LACHIWIRI LAMULUNGU WA 21 PACHAKA// 26 AUGUST 2025//FR JOHN KALIWAMBA DP

TIYANKHULENI AMBUYE 26 AUGUST, 2025 LACHIWIRI LAMULUNGU WA 21 MU NYENGO YAPACHAKA MAU OYAMBA, MAU A MKALATA YOYAMBA YA PAULO KWA ATESALONIKA 2:1-8 Abale, inu nomwe mukudziŵa kuti kucheza kuja tidadzacheza kwanuku, kudali kwaphindu. Monga mukudziŵa, paja nthaŵi imene ija nkuti anthu aku Filipi atatizunza kale ndi kutichita chipongwe. Komabe Mulungu wathu adatilimbitsa mtima mpaka tidakulalikirani ndithu Uthenga wake Wabwino, ngakhale ambiri ankatsutsana nafe. Pakuti zimene timalalika sitizilalika chifukwa chofuna kuphunzitsa zonama, kapena kuganiza zoipa, kapena kufuna kunamiza anthu ayi. Koma timalalika chifukwa Mulungu adativomereza natisungitsa Uthenga Wabwino kuti tiulalike. Choncho tikamaphunzitsa sitifuna kukondweretsa anthu, koma timafuna kukondweretsa Mulungu, amene amapenyetsetsa mitima yathu. Monga mukudziŵa, sitidabwere kwanuko ndi mawu oshashalika kapena ndi mtima womangofuna phindu. Apo Mulungu angathe kutichitira umboni. Sitinkafunanso ulemu wochokera kwa anthu, kapena kwa inu, kapena kwa ena, ngakhale kudali kotheka kukulamulani kuti mutithandize, popeza kuti ndife Atumwi a Khristu. Koma tidakhala ofatsa pakati panu ngati mayi wosamalira ana ake. Tinkakukondani, ndipo chifukwa cha kukulakalakani kwambiri, tidatsimikiza zogaŵana nanu osati Uthenga Wabwino wa Mulungu wokha, komanso ngakhale moyo wathu womwe. Mau a Ambuye NYIMBO YA SALIMO: SALIMO 139: 1-3, 4-6 Chauta Mulungu wanga, mwandifufuzafufuza, ndipo mwandidziŵa (1). Chauta, mwandifufuzafufuza, ndipo mwandidziŵa. Inu mumadziŵa pamene ndikhala pansi, pamenenso ndidzuka, Mumazindikira maganizo anga mudakali kutali. Mumandipenyetsetsa ndikamayenda ndiponso ndikamagona, Mumadziŵa njira zanga zonse. *Chauta Mulungu wanga, mwandifufuzafufuza, ndipo mwandidziŵa*. Ngakhale mawu anga asadafike pakamwa panga, Inu Chauta mumaŵadziŵa onse. Mumandizinga kumbuyo ndi kutsogolo, Ndipo mumandisanjika dzanja lanu. Nzeru zimenezi nzopitirira nzeru zanga, Nzapamwamba, sindingathe kuzimvetsa. *Chauta Mulungu wanga, mwandifufuzafufuza, ndipo mwandidziŵa*. *Aleluya*: (_Ntchito 16: 14_) Atate, tsekulani mitima yathu kuti tilandire Mawu a Mwana wanu, Yesu Khristu, *Aleluya*. MTHENGA WA AMBUYE MONGA ADALEMBERA MATEYU WOYERA 23:23-26 Yesu adati: “Muli ndi tsoka, inu aphunzitsi a Malamulo ndi Afarisi, anthu achiphamaso! Mumapereka cha chikhumi cha timbewu tonunkhira, ndi cha timbewu tokometsera chakudya, koma simusamala zazikulu zenizeni pa Malamulo a Mulungu, monga kuweruza molungama, kuchita zachifundo, ndi kukhala okhulupirika. Mukadayenera kuchitadi zimenezi, komabe osasiya zinazo. Inu atsogoleri akhungu, mumakuntha zakumwa zanu kuti muchotsemo kanchenche, koma mumameza ngamira. Muli ndi tsoka, inu aphunzitsi a Malamulo ndi Afarisi, anthu achiphamaso! Mumatsuka kunja kwa chikho ndi kwa mbale, koma mkati mwake ndi modzaza ndi nzeru za kuba, ndi za umbombo. Afarisi akhungu inu, yambani mwatsuka mkati mwa chikho, ndipo kunja kwakenso kudzayera.” Mthenga wa Ambuye