Txoj Phuam Paj Yog Wb Qhov Chaw Cog Lus Ntawm Tus Ntug Dej Nam Yao

Ua tsaug rau kuv tus muam Maiv Txhiab Lauj (Niam Tswv Kaub Lis) los ua tus cev lus (narrator) rau peb txhua zaj keeb kwm thiab txhua zaj lus paj huam. Txoj phuam paj yog ib qho puav pheej sib cog lus nyob rau tim lub Yeej Thoj Nam Nam Yao, Amper Pua, Nan, Thaibteb. Tus hluas nraug yog ib tug tuaj tom Yeej Thoj Nam Soptuang tuaj. Hos tus hluas nkauj yog ib tug nyob hauv lub Yeej Thoj Nam Nam Yao (Dej Ntev). Khub nkauj nraug no thaum nyob nraum ub, tus hluas nkauj nyob tom los zos Nam Hiab hos tus hluas nraug nyob rau tom lus zos Nam Pouy. Nkawv tau sib ntsib sib cog lus tseg rau txoj phuam paj thaum tus hluas nkauj muab rau tus hluas nraug nyob rau hauv lub Yeej Thoj Nam Nam Yao. Txoj phuam paj uas nej pom no yeej yog tus hluas nkauj ua kiag ntawm nws ntxhais tes thiab muab rau tus hluas nraug. TXOJ PHUAM NO YEEJ YOG TXOJ TIAG PUAG THAUD. Tiamsis tsis mus li tau cog lus tseg twb tau ze 50 lub xyoo lawm ces ntshe tej lus cog tseg yuav cia li yav ua me huab me cua lawm xwb. Hauv qab no yog zaj lus no ntag. COPYRIGHT @ 2026 Tou Cheng (Tsom Pov) Lo All rights reserved TXOJ PHUAM POOB NTAWM NTUJ DEJ NAM YAO, DEC. 8, 1978 Zaum no Zaj Laug ntxhais nkauj ntxawm hlob tiav nkauj piav li yeev, nplooj siab qhuav nkig nkuav los tsa lub suab hu nkauj tau kho siab heev ntxuaj tw lis yeev nrog niam Dej Nam Yao sib tw ntxeev. Zaj Laug ntxhais nkauj yau hlob tiav nkauj sib lis loo, lub plawv deeg nrog nplooj siab sib tsoo, ua zaj twg tsav twg los tsis zoo, tsa lub suab hu nkauj nyob hauv niam dej Nam Yao tig cev lis loo. Kho kho Zaj Laug ntxhais nkauj ntxawm siab, nws muab mi xov paj ntaub ntsuab los phim xov liab coj los sib hiab mus ua vas tooj vas hlau cuab ntses nuj ntses niag khiav mag ntxiab. Kho kho Zaj Laug ntxhais nkauj ntxawm siab lawm lis daws, nws tawm rooj plaws mus muab paj xo los sib xaws coj mus muab ntses nuj ntses niag cam ntseeg tej sib nkaws. Zaj Laug mi ntxhais nkauj ntxawm tsis ua zoo xav, nplawm tw li loo nrog niam Dej Nam Yao rov nqis hav, raug ntses nuj dig muag tas ntses niag raug lov tav. Cas nws nim nplawm tw lis lias nrog niam Dej Nam Yao rov nce toj, ua rau ntses nuj lub plawv nres tsis ntoj, ntses niag raug dav dub tsuab tau coj mus noj. Txoj phuam paj ces muab nrauj lis ncua tau ntau hnub los nws txawj nplawm tw sis li Zaj Laug ntxhais ntxawm rov los khuam nyob li qub, ntshe yog phuam paj mus sua tau Zaj Laug ntxhais nkauj ntxawm txoj mi hmoov kub, cia mam ua siab ntuj ntev tos saib puas yuav muaj dua rov ib hnub, txoj phuam paj puas yuav peem tsheej los ua tau zaub mov ncho paj lug tseg rau saum qhov cub. Txoj phuam paj ces twb ua ib siab muab nrauj ncua pov tseg tau ntau xyoo, los phuam paj txawj ua Zaj Laug ntxhais nkauj ntxawm plawm tw rov los khuam tej sib loo, ntshe yog phuam paj mus sua zog tau Zaj Laug ntxhais nkauj ntxawm txoj hmoov zoo; mam ua siab ntev tos tsis txhob nroo saib puas yuav muaj dua ib lub zoo xyoo es Zaj Laug ntxhais nkauj ntxawm rov los kho mi txaj mi chaw pw ntaug lis loo tej npoo ncoo. Yog Zaj Laug mi ntxhais nkauj ntxawm tsis rov mus chawj mus cheem kom tau niag niam Dej Nam Yao rov qab ntshiab ces ntshe yuav nkim tas Zaj Laug ntxhais nkauj ntxawm lub zog nphau toj nphau pes niaj txhis mus ib txhiab, yuav peem ciaj peem tuag tsis tau mus ua nkauj zag muaj 3 kab xiav nrog rau 3 kab liab sawv nkhaus li loo rov mus haus tus mi niam Dej Naj Hiab niaj txhis mus ib txhiab. Yog Zaj Laug ntxhais nkauj ntxawm tsis tig rov mus chawj mus cheem kom niam Dej Nam Yao tsis txhob nqig, ces ntshe yuav nkim nkim nkauj zag lub zog nphau toj nphau pes kom sawv sib txig, yuav peem ciaj peem tuag mus ua tsis tau nkauj zag muaj 3 kab sib tw ci sawv koov lis loo rov mus haus lub pas Dej Naj Hiab kom rov qab nqig!..