Էթնիկ Գույներ․ Արտաշար

Դեպի Արտաշար մեր վերջին այցից անցել է 2 տարի, այս անգամ մեր ճանապարհը կրկին ուղղվեց դեպի Արմավիրի մարզի ամենահին բնակավայրերից մեկը՝ հասկանալու ինչպիսի՞ վիճակ է այսօր։ 2 տարի առաջ Արտաշարաում պատկերը, մեղմ ասած, հուսադրող չէր։ Այս անգամ Արտաշարում կյանքի որակի բարելավման մասին կարծիքները հակասական են՝ մեկի համար դրական փոփոխությունների ալիքը շոշափելի է, մեկի համար՝ խնդիրները դեռ տեսանելի լուծումներ չեն ստանում։ Մեզ հետ զրույցում բնակիչներից մեկը ուրախությամբ նշում է, որ ժամանակին գյուղից արտագաղթած մարդիկ ցանկանում են վերադառնալ, մյուս կողմից էլ ասում են՝ եթե կարողանան մարդիկ գնալ գյուղից, կգնան։ Ի դեպ գյուղում բնակչության կազմը նույնն է՝ հավասար թվով հայ և եզդի ընտանիքներ, ովքեր դարերով ապրում են միասին՝ հարգելով մեկը մյուսի հավատքն ու ավանդույթները։ Գյուղի հայ բնակիչները քաջ ծանոթ են իրենց հարևան եզդիների պատմությանը և կրոնական առանձնահատկություններին։ Կատակում են՝ էստեղ եզդիերեն չիմացող հայ չկա։