రామాల్లో స్ట్రీట్ లైట్ల ఓల్టేజ్ పెంచాలని, ప్రతి వీధి దీపం వెలిగేలా శ్రద్ధ చూపాలన్నారు. ప్రతి అంశంపై శ్రద్ధ వహించి గ్రామపంచాయతీ ప్రత్యేక అధికారులు అభివృద్ధిలో తమ ముద్ర వేసేందుకు ఖచ్చితంగా కృషి చేయాలని సూచించారు. రానున్న వ్యవసాయ సీజనులో ఎల్-నీనో నేపథ్యంలో వర్షాభావ పరిస్థితి, యుద్ధ వాతావరణం నేపథ్యంలో యూరియా కొరతను ప్రభుత్వ ప్రణాళిక అనుగుణంగా అధిగమించాలని సూచించారు. గత ఏడాది యూరియా సరఫరాలో రాష్ట్రంలో మొదటి స్థానంలో నిలిచిన అవనిగడ్డ నియోజకవర్గం మరోసారి అదే స్థాయి పనితీరు కనబరచాలని పిలుపునిచ్చారు. అధికారులు ప్రభుత్వానికి చెడ్డ పేరు వచ్చేలా ఎన్నడూ వ్యవహరించవద్దని ఎమ్మెల్యే బుద్ధప్రసాద్ పిలుపునిచ్చారు. ప్రతి అధికారి చట్టప్రకారం పని చేయాలని, చట్ట విరుద్ధంగా ఎవరైనా పని చేయాలని ఒత్తిడి చేస్తే ఎవరికీ తలోగ్గవద్దని స్పష్టం చేశారు. కీలకమైన గొల్లమంద రోడ్డు నిర్మాణానికి కృష్ణా నది కోతను అరికట్టేందుకు అనువుగా ఐఐటీ మద్రాస్ నిపుణుల సలహాలు తీసుకొని ఉన్నత స్థాయి అధికారులు సంసిద్ధం అవుతున్నారన్నారు. రోడ్డును మరింత లోపలికి జరిపి నిర్మించేందుకు అనువుగా స్థల సేకరణ చేస్తున్నట్లు తెలిపారు. కోతను ఎదుర్కొనేందుకు అనువుగా జియో బ్యాగింగ్ విధానం ద్వారా కట్టను బలోపేతం చేసేందుకు ప్రయత్నాలు జరుగుతున్నాయన్నారు. మరో కీలక అభివృద్ధి అయిన ఎదురుమొండి బ్రిడ్జి నిర్మాణానికి నాబార్డ్ నిధులకు తోడు సాస్కి నిధులు జోడించి త్వరలో పనులు ప్రారంభిస్తామన్నారు. కార్యక్రమంలో నియోజకవర్గ ప్రత్యేక అధికారి పెనుమూడి సాయిబాబు, తహసీల్దార్ వీరాంజనేయ ప్రసాద్, డిప్యూటీ ఎంపీడీఓ, అధికారులు పాల్గొన్నారు.