ပါတီပိုင်ငွေ သိန်း ၂သောင်းကျော် သားဖြစ်သူကို ဦးခင်ရီ လက်သိပ်ထိုးခဲ့

ပါတီပိုင်ငွေ သိန်း ၂သောင်းကျော် သားဖြစ်သူကို ဦးခင်ရီ ဘယ်လိုလက်သိပ်ထိုးပေးခဲ့လဲ …………. အခုနှစ်ကုန်ကျင်းပမယ့် အာဏာသိမ်းစစ်တပ်ရဲ့ အတုအယောင် ရွေးကောက်ပွဲအပြီးမှာ ဒုသမ္မတ ဒါမှမဟုတ် လွှတ်တော်ဥက္ကဋ္ဌ ဖြစ်လာဖို့ ရေပန်းစားနေသူ ပြည်ထောင်စုကြံ့ခိုင်ရေးနဲ့ဖွံ့ဖြိုးရေးပါတီ ဥက္ကဋ္ဌဖြစ်သူ ဦးခင်ရီဟာ ငွေကျပ်ဘီလျံနဲ့ချီတဲ့ ပါတီပိုင်ငွေကြေးတွေကို မိသားစုပိုင်စီးပွားရေးလုပ်ငန်းထဲ စီးဆင်းစေခဲ့တယ်လို့ Myanmar Now က စုံစမ်းသိရှိရပါတယ်။  စစ်တပ်ကျောထောက်နောက်ခံ ကြံ့ခိုင်ရေးပါတီရဲ့ အမြင့်ဆုံးရာထူးကို ရရှိထားသူ လက်ရှိ အသက် ၇၃နှစ်အရွယ် ဗိုလ်မှူးချုပ်ဟောင်း ဦးခင်ရီဟာ ပါတီရုံးပြုပြင်၊ တည်ဆောက်ရေးလုပ်ငန်းတွေအတွက် သားဖြစ်သူပိုင်ဆိုင်တဲ့ ဆောက်လုပ်ရေးကုမ္ပဏီကို လုပ်ပိုင်ခွင့် ချပေးခဲ့တာပါ။  အခုနှစ် မတ်လကုန်ပိုင်းက လှုတ်ခတ်ခဲ့တဲ့ ငလျင်ကြီးကြောင့် ထိခိုက်၊ ပျက်စီးသွားတဲ့ နေပြည်တော်၊ ဒက္ခိဏသီရိမြို့နယ်က ကြံ့ခိုင်ရေးပါတီရုံးချုပ်ကို ‘Empreo’(အမ်ပရီယို) ဆိုတဲ့ ဆောက်လုပ်ရေးကုမ္ပဏီက အခုနှစ် ဩဂုတ်လအတွင်း ပြန်လည်ပြုပြင်ခွင့် ရခဲ့ပါတယ်။  ကြံ့ခိုင်ရေးပါတီရုံးချုပ်ကို ပြင်ခွင့်ရတဲ့ အမ်ပရီယိုဆောက်လုပ်ရေးကုမ္ပဏီဟာ ဦးခင်ရီရဲ့သားဖြစ်သူ ဦးထက်ရန်နိုင်စိုး ပိုင်ဆိုင်ကြောင်းကို ရင်းနှီးမြှုပ်နှံမှုနဲ့ ကုမ္ပဏီများညွှန်ကြားမှုဦးစီးဌာန(DICA) အချက်အလက်တွေမှာ တွေ့ရှိရသလို ပါတီထိပ်သီးခေါင်းဆောင်တွေနဲ့နီးစပ်သူတွေကလည်း မှန်ကန်ကြောင်း အတည်ပြုပါတယ်။ အမ်ပရီယို ဆောက်လုပ်ရေးကုမ္ပဏီဘက်ကလည်း ကြံ့ခိုင်ရေးပါတီရုံးချုပ်ကို သူတို့ကုမ္ပဏီက လုပ်ပိုင်ခွင့်ရထားကြောင်း အတည်ပြုပါတယ်။ ရဲချုပ်ဟောင်းနဲ့ လဝကဝန်ကြီးဟောင်းလည်းဖြစ်တဲ့ ဦးခင်ရီမှာ ခင်မျိုးမြတ်စိုး၊ ထက်ရန်နိုင်စိုးနဲ့ မေဖူးပွင့်စိုး ဆိုတဲ့ သား၊ သမီး ၃ယောက် ရှိပါတယ်။    ဦးထက်ရန်နိုင်စိုးဟာ အမ်ပရီယို အပြင် ရွှေမဟာခေတ်နဲ့ ဇိမ်း(စ်) ဆိုတဲ့ ကုမ္ပဏီတွေကိုလည်း ပိုင်ဆိုင်ပါတယ်။ 'ရွှေမဟာခေတ်' ကုမ္ပဏီမှာတော့ ထက်ရန်နိုင်စိုးအပြင် သူ့ရဲ့အစ်မ ခင်မျိုးမြတ်စိုး၊ ညီမ မေဖူးပွင့်စိုးနဲ့ သူ့ရဲ့ဇနီး ဖူးပွင့်ဝဿန်တို့ကိုလည်း ဒါရိုက်တာစာရင်းထဲမှာ တွေ့ရပါတယ်။ ရွေးကောက်ပွဲအောင်နိုင်ရေးအတွက် ဓာတ်ပုံ၊ ဗီဒီယိုရိုက်ကူးရေးကိစ္စတွေအပြင် ပါတီအင်္ကျီ၊ ဦးထုပ်နဲ့ ရင်ထိုးဖြန့်ဝေရောင်းချရေးလုပ်ငန်းကိုလည်း ဦးခင်ရီက သူ့ရဲ့ကိုယ်ရေးအရာရှိကို နာမည်ခံပြီး လုပ်ပိုင်ခွင့်ပေးထားသလို မြို့နယ်တိုင်းမှာ သူ့ပုံပါတဲ့ဆိုင်းဘုတ်တွေ စိုက်ထူဖို့ ညွှန်ကြားထားတယ်လို့လည်း ပါတီဗဟိုအလုပ်အမှုဆောင်တွေနဲ့ နီးစပ်သူတွေက ပြောပါတယ်။  အခုနှစ်ကုန်ရွေးကောက်ပွဲအလွန်မှာ ဦးခင်ရီမျှော်မှန်းထားတဲ့ ရာထူးကြီးတစ်ခု ရ၊ မရကတော့ စစ်ခေါင်းဆောင်ရဲ့ ဆုံးဖြတ်ချက်ပေါ်မှာသာ မူတည်နေတာပါ။ ကြံ့ခိုင်ရေးပါတီကို ဗဟိုပြုပြီး ကြီးထွားလာတဲ့ ဦးခင်ရီရဲ့ စီးပွားရေးအင်ပါယာအကြောင်း ဒီရုပ်သံမှာ ကြည့်ရှုနိုင်ပါတယ်။ စထွန်းအောင်/ Myanmar Now ------------------------------------------- Myanmar Now ဆက်လက်ရပ်တည်နိုင်ရေးအတွက် လစဥ်ငွေအနည်းငယ်ဖြင့် https://myanmar-now.org/mm/members/ တွင် ကူညီနိုင်ပါသည်။