SERIKALI KUIMARISHA SEKTA YA SHERIA NA HAKI ZANZIBAR; ZAIDI YA BILIONI 13.6 ZAWEKEZWA

Makamu wa Pili wa Rais wa Zanzibar, Mhe. Hemed Suleiman Abdulla, amesema Serikali ya Mapinduzi ya Zanzibar itaendelea kuimarisha sekta ya sheria na haki ili kuhakikisha wananchi wanapata huduma za haki kwa wakati, usawa na uwazi. Akizungumza katika maadhimisho ya miaka 24 ya kuanzishwa kwa Ofisi ya Mkurugenzi wa Mashtaka Zanzibar (DPP) yaliyofanyika Hoteli ya Madinat Al Bahr, Chukwani, amesema Serikali imetenga zaidi ya shilingi bilioni 13.6 katika mwaka wa fedha 2025/2026 kwa ajili ya kuboresha mahakama, mifumo ya TEHAMA na huduma nyingine muhimu zinazolenga kuongeza ufanisi wa utoaji haki. Mhe. Hemed amesema mafanikio ya mfumo wa haki jinai yanatokana na ushirikiano wa taasisi mbalimbali ikiwemo Mahakama, Jeshi la Polisi, Ofisi ya Mkurugenzi wa Mashtaka, TAKUKURU pamoja na wadau wengine wa sekta ya sheria. Aidha, ameipongeza Ofisi ya DPP kwa kuanzisha mfumo wa kidijitali wa "Ongea na DPP", uliorahisisha mawasiliano kati ya wananchi na taasisi hiyo. Kwa upande wake, Waziri wa Nchi, Ofisi ya Rais, Katiba, Sheria, Utumishi na Utawala Bora, Mhe. Haruna Ali Suleiman, amesisitiza umuhimu wa kuimarisha ushirikiano wa taasisi katika mapambano dhidi ya dawa za kulevya. Naye Mkurugenzi wa Mashtaka Zanzibar, Ndugu Mgeni Jailani Jecha, amesema ofisi hiyo itaendelea kusimamia utekelezaji wa sheria kwa kuzingatia haki, usawa na maslahi ya wananchi. #Zanzibar #DPPZanzibar #Haki #Sheria #UtawalaBora #HemedSuleiman #ASAMOnlineTV #TrendingNow