2026 July 13th -MM- ரோமர் 15:19 - Romans 15:19

WCF MM(World Christian Fellowship Maalai Manna) *ரோமர் 15:19 - "இப்படி எருசலேம் துவக்கிச் சுற்றிலும் இல்லிரிக்கம் தேசம்வரைக்கும் கிறிஸ்துவின் சுவிசேஷத்தைப் பூரணமாய்ப் பிரசங்கித்திருக்கிறேன்."* 1. அப்போஸ்தலனாகிய பவுல் தனது மிஷனரி பயணத்தில் எங்கெல்லாம் சென்றார் என்பதை நாம் புரிந்து கொள்ள வேண்டும். அவர் எருசலேமில் தொடங்கி அந்தியோக்கியா சென்றார்; அங்கிருந்து ஆசியா மைனர் என்று சொல்லக்கூடிய எபேசு பகுதிக்கும், பின் அங்கிருந்து மக்கதோனியா, கிரேக்கம் மற்றும் இல்லிரிக்கம் வரை சென்றார். இந்தப் பிரயாணத்தின் மொத்த தூரம் ஏறக்குறைய ஆயிரத்து நானூறு மைல்கள், அதாவது இரண்டாயிரத்து கிலோமீட்டருக்கும் மேலாகும். 2. இந்தப் பயணங்களை அவர் நடந்து அல்லது கப்பல் மூலமாக மேற்கொண்டார். ஒவ்வொரு ஊரிலும் அவர் பயங்கரமான அடிகளையும், சிறைச்சாலையையும், கப்பற் சேதங்களையும் சந்தித்தார். சுமார் இருபது வருடங்கள் அவர் இந்த அப்போஸ்தல ஊழியத்தைச் செய்தார். மூன்று முறை மிஷனரி பிரயாணங்களை மேற்கொண்டார். ரோமாபுரி தேசத்தின் ராஜ்யம் முழுவதும் சுவிசேஷம் செல்ல வேண்டும் என்பதே அவருடைய நோக்கமாக இருந்தது. 3. பவுல் தன்னைப் பற்றிப் பெருமை பேச இதைக் கூறவில்லை. ஒரு மனிதன் கிறிஸ்துவுக்கென்று தன்னை ஒப்புக்கொடுக்கும்போது, அவர் மூலமாக கிறிஸ்து எவ்வளவு பெரிய காரியங்களைச் செய்கிறார் என்பதைக் காட்டவே இதைச் சொல்கிறார். பவுல் அனுபவித்த பாடுகளைப் பற்றி நாம் விரிவாக அறிய 2 கொரிந்தியர் 11:23-28 வரையுள்ள வசனங்களைப் பார்க்கும்போது அவர் எவ்வளவு பாடுபட்டார் என்பதைப் புரிந்து கொள்ள முடியும். 4. "சுவிசேஷத்தைப் பூரணமாய்ப் பிரசங்கித்திருக்கிறேன்" என்று பவுல் சொல்லும்போது, தனக்குக் கொடுக்கப்பட்ட தரிசனத்தையும் ஊழியத்தையும் அவர் முழுமையாகச் செய்து முடித்தார் என்று அர்த்தம். அந்த தேசத்திலுள்ள ஒவ்வொரு தனிமனிதனையும் அவர் சந்தித்துவிட்டார் என்பதல்ல, மாறாகத் தனக்குக் கொடுக்கப்பட்ட எல்லாவற்றையும் ஒரு மிஷனரி பார்வையோடு, பரிசுத்த ஆவியானவரின் உதவியோடு செய்து, சபைகளை நிறுவி முடித்தார் என்பதாகும். ஒரு மனிதன் தேவனுக்குத் தன்னை முழுமையாக ஒப்படைக்கும்போது கர்த்தர் அவனைக் கொண்டு செய்யும் காரியம் எவ்வளவு அழகாக இருக்கிறது என்பதை நாம் இங்கே பார்க்கிறோம். நம் அன்றாட வாழ்வில் இந்த வசனத்தை எவ்வாறு பயன்படுத்துவது: 1. ஒரு மனுஷனுடைய கீழ்ப்படிதலுக்கு உதாரணமாய் அகஸ்டின் ஜெபகுமார் அண்ணனை நாம் பார்க்கலாம். தென் தமிழ்நாட்டில் பிறந்த அவர், சென்னையில் வேலை பார்த்துக்கொண்டிருந்தபோது கர்த்தருடைய அழைப்பை ஏற்றுப் பீகாருக்குச் சென்றார். அவருக்குப் பாஷை தெரியாது, யாரையும் தெரியாது, ஆனால் கர்த்தர் சொன்னார் என்ற ஒரே காரணத்திற்காகக் கீழ்ப்படிந்து சென்றார். 2. இன்றைக்கு ஐம்பது வருடங்களுக்கு மேலாகிறது. "மிஷனரிகளின் கல்லறைத் தோட்டம்" என்று சொல்லப்பட்ட அந்தத் தேசத்தில், கர்த்தர் அவரைக்கொண்டு செய்த ஊழியத்தால் மூவாயிரத்திற்கும் மேற்பட்ட மிஷனரிகள் எழும்பியுள்ளனர். சுவிசேஷத்தின் மூலமாய் ஆயிரக்கணக்கான மக்கள் இரட்சிப்பிற்குள் வர கர்த்தர் வழி செய்தார். ஒருவருடைய கீழ்ப்படிதல் எவ்வளவு பெரிய மாற்றத்தைக் கொண்டு வரும் என்பதற்கு இதுவே சாட்சி. 3. பவுலுக்குக் கொடுக்கப்பட்ட பகுதி மிகப் பெரியது, அதை அவர் நேர்த்தியாகச் செய்து முடித்தார். அதுபோலவே, கர்த்தர் இன்று உங்களுக்கும் ஒரு இடத்தைக் கொடுத்திருக்கிறார். அது உங்கள் வீடாகவோ, உங்கள் தெருவாகவோ, உங்கள் வேலைத்தளமாகவோ, நண்பர்கள் வட்டமாகவோ அல்லது உங்கள் அண்டை வீடாகவோ இருக்கலாம். 4. நமக்குக் கொடுக்கப்பட்ட சிறிய பகுதியிலும் நாம் உண்மையுள்ள சாட்சிகளாய் இருந்து கர்த்தருக்குக் கீழ்ப்படியும்போது, பரிசுத்த ஆவியானவர் நம்மைப் பலப்படுத்தி அந்த இடத்திலே நம்மை உபயோகப்படுத்துவார். உங்கள் "எருசலேம் முதல் இல்லிரிக்கம் வரை" என்று சொல்லப்படும் உங்கள் எல்லைக்குள் நீங்கள் உண்மையுள்ளவர்களாய் இருப்பீர்களா? ஜெபம்: வல்ல பிதாவே, இதோ அப்போஸ்தலனாகிய பவுல் செய்தது போல எங்களுக்கு நீர் என்ன பகுதியை வைத்திருக்கிறீரோ, அந்தப் பகுதியிலே நாங்கள் உண்மையுள்ளவர்களாய் உமக்குச் சாட்சியாய் சுவிசேஷத்தை அறிவிக்கிறவர்களாய் வாழ எங்களை முழுமையாய் ஒப்புக்கொடுக்கிறோம். மீட்பரும் இரட்சகருமாகிய இயேசு கிறிஸ்துவின் மூலம் பிதாவே, ஆமென். Bible verse by verse by Bro. Abraham David John, World Tamil Christian Fellowship, London, United Kingdom. For more information please log on to www.wcflondon.com Tamil Bible Audio:    / @tamilaudiobible5727   WCF:    / @worldtamilchristianfellowship