Lalparzo Sanate | Kon Aam Lua Hi

Taksa kum upat taak ziak bang, damtheihna leh hiselna hoih nawnlouh ziak khawng banga thahat nawnlou, mahni utna leh lunggulhna munte aleng hohzou nawnlou, mahni duhbang nek leh dawn leng nethei nawnlou, dawnthei nawnlou a om tampi te kamuh in Toupa' hon piak damtheihna, hiselna te aam huai lua ahih dan ahon phawthak sak a, Toupa'n amah kianga kipahthu genna la "Kon Aam Lua Hi" chih hon phuaksak hi. Hiai laa ngaikhetu te'n Toupa'n hon piak damna, hatna, hiselna te manpha leh aam huai ahih daan iphawk thak ua, huaite ahon petu Pathian kianga kipah thu igen tamsem theihna ding un Toupa'n hon vualzawl chiat hen. Kon Aam Lua Hi Kon aam lua hi aw ka hatlai ni Ka utna munteng a hohzou a Ka sepnop bangbang teng ka sep zawh lai Kon aam lua hi aw ka hatlai ni Kon aam lua hi aw ka damlai ni Ka muhnop te khempeuh muthei a Ka zaaknop bangbang teng ka zaak theih lai Kon aam lua hi aw ka damlai ni Ka kipak ngei Toupa ka kipak ngei Hinna leh damna non piaklai vang in Toupa, Hatna leh damtheihna na hon piakte Nangmah deih dan bang in hon zang sak aw Kon aam lua hi aw ka noplai ni Ka duh khempeuh te teng nethei a Ka duh khempeuh bangteng ka dawn theih lai Kon aam lua hi aw ka noplai ni Kon aam lua hi aw ka vanglai ni It leh ngaih te teng toh damkhawm a Lawm vual ngaihte teng toh kholhkhawm theih lai Kon aam lua hi aw ka vanglai ni Ka kipak ngei e aw ka kipak ngei Hinna leh damna non piaklai vang in Toupa, noplaini - vanglaini na hon piakte Nangmah deih dan bang in hon zang sak aw Bridge Aam mah zong leng khouh theih hilou damlai ni te Phalkei zong leng hun leh ni’n hon liamsan zungzung Lei a ka damlai ni beima teng in Na deihbang a nuntak dan hon hilh inla Toupa, hinna leh vualzawlna na hon piakte Kisiikna omlou ding in hong zatpih’n aw. Kipahthu: A laa siamtaka hon saksak Unaunu Gladys Lalparzo Sanate tung ah kipahthu ka gen hi.