一家人夏遊 越南大叻 （第二集）

一家人遊越南大叻（第二日） 一早起身當然要去嘆下呢間五星級渡假村既早餐。網上話好多選擇同好好味，屋企人試咗之後大家都讚不絕口，中式粵式西式，應有盡有。唔錯唔錯。 食完早餐，就去今日嘅第一個景點，叫做大叻花高原，cao nguyên Hoa Đà Lạt。呢個地方最出名就係玩賽車， 250,000嘅飛，可以玩兩程。第一程嘅賽道比較簡單基本平滑款，等大家熟習吓點樣開車。第二程就刺激陡峭，一班人一齊玩，確實幾開心。玩完第一程，大家可以欣賞吓高原歌舞表演，再玩第二程。另外呢度仲可以玩大鞦韆，唔似峇里島咁樣要排好耐。仲可以兩個人一齊玩，工作人員仲會幫你加碼，打撠個鞦韆，增加刺激感。 玩完呢個景點，又到食lunch時間。我哋今次去試咗大叻首創既洋薊花做粉既越式牛肉粉。我哋當地華人通常稱洋薊花係百合花。粉紅色嘅粉，加上牛肉清湯湯底，確實幾好味。 之後我哋就返咗度假村嘆佢嘅下午茶，然後就全家人去游水。細細個已經嚟大叻玩，真係第一次喺呢個1500米高嘅高原城市游水，雖然夏天但係氣溫都有18度，而呢個室外泳池加熱到28攝氏度，夏天游水就啱啱好。之後就返房，用一用吓佢嘅浴缸浸吓熱水，成日人即刻放鬆曬～ 夜晚我哋開車去食燒烤，呢間餐廳可以睇到大叻高原夜景，會見到好多開住燈嘅農作地，就係種植緊大叻引以為傲嘅蔬菜蔬果，格外浪漫。今晚就一齊同個姪女慶祝生日，要健健康康平平安安長大。 然後，我哋就下一場去食街邊宵夜。冇錯，嚴格嚟講我哋呢一個係food trip嚟。除咗食都係食。今晚家姐帶我哋去食大叻烤米紙，天氣凍凍地，坐喺炭爐邊食烤米紙，飲熱芋頭奶，落住微微雨，真係幾溫馨浪漫。 既然話係food trip，食完宵夜，當然要去麵包舖買啲小食，同埋越式法包Bánh Mì返酒店做encore宵夜啦。今日就分享住咁多先，下一集再見～