ကမ္ဘာ့ဖလားပြိုင်ပွဲကြီး စတင်ပါပြီ ၊ဒရုန်းလွှတ်မှုနဲ့ထောင်နှစ် ၃၀ချခံရတဲ့တောင်ကိုရီးယားသမ္မတ

ကမ္ဘာ့ဖလား ပြိုင်ပွဲကြီး စတင်ဖွင့်လှစ် ဇွန်လ- ၁၂ ၊၂၀၂၆ ။People’s Spring အခုနှစ် ကမ္ဘာ့ဖလား ဘောလုံးပြိုင်ပွဲကြီးရဲ့ ပထမဆုံး ဖွင့်ပွဲ အစီအစဉ်တွေကို မက္ကဆီကို နိုင်ငံမှာ ကျင်းပသွားခဲ့ပါတယ်။ အခုနှစ် ကမ္ဘာ့ဖလားကို မက္ကဆီကို၊ ကနေဒါနဲ့ အမေရိကန်တို့က ပူးတွဲအိမ်ရှင်အဖြစ် လက်ခံကျင်းပပြီး ဖွင့်ပွဲ အခမ်းအနားတွေကိုလည်း နိုင်ငံသုံးခုမှာ သီးခြားစီ စီစဉ်ထားပါတယ်။ ဇွန်လ ၁၁ ရက်နေ့မှာတော့ မက္ကဆီကိုစီးတီး မြို့တော်ရဲ့ အစဉ်အလာ ကြီးမားတဲ့ အက်ဇ်တက်ကာ အားကစားကွင်းကြီးမှာ ပထမဆုံး ဖွင့်ပွဲ အစီအစဉ်ကို စည်စည်ကားကား၊ မြူးမြူးကြွကြွနဲ့ ပြုလုပ်သွားခဲ့တာပါ။ နှစ်ပေါင်း ၄၀ ကြာပြီးမှ တကျော့ပြန် ကျင်းပခွင့် ရလာတဲ့ ကမ္ဘာ့ဖလား ပြိုင်ပွဲကြီးကို မက္ကဆီကို ဘောလုံး ပရိသတ်တွေက စိတ်လှုပ်ရှားခြင်း ကြီးစွာနဲ့ ကြိုဆိုခဲ့ကြပါတယ်။ ကမ္ဘာ့ဖလား မတိုင်ခင်တုန်းက မက္ကဆီကို စီးတီးမှာ လုပ်ခလစာ တိုးမြှင့် ရရှိလိုတဲ့ ပညာရေး ဝန်ထမ်းတွေရဲ့ ဆန္ဒပြပွဲတွေ ဖြစ်ပေါ်နေခဲ့တာကြောင့် လုံခြုံရေးအတွက် စိုးရိမ်မှုတွေ ရှိခဲ့ပေမယ့်လည်း ဖွင့်ပွဲ အစီအစဉ်တွေက ချောချောမောမော ဖြစ်ခဲ့ပါတယ်။ မြို့ထဲမှာ နေရာကွက်ကြား ဆန္ဒပြမှုတချို့ ပေါ်ပေါက်ခဲ့ပေမယ့် ပြောပလောက်အောင်တော့ မဟုတ်ပါဘူး။ ဒါပေမဲ့ ဆန္ဒပြသူတွေနဲ့ ရဲတွေ နည်းနည်း ပဋိပက္ခဖြစ်လို့ အက်ဇ်တက်ကာ ကွင်းကြီးနားက မြေအောက်ရထား ဘူတာကို ယာယီ ပိတ်ခဲ့ရပါသေးတယ်။ သွေးဆိုးပြီး သောင်းကျန်းချင်တဲ့ ဆန္ဒပြသူ အစုအဖွဲ့ နှစ်ခုလောက်ကို ကိုင်တွယ် ထိန်းသိမ်းနိုင်ခဲ့ကြောင်း မက္ကဆီကို ရဲတပ်ဖွဲ့က ပြောပါတယ်။ တစ်ချိန်တည်းမှာပဲ ၂၀၁၄ ခုနှစ်တုန်းက မူးယစ်မှောင်ခို ဂိုဏ်းတွေရဲ့ ပဋိပက္ခတွေအတွင်း ပြန်ပေးဆွဲ ခံရပြီး ပျောက်ဆုံးသွားတဲ့ ကျောင်းသား ၄၀ ရဲ့ မိဘတွေနဲ့ ဆရာ ဆရာမတွေကလည်း ကလေးတွေကို ပြန်လည်ရှာဖွေရေး ပိုမို အားစိုက်ပေးဖို့ ချီတက် တောင်းဆိုခဲ့ပါတယ်။ ဒါဟာ ကမ္ဘာပေါ်မှာ အကြီးကျယ်ဆုံး ဘောလုံးပြိုင်ပွဲကြီး ကျင်းပချိန် ကာလအတွင်း သူတို့ရဲ့ လိုလားမှုကို နိုင်ငံတကာက ပိုမို အာရုံစိုက်လာစေဖို့ ရည်ရွယ်တဲ့ လှုပ်ရှားမှုလည်း ဖြစ်ပါတယ်။ ===== မြောက်ကိုရီးယားဆီ ဒရုန်းတွေ လွှတ်စေခဲ့လို့ တောင်ကိုရီးယား သမ္မတဟောင်း ထောင်နှစ် ၃၀ ကျ ဇွန်လ- ၁၂ ၊၂၀၂၆ ။People’s Spring မြောက်ကိုရီးယားနဲ့ တင်းမာမှုတွေ မြင့်တက်စေမယ့် ဒရုန်းစေလွှတ်မှုတွေအတွက် တောင်ကိုရီးယား သမ္မတဟောင်း ယွန်ဆွတ်ယောဟာ ထောင်ဒဏ် နှစ် ၃၀ ချမှတ် ခံခဲ့ရပါတယ်။ သူဟာ တောင်ကိုရီးယားမှာ ၂၀၂၄ ခုနှစ်၊ ဒီဇင်ဘာ ၃ ရက်နေ့တုန်းက ရုတ်တရက် စစ်အုပ်ချုပ်ရေးအမိန့် ကြေညာခဲ့တဲ့ အစီအစဉ်ရဲ့ ကြိုတင် ပြင်ဆင်မှု အနေနဲ့ အဲဒီလို ဒရုန်းတွေ စေလွှတ်မှုကို ရည်ရွယ်ချက်ရှိရှိ လုပ်ဆောင်ခဲ့တာလို့ အစိုးရ ရှေ့နေတွေက စွပ်စွဲခဲ့ပါတယ်။ အဲဒီနှစ် အောက်တိုဘာလတုန်းက တောင်ကိုရီးယား ဒရုန်းတွေဟာ လေပိုင်နက် ကျူးကျော် ပျံသန်းခဲ့တဲ့အပြင် မြောက်ကိုရီးယား ဆန့်ကျင်ရေး ဝါဒဖြန့် လက်ကမ်းစာစောင်တွေပါ ကြဲချခဲ့ကြောင်း မြောက်ကိုရီးယားက စွပ်စွဲပါတယ်။ အကျိုးဆက် အနေနဲ့ ကိုရီးယား ကျွန်းဆွယ်မှာရှိတဲ့ ပြိုင်ဘက် နှစ်နိုင်ငံကြား စစ်ရေး တင်းမာမှုတွေ မြင့်တက်လာခဲ့ပါတယ်။ နောက်ပိုင်းမှာတော့ ယွန်ရဲ့ စစ်အုပ်ချုပ်ရေးအမိန့် ကြေညာမှုက မအောင်မြင်ခဲ့သလို သူလည်း ရာထူးကနေ ဖယ်ရှားခံရပြီး အမှုတွေ တသီတတန်းကြီးနဲ့ ရင်ဆိုင်ခဲ့ရပါတယ်။ သူဟာ နိုင်ငံတော် ပုန်ကန်မှု၊ အာဏာအလွဲသုံးစားမှု စွပ်စွဲချက်တွေအတွက် ထောင်ဒဏ်တစ်သက် စီရင်ချက်ကို ဖေဖော်ဝါရီ ၁၉ ရက်နေ့က ချမှတ် ခံခဲ့ရပြီးသားပါ။ ဇွန်လ ၁၂ ရက်နေ့ တရားခွင်မှာတော့ ယွန်ဟာ သူ့ရဲ့ အကြံအစည် အထမြောက်စေဖို့အတွက် စစ်ပွဲကာလ အနေအထားမျိုးဖြစ်အောင် ရည်ရွယ်ချက်ရှိရှိ လုပ်ကြံ ဖန်တီးခဲ့ကြောင်း ပြစ်မှု ထင်ရှားတဲ့အတွက် ထောင်ဒဏ် နှစ် ၃၀ ထပ်မံချမှတ် ခံလိုက်ရတာ ဖြစ်ပါတယ်။ ယွန်က လွှတ်တော်ထဲမှာ မြောက်ကိုရီးယား သူလျှိုတွေ ရောက်ရှိနေပြီလို့ စွပ်စွဲပြီး အရေးပေါ် စစ်အုပ်ချုပ်ရေးအမိန့် ကြေညာခဲ့တာပါ။ ဒါပေမဲ့ လူထုနဲ့ လွှတ်တော် အမတ်တွေဆီက အပြင်းအထန် ကန့်ကွက်မှုကြောင့် နာရီပိုင်း အကြာမှာပဲ ပျက်ပြယ်ခဲ့ပါတယ်။ ယွန်ရဲ့ အမိန့်ကြောင့် မြောက်ကိုရီးယားကို ဒရုန်းတွေ စေလွှတ်ခဲ့တဲ့ လုပ်ရပ်ဟာ နှစ်နိုင်ငံ ဆက်ဆံရေးကို ပိုမို တင်းမာစေခဲ့ရုံသာ မကဘဲ တောင်ကိုရီးယား ဒရုန်းတွေရဲ့ စွမ်းဆောင်ရည် အပါအဝင် စစ်ရေး လျှို့ဝှက်ချက်တွေကို ပေါက်ကြားစေခဲ့ကြောင်း အစိုးရ ရှေ့နေတွေက စွပ်စွဲခဲ့ပါတယ်။ 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #WorldCup2026 #FIFAWorldCup #Mexico2026 #AztecaStadium #OpeningCeremony #FootballNews #Shakira #WorldCupOpening #Soccer #ကမ္ဘာ့ဖလား၂၀၂၆ #ဘောလုံး #ကမ္ဘာ့ဖလားဖွင့်ပွဲ #မက္ကဆီကို #အားကစားသတင်း #ရှာကီရာ #ဘောလုံးပွဲ #YoonSukYeol #SouthKorea #NorthKorea #DroneCrisis #PoliticalNews #SouthKoreaPolitics #BreakingNews #InternationalNews #PeoplesSpring #LegalJustice #ယွန်ဆွတ်ယော #တောင်ကိုရီးယား #မြောက်ကိုရီးယား #ဒရုန်း #နိုင်ငံရေးသတင်း #ကမ္ဘာ့သတင်း #ထောင်ဒဏ်နှစ်၃၀