ထိုင်ခုံတွေလွတ်နေတာပရိသတ်တွေကိုဖီဖာအပြစ်တင်၊ ကမ္ဘာ့ပထမဆုံးထရီလီယံနာအီလွန်မတ်စ်ခ် | People's Spring

ပွဲကြည့်စင်မှာထိုင်ခုံတွေလွတ်နေတာပရိသတ်တွေကြောင့်လို့ ဖီဖာ အကြောင်းပြ\ ဇွန်လ- ၁၃ ၊၂၀၂၆ ။People’s Spring ကမ္ဘာ့ဖလား ပွဲစဉ်တွေမှာ ပွဲကြည့်စင် ခုံနေရာတွေ လွတ်နေတာဟာ ပရိသတ်တွေက သတ်မှတ်နေရာမှာ မထိုင်ကြလို့ဖြစ်ကြောင်း ကမ္ဘာ့ဘောလုံး အဖွဲ့ချုပ် (ဖီဖာ)က ဖြေရှင်းခဲ့ပါတယ်။ ဇွန်လ ၁၂ ရက်နေ့တုန်းက မက္ကဆီကိုနိုင်ငံ၊ ဂွာဒါလာဂျာရာမြို့မှာ ယှဉ်ပြိုင် ကစားခဲ့တဲ့ တောင်ကိုရီးယားနဲ့ ချက်အသင်းတို့ရဲ့ ပွဲစဉ်မှာ ပွဲကြည့်စင်ပေါ်က ခုံနေရာတွေ လူမပြည့်ဘဲ ဖြစ်နေတာကို အတော်ကြီး ထင်ထင်ရှားရှား တွေ့မြင်ခဲ့ရပါတယ်။ အထူးတန်း ပွဲကြည့်စင်ကြီးမှာရော၊ တခြားပွဲကြည့်စင်တွေမှာပါ လူလွတ်နေတဲ့ ထိုင်ခုံတွေ အများကြီးကို ကွက်ကျားကွက်ကျား တွေ့ခဲ့ရတာ ဖြစ်ပါတယ်။ ဒီအခြေအနေက ဖီဖာဟာ လက်မှတ်ရောင်းချမှုတွေကို ကောင်းကောင်း စီမံခန့်ခွဲနိုင်စွမ်း မရှိဘူးလားဆိုတဲ့ ဝေဖန် မေးခွန်းထုတ်မှုတွေကို ထွက်ပေါ်လာစေပါတယ်။ ဒါပေမဲ့ ဖီဖာကတော့ ခုံတွေ လွတ်နေတာဟာ လက်မှတ်ရောင်းအားနဲ့ မသက်ဆိုင်ဘဲ ပရိသတ်တွေက သတ်မှတ်ခုံနေရာကနေ ပွဲမကြည့်ဘဲ အစုလိုက် မတ်တပ်ရပ်ပြီး အားပေးခဲ့တာကြောင့်လို့ တုံ့ပြန်ခဲ့ပါတယ်။ ဂွာဒါလာဂျာရာ အားကစားရုံရဲ့ ပရိသတ် ဝင်ဆံ့မှု အရေအတွက်က ၄၅၆၆၄ ဦးဖြစ်ပြီး အဲဒီနေ့က ပွဲလာကြည့်သူ ၄၄၉၈၅ ဦးထိ ရှိခဲ့ကြောင်း၊ ကွင်းထဲမှာ မြင်ခဲ့ရတဲ့ ထိုင်ခုံလွတ်တွေ ကိစ္စဟာ တကယ်တမ်း ပွဲကြည့်သူ ဦးရေနဲ့ တိုက်ရိုက် ဆက်နွှယ် ပတ်သက်မှု မရှိကြောင်း ဖီဖာက ထုတ်ပြန်ပါတယ်။ အဲဒီပွဲမှာ ပရိသတ်တချို့ဟာ သတ်မှတ်နေရာတွေမှာ မထိုင်ဘဲ ပွဲစဉ်တလျှောက်လုံး လူစုလူဝေးနဲ့ မတ်တပ်ရပ်နေခဲ့ကြတာကို ထည့်စဉ်းစားဖို့ လိုတယ်လို့လည်း ဖီဖာက ဆိုပါတယ်။ ကနေဒါနိုင်ငံ တိုရန်တိုမြို့မှာ ယှဉ်ပြိုင်ကစားခဲ့တဲ့ ကနေဒါနဲ့ ဘော့စ်နီးယား ပွဲစဉ်မှာလည်း ခုံအလွတ်တွေကို မြင်ခဲ့ရပါတယ်။ ဒါပေမဲ့ ဖီဖာရဲ့ စာရင်းအရ အဲဒီပွဲမှာလည်း ပရိသတ်က ရုံအပြည့်နီးပါး လာရောက် ကြည့်ရှု အားပေးခဲ့တယ်လို့ သိရပါတယ်။ BMO Field အားကစားရုံရဲ့ ပရိသတ် ဝင်ဆံ့အရေအတွက်က ၄၃၀၃၆ ဦးဖြစ်ပြီး ပွဲကြည့်သူ ၄၃၀၀၂ ဦး ရှိခဲ့တယ်လို့ ဖီဖာက ထုတ်ပြန်ပါတယ်။ ကမ္ဘာ့ဖလား ပြိုင်ပွဲတွေမှာ ထိုင်ခုံနေရာ အလွတ်တွေ များနေတာဟာ လက်မှတ်စျေးတွေ မတန်တဆ ကြီးနေလို့ဆိုတဲ့ ဝေဖန်စွပ်စွဲမှုတွေ ရှိနေတဲ့အပေါ် ဖီဖာက အခုလို တုံ့ပြန်နေတာ ဖြစ်ပါတယ်။ ===== ကမ္ဘာ့ပထမဆုံး ထရီလီယံနာ ဖြစ်လာတဲ့ အီလွန်မတ်စ်ခ် ဇွန်လ- ၁၃ ၊၂၀၂၆ ။People’s Spring ကမ္ဘာ့သမိုင်းမှာ ပထမဆုံး ထရီလီယံနာအဆင့် ကြွယ်ဝသူအဖြစ် အီလွန်မတ်စ်ခ်က စံချိန်မှတ်တမ်း ရေးထိုးနိုင်ခဲ့ပါတယ်။ သူ့ရဲ့ အာကာသ ခရီးသွား ဒုံးပျံနည်းပညာ ကုမ္ပဏီ SpaceX ရှယ်ယာတွေ တန်ဖိုး မြင့်တက်သွားခြင်းကြောင့် မတ်စ်ခ်ပိုင်ဆိုင်တဲ့ ကြွယ်ဝမှု တန်ဖိုးကလည်း ထိုးတက်သွားပါတယ်။ အကျိုးဆက်အဖြစ် ဇွန်လ ၁၂ ရက်နေ့မှာ သူဟာ စုစုပေါင်း ကြွယ်ဝမှု ဒေါ်လာ ၁.၁၁ ထရီလီယံကို ရောက်ရှိသွားခဲ့ပါတယ်။ တစ်ထရီလီယံဆိုတဲ့ တန်ဖိုးဟာ အမေရိကန်ဒေါ်လာ သန်းပေါင်း တစ်သန်း ဖြစ်ပါတယ်။ အဲဒီ ကြွယ်ဝမှု တန်ဖိုးကိုတော့ Bloomberg သတင်းဌာနက အစဉ်တစိုက် ဆန်းစစ်လေ့လာပြီး သတ်မှတ်ပေးတာ ဖြစ်ပါတယ်။ ဇွန်လ ၁၂ ရက်နေ့တုန်းက ဒုံးပျံ၊ ဆယ်သွယ်ရေးနဲ့ ဉာဏ်ရည်တု (AI) နည်းပညာ ကုမ္ပဏီကြီး SpaceXဟာ Nasdaqမှာ ဒေါ်လာ ၂.၂ ထရီလီယံ တန်ဖိုးသတ်မှတ်ခံရပြီး ရှယ်ယာတစ်ခု စျေးကို ၁၃၅ ဒေါ်လာလို့ သတ်မှတ်ခဲ့ပါတယ်။ ဒါပေမဲ့ စျေးကွက် စဖွင့်ချိန်မှာ ဒေါ်လာ ၁၅၀ ဖြစ်နေခဲ့ပြီး အချိန်တို တစ်ခုစာလောက်မှာ ၁၇၆.၅ ဒေါ်လာထိ မြင့်တက်သွားပါသေးတယ်။ ညပိုင်းအချိန် ပိတ်သိမ်းချိန်မှာတော့ ရှယ်ယာတန်ဖိုးက ၁၆၁ ဒေါ်လာ ဖြစ်နေပါတယ်။ ဒီအချက်က မတ်စ်ခ်နဲ့ ဆက်နွှယ်နေတဲ့ အာကာသ နည်းပညာ လုပ်ငန်းစုကြီးမှာ ပါဝင်မြှုပ်နှံဖို့အတွက် ရှယ်ယာရှင်တွေက အထူး စိတ်လှုပ်ရှား တက်ကြွနေတယ် ဆိုတာကို ညွှန်ပြနေတာပါပဲ။ မတ်စ်ခ်ဟာ SpaceXရဲ့ ရှယ်ယာ ၄၂ ရာခိုင်နှုန်းကို ပိုင်ဆိုင်ထားပါတယ်။ သူ့ရဲ့ ရှယ်ယာတန်ဖိုး စုစုပေါင်း ပိုင်ဆိုင်မှုကတင် ဒေါ်လာ ၇၆၇.၁ ဘီလီယံဖိုးလောက် ရှိနေတယ်လို့ Bloombergက ဆိုပါတယ်။ 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #FIFAWorldCup2026 #WorldCup2026 #FIFA #FootballNews #Soccer #Guadalajara #Toronto #WorldCupTickets #PeoplesSpring #SportsNews #ကမ္ဘာ့ဖလား၂၀၂၆ #ဖီဖာ #ဘောလုံးသတင်း #အားကစားသတင်း #ပွဲကြည့်စင်ထိုင်ခုံ #ဘောလုံး #ကမ္ဘာ့ဖလားလက်မှတ် #ElonMusk #Trillionaire #SpaceX #Tesla #X #BreakingNews #Wealth #Success #Bloomberg #Technology #အီလွန်မတ်စ်ခ် #ထရီလီယံနာ #ကမ္ဘာ့အချမ်းသာဆုံး #နည်းပညာ #ပြည်သူ့နွေဦး #စီးပွားရေးသတင်း #စပေ့အက်စ် #တက်စလာ