બર્થરાઈટ સિટીઝનશિપ પર અંતિમ ફેંસલાની તૈયારી

અમેરિકાની ધરતી પર જન્મતા દરેક બાળકોને બર્થરાઈટ સિટીઝનશિપ મળશે કે નહીં તે અંગે ફેસલાની ઘડી આવી પહોંચી છે. યુએસમાં રહેતા લાખો અનડોક્યુમેન્ટેડ ઈમિગ્રન્ટ્સ પણ તેની અદ્ધર શ્વાસે રાહ જોઈ રહ્યા છે. જો આ ફેસલો ટ્રમ્પ એડમિનિસ્ટ્રેશનની તરફેણમાં આવ્યો તો તેને ટ્રમ્પની મોટી જીત ગણવામાં આવશે અને જો ચુકાદો સરકારની વિરૂદ્ધમાં અપાયો તો અનડોક્યુમેન્ટેડ ઈમિગ્રન્ટ્સ માટે તે સૌથી મોટી રાહત સાબિત થશે. અમેરિકાની સુપ્રીમ કોર્ટ આ મેટરમાં મહત્વનું જજમેન્ટ આપવાની હવે બસ તૈયારીમાં જ છે, જૂન 30, મંગળવારના દિવસે સર્વોચ્ચ અદાલત આ કેસમાં પોતાનું ફાઈનલ જજમેન્ટ આપી શકે છે. આ મામલો સુપ્રીમ કોર્ટમાં પહોંચ્યો તે પહેલા ફેડરલ કોર્ટ અને પછી અપીલ્સ કોર્ટ પણ સરકારની વિરૂદ્ધમાં ચુકાદા આપી ચૂકી છે જેના કારણે બર્થરાઈટ સિટીઝનશિપ હાલ પણ તેના મૂળ સ્વરૂપે યથાવત છે.