Nais Kong Vam Tsab Lauj Yog Ib Tug Ncaj Ncess, Pom Tau Yav Tom Ntej Thiab Muaj Txoj Kev Txawj Ntse

Nai Kong Vam Tsab Lauj – Biography Nai Kong Vam Tsab Lauj - yug Lub 5 Hli, Tim 13, Xyoo 1915, nyob rau lub zos Txeeb Sab, Xeev Sam Neur, Teb chaws los tsuas. Nws yog Hmoob los sab teb chaws Sam Neur los. Nai Kong Vam Tsab Lauj txiv yog: NPUAG POV LAUJ. Nws niam yog: KAWM TSAB. Nai Kong Vam Tsab muaj tag nrho yog 3 kwv tij, thiab 5 muam. Cov kwv tij muaj xws li: 1. Kwv, Txoov Thoj Lauj 2. Kwv, Txooj Lis Lauj. Cov muam muaj xws li: 1. Paj Lauj 2. Tooj Lauj 3. Neeb Lauj 4. Tswb Lauj 5. Yaj Lauj Nai Kong Vam Tsab Lauj, lub neej muaj tag nrho yog 3 tug poj niam. Niam ib yog: Niam Yeeb Pov Vaj – yog nws tus niam nkauj txhav qaib txiv raug txhav noog. Nkawv sib yuav rau xyoo 1949 hauv teb chaws tsuas, thiab tau los pib lub neej muaj tub, muaj ki ua ke – los txog ntua thaum xyoo 1986 – uas nws tus niam Yeeb Pov no tau tag sim neej thiab tso nws nrog cov menyuam tseg hauv lub zos Sacramento thaum lub 9 hli ntuj, tim17 xyoo 1986. Ntawm Naiskoos Vam Tsab Lauj thiab Yeeb Pov Vaj Lub neej muaj tag nrho 4 leej me nyuam, 2 tug tub, 2 tug ntxhais: 1. Tus Tub hlob yog: Ntsuab Vaj Lauj – Nyab hlob yog Mim Vaj. 2. Tus Tub yau yog: Txawj Pov Lauj – Nyab yog Ntsuab Yaj 3. Tus ntxhais hlob yog: Kiab Lauj – Tus vauv yog Nkaj Neeb Lis 4. Tus ntxhais yau yog Txiab Lauj – Tus vauv yog Tswv Kaub Lis Nkawv muaj tag nrho yog 27 leej tus xeeb ntxwv ; nrog rau 34 leej xeeb leej xeeb ntxwv. Xam tag nrho nkawv cov xeeb ntxwv thiab xeeb leej xeeb ntxwv yog 70 leej. Naikoos Vam Tsab Lauj tau nrog nws tus poj niam Yeeb Pov Vaj ua neej uake tau 36 lub xyoo. Niam Yeeb Pov tau tso nws tseg rau lub 9 hlis tim 17, 1986 lawm. Naikoo Vam Tsab Lauj lub neej yav qub qab: Xyoo 1951 NaiKoos Vam Tsab Lauj, tau los ua Thoob Lis (Hau Zos) nyob rau lub zos Phou Lee Noi, sab Ou Dum Say, qaum teb, teb chaws los tsuas. Nws tuav tus nom Thoob Lis no los txog rau xyoo 1963. Pib thaum xyoo 1963, nws tau los txais lub meej mom thiab tuav tus nom Tasaeng uas yog raug tsa los ntawm tsoom nom tswv Los Tsuas los tuav lub zos Laotas (Khet 19A). Lub sij hawm no, Naikong Vam tsab tau los pab lub tsoom nom tswv sau tub rog los mus pab tiv thaiv lub teb chaws – vim yog lub teb lub chaw tab tom ntxhov hnyo thiab pib muaj txoj kev tsis thaj yeeb. Naikoos Vam Tsab tau los coj laj mej pej xeem hmoob, nplog, mab, thiab Co txog li ntawm 25,000 tawm leej. Nws tau coj thiab pus lawv khiav ib lub zos dhau mus rau ib lub zos vim yog kev tsov rog. Lub sij hawm uas cov pej xeem raug kev txom nyem thiab tsis muaj zaub mov noj, Naikong Vam Tsab yog tus ntaus thawj mus thov tsoom nom tswv kom lawv xav zaub mov tuaj pab rau nws cov neeg. Nws tau los tuav tus nom Tasaeng txog ntau rau xyoo 1968. Xyoo 1968 Nais Phoos Vaj Pov, thiaj tau tuaj tsa nws los ua ib tug Nais Koos saib lub zos Roob Dub. Pib rau xyoo 1969, kev tsov rog pib loj zuj zus – laj mej pej xeem nyob tsis taus, nws thiaj tau txiav txim siab coj sawv daws txav chaws los mus nyob rau sab teb chaws Nam Pouy, xeev Sayabury. Thaum lub 5 hli ntuj tim 9, xyoo 1975 yog ib hnub uas Naikong Vam Tsab tsis muaj hnub hnov qab tau – vim hnub no yog hnub uas nws leej niam daim av tau poob mus rau nyab laj thiab yog hnub uas nws tsoom nom tswv tau tsiv tawm teb chaws vim lawv nyob tsis taus vim txoj kev pauv uas tsis muaj txoj kev thaj yeeb. Naikong Vam Tsab thiab nws cov neeg tau los poob rau lub yeej thoj nam tawg rog SOPTUANG, xeem Nan, sab qaum teb thaib teb. Lub caij los nyob rau yeej thoj nam tawg rog, Naikong Vam Tsab zoo li lwm tus thawj coj Hmoob nws yeej niaj hnub niaj hmo nco txog nws leej niam daim av thiab lub teb chaws uas nws yug thiab loj hlob. Noj tsis qab, pw tsis tsaug zog vim txoj kev poob ua ntsuag teb ntsuag chawsab sis, nyob los tau ib ntu txog rau xyoo 1978, nws thiaj li tau txiav txiav siab tawm raws nws tus thawj coj dua ib kauj ruam ntxiv... tuaj rau teb chaws Meka. Naikong Vam Tsab tuaj poob rau teb chaws Mekas rau lub 8 Hli ntuj, Tim 17, Xyoo 1978. Naikong Vam Tsab Lauj – tuaj poob rau hauv Salt Lake City, lub lav Utah. Xyoo 1986 Vim muaj hauj lwm los tsis tsis muaj kwv tij neej tsa, yog li no, Naikong Vam Tsab thiaj li tau txiav siab tsiv dua ib zaug ntxiv los mus rau Sacramento, California. Naikong Vam Tsab tau los nyob rau hauv lub zos Sacramento txij li xyoo 1986 – los txog ntua rau hnub uas nws tau ncaim sawv daws rau hnub 05/23/2011 thaum 5:30 sawv ntxhov. Nws hnub nyoog yog 96 xyoo. Zaum no yog zaum kawg uas Naikong Vam Tsab Lauj txawm xav rub nws txoj sia nyob npaum li cas los nws tus mob tsis tso nws tseg vim yog Naikong Vam Tsab muaj tus mob uas neeg ntiaj teb tsis muaj leej xav tau yog mob Lung Caner/los yog muaj tus mob loj nyob rau hauv nws lub ntsws uas yog qhov chaws nws ua pa. Naikong Vam Tsab thiaj li ua ib siab ncaim lub ntiaj teb mus rau saum ntuj ceeb tsheej thiab tso tag nws tsev neeg, thiab tub nyab ntxhais vauv, xeeb leej, xeeb ntxwv, thiab nws tsoom phooj ywg nrog rau tsoom kwv tij neej tsa tseg.