Toekomsberaad 2025: Die Plan

Die Krisisberaad is in 2024 gehou in reaksie op die ernstige uitdagings waarmee maatskaplike organisasies en werkers te kampe gehad het. Die maatskaplike krisis veroorsaak in ons land onder andere ‘n bestaanskrisis en ‘n toekomskrisis. Die doel was om die krisisse rakende wetgewing, befondsing, dienslewering en die maatskaplike professie te identifiseer, bespreek en oplossings daarvoor te vind. Die beraad het gefokus op probleemanalise en onmiddellike ingryping. Dit het maatskaplike organisasies gehelp om hul grootste struikelblokke te identifiseer en maniere te soek om in ‘n uitdagende omgewing te oorleef. Ten spyte van die stelsel se gebreke moet ons ons roeping omarm en oplossings vind. Daarom word die Toekomsberaad gehou. #Toekomsberaad2025 is ‘n strategiese en toekomsinisiatief wat bou op die insigte van die Krisisberaad. Waar die Krisisberaad ‘n reaksie op bestaande probleme was, is die Toekomsberaad daarop gemik om ‘n volhoubare en selfstandige toekoms vir maatskaplike werk te skep. Dit is ‘n platform waar ons nie net oplossings vir bestaande probleme soek nie, maar ook innoverende strategieë en modelle ontwikkel vir ‘n volhoubare toekoms. By woorde van dr. Dirk Hermann: “Self as dit kan, met die staat as dit moet.” Die vraag tydens die Toekomsberaad is duidelik: “Hoe gaan ons vryheid, veranderinge en verbetering in die maatskaplike omgewing te weeg bring?”. Die fokus verskuif van oorlewing na groei, samewerking en selfstandigheid. Maatskaplike organisasies wil nie net sit en wag dat die regering verandering bring nie – ons tree self op. Staatsafhanklikheid, befondsing en dienslewering mag nie ons roeping beperk nie. Ons kan ‘n selfstandige toekoms bou deur saam te dink, praat en werk. Die fokus van hierdie beraad is om met moed en durf sáám ‘n toekoms te bou. Ons wil nie net passiewe waarnemers van gebeure wees nie, maar aktiewe deelnemers wat bou aan ‘n beter toekoms vir ons land. Ons as maatskaplike organisasies moet nou ‘n verbonde maatskaplike gemeenskap vestig.