ანი ჩხიკვაძე „იუმორით და თავდადებით“

„ხიდების მშენებლების“ და გურამ როგავას ერთობლივი პროექტის „ბრილიანტი ქართველების“ მორიგ ეპიზოდში ჟურნალისტ, ანი ჩხიკვაძეს წარმოგიდგენთ, რომელიც 13 წელია ვაშინგტონში ცხოვრობს. „ამერიკის ხმის“ ყოფილი თანამშრომელი ამჟამად გეოპოლიტიკასა და ამერიკის საგარეო პოლიტიკაზე წერს სტატიებს ამერიკული და ბრიტანული გამოცემებისთვის. ინტერვიუ ჯორჯთაუნის უნივერსიტეტში ჩავწერეთ, სადაც ანი საერთაშორისო ურთიერთობებს სწავლობდა. „საკითხებს უდგება იუმორით და თავდადებით“, - ასე დაახასიათა „გოგონა ხარაგაულიდან“ ამერიკელმა დიპლომატმა, მადლენ ოლბრაიტმა. ვილაპარაკეთ დემოკრატიის პრინციპებზე და მოვისმინეთ ანალიზი იმის შესახებ, თუ რა ხდება, როცა კონსტიტუციაში ჩაწერილი იდეები მხოლოდ ფურცელზე რჩება და ადამიანის უფლებები სისტემატიურად ირღვევა იმ პარტიის მიერ, რომელმაც ძალაუფლების ყველა შტო დაიმორჩილა. შევთანხმდით, რომ „ძალაუფლება რყვნის, ხოლო აბსოლუტური ძალაუფლება აბსოლუტურად რყვნის“. დავსვით კითხვები, რა შეგვიძლია მოვითხოვოთ ამერიკის შეერთებული შტატებისგან და რას ვთავაზობთ ჩვენ გადაწყვეტილების მიმღებ გავლენიან ფიგურებს ვაშინგტონში.