JINŻAMMU ARRESTATI B’RABTA MAL-QTIL TA’ DCG

ONE.COM.MT - Seba’ ġimgħat wara l-qtil makabru ta’ Daphne Caruana Galizia tliet persuni tressqu l-Qorti akkużati li assoċċjaw ruħhom ma’ persuni oħra biex iwettqu d-delitt. Tard it-Tlieta filgħaxija, George Degiorgio magħruf bħala ċ-Ċiniż, Alfred Degiorgio magħruf bħala l-Fulu u Vincent Muscat magħruf bħala l-Koħħu tressqu l-Qorti taħt sigurtà stretta mill-pulizija li daħħlu lill-akkużati mid-daħla ta’ wara fost diversi karozzi u vann iswed. Quddiem il-Maġistrat Neville Camilleri, għall-ewwel l-akkużati kkontestaw l-arrest iżda wara li l-Qorti kkonvalidat l-arrest, it-tliet akkużati wieġbu mhux ħatja tal-akkużi miġjuba kontrihom. Huma nżammu arrestati filwaqt li l-pulizija Maltija ħabbret li s-seba’ persuni l-oħra li ġew arrestati fl-operazzjoni massiċċa tat-Tnejn li għadda ngħataw il-police bail.