2026 July 19th -MM- ரோமர் 15:25 - Romans 15:25

WCF MM(World Christian Fellowship Maalai Manna) ரோமர் 15:25 - "இப்பொழுதோ பரிசுத்தவான்களுக்கு உதவிசெய்யும்பொருட்டு நான் எருசலேமுக்குப் பிரயாணமாயிருக்கிறேன்." 1. அப்போஸ்தலனாகிய பவுல் கொரிந்து சபையிலிருந்து இந்தக் கடிதத்தை எழுதுகிறார். அவர் இப்போது எருசலேமுக்குச் செல்லத் திட்டமிட்டுள்ளார். ஏனெனில் எருசலேமில் கொடிய பஞ்சத்தினால் பரிசுத்தவான்கள் கஷ்டத்தில் இருந்தனர், அவர்களுக்கு உதவி செய்வதற்காகப் புறஜாதியாருடைய சபைகளிலிருந்து காணிக்கையைச் சேகரித்தார். 2. எருசலேமில் உள்ள யூதர்களுக்கு உதவி செய்யப் புறஜாதியாரிடம் இருந்து பவுல் காணிக்கை வாங்கினார். புறஜாதியாரும் யூதர்களும் கிறிஸ்துவுக்குள் ஒன்று என்கிற உண்மையை மிகத் தெளிவாக வெளிப்படுத்துவதே அவருடைய நோக்கமாய் இருந்தது. 3. மக்கதோனியா சபையினர் தங்கள் திராணிக்கும் அதிகமாக உதவி செய்ததை 2 கொரிந்தியர் 8:1-5 வசனங்களில் பார்க்கிறோம். அதேபோல் அகாயா மற்றும் கொரிந்து சபைகளும் (2 கொரிந்தியர் 9:1-5), கலாத்தியா தேசத்துச் சபைகளும் (1 கொரிந்தியர் 16:1) ஏற்கனவே இதற்காகப் பணத்தைச் சேர்த்து வைத்திருந்தனர். 4. பவுல் தான் ஸ்பெயின் தேசத்திற்குச் செல்ல வேண்டும் என்கிற விருப்பத்தைக் கொண்டிருந்தாலும், அதற்கு முன்பாக எருசலேமில் உள்ள மக்களின் அவசரத் தேவையையும், அவர்களுக்கு உதவி செய்ய வேண்டியதன் அவசியத்தையும் உணர்ந்து எருசலேம் நோக்கிப் புறப்பட்டார். 5. புறஜாதி சபைகள் கொடுத்த இந்தத் தர்மப் பணத்தை எருசலேமுக்குக் கொண்டு போய்க் கொடுப்பதன் மூலம், தன் அழைப்பைத் தெளிவாகத் தெரிந்து அதற்கு எப்படி கீழ்ப்படிதலோடு செயல்படுகிறார் என்பதை இங்கே விளக்குகிறார். 6. எருசலேமில் உள்ள பரிசுத்தவான்கள் பஞ்சத்தில் இருந்த அந்த இக்கட்டான காலகட்டத்தில் அவர்களுக்கு உதவி செய்வது பவுலின் முக்கிய கடமையாக இருந்தது. அங்கிருந்து திரும்பும் வழியில் உரோமைக்கு வருவதாக அவர் உறுதி அளிக்கிறார். நம் அன்றாட வாழ்வில் இந்த வசனத்தை எவ்வாறு பயன்படுத்துவது: 1. உங்கள் கண்களுக்கு முன்பாக எது அவசியமான காரியமாக இருக்கிறதோ, முதலில் அதைச் செய்துவிட்டு அதற்குப் பின்பாக மற்ற காரியங்களைச் செய்யுங்கள். ஸ்பெயினுக்குப் போக வேண்டும் என்பது பவுலின் திட்டமாக இருந்தாலும், காணிக்கையை எருசலேமுக்குக் கொடுப்பதையே அவர் முதன்மையாகக் கருதினார். 2. அவர் எந்தக் குறுக்கு வழியையும் (shortcut) கையாளவில்லை. "யாராவது இதைக் கொண்டு போய் கொடுங்கள், நான் என் தரிசனமான ஸ்பெயினுக்குப் போகிறேன்" என்று அவர் சொல்லவில்லை. நமக்குள் ஒரு ஒழுக்கம் (discipline) இருப்பது மிகவும் அவசியம். 3. கர்த்தர் உங்களை எதற்காக அழைத்திருக்கிறாரோ, உங்கள் கண்களுக்கு முன்பாக எதை அவசியமா செய்ய வேண்டிய காரியம் என்று வைத்திருக்கிறாரோ, அதை நீங்கள் நிச்சயமாகச் செய்ய வேண்டும். 4. ஒருவேளை இப்போது நீங்கள் செய்கிற ஊழியம் கவர்ச்சிகரமானதாக இல்லாமல் இருக்கலாம், மற்றவர்கள் அதைப் பாராட்டாமல் இருக்கலாம் அல்லது உங்கள் அழைப்பில் இது ஒரு சுற்றுப்பாதையாகத் தெரியலாம். ஆனால் அதைப் பற்றிக் கவலைப்படாதீர்கள். 5. கர்த்தருடைய வார்த்தைக்கு நீங்கள் உண்மையுள்ளவர்களாய் இருக்க வேண்டும். இன்று நீங்கள் செய்கிற அந்தச் சின்னக் காரியத்தில் உண்மையாக இருந்தால், அது உங்களை எதிர்காலத்திற்காகக் கர்த்தர் எதை ஆயத்தம் பண்ணி வைத்திருக்கிறாரோ அந்த இடத்திற்குக் கொண்டு போய் சேர்க்கும். 6. இன்று நம்மிடம் உண்மைத்தன்மை இல்லை என்றால், கர்த்தர் நமக்காக வைத்திருக்கிற எதிர்கால நோக்கத்திற்குள் நாம் செல்ல முடியாது. தற்போதைய பாதையில் உண்மையாக நடக்கும்போது, தேவன் உங்களுக்காக ஆயத்தம் பண்ணி வைத்திருக்கிற காரியங்களில் நீங்கள் நிச்சயமாகப் பிரவேசிப்பீர்கள். ஜெபம்: வல்ல பிதாவே, எங்கள் கண்களுக்கு முன்பாக அவசியமான காரியம் எதைக் கொடுத்திருக்கிறீர்களோ, அதை நாங்கள் உண்மையாய் செய்ய எங்களை ஒப்புக்கொடுக்கிறோம். நாங்கள் இன்றைக்கு எங்களுடைய அழைப்பிற்கு உண்மையாய் இருக்கும்போது, எதிர்காலத்திற்கு எங்களுக்கென்று நீர் ஆயத்தம் பண்ணி வைத்திருக்கிற பாதையில் நடப்போம் என்று உறுதியாக நம்புகிறோம். இயேசு கிறிஸ்துவின் மூலம் பிதாவே, ஆமென். Bible verse by verse by Bro. Abraham David John, World Tamil Christian Fellowship, London, United Kingdom. For more information please log on to www.wcflondon.com Tamil Bible Audio:    / @tamilaudiobible5727   WCF:    / @worldtamilchristianfellowship