Mkuu wa Shule Dar achunguzwa madai ya udhalilishaji wanafunzi

Baadhi ya wanafunzi wa kike katika shule ya Sekondari Makumbusho wamelalamikia vitendo vya kunyanyaswa kingono na Mwalimu Mkuu wa shule hiyo Juma Mulindani. Malalamiko hayo yaliyosababisha wanafunzi wanne wa kike kuacha shule, yameungwa mkono na baadhi ya wazazi waliokiri kupokea malalamiko kutoka kwa watoto wao huku mwingine akiamua kumhamisha bintiye shule. Uchunguzi uliofanywa na Mwananchi kwa siku kadhaa, umebaini wanafunzi hao wamekuwa wakiitwa katika ofisi ya mwalimu huyo na kufanyiwa vitendo vya udhalilishaji ikiwemo kushikwa maungo yao, hali ambayo huwafadhaisha baadhi yao. Alipotafutwa mkuu huyo wa shule kujibu tuhuma zinazomkabili amesema, "Siwezi kuzungumza chochote kwa sasa kwa maana tayari natuhumiwa, sipo kwenye nafasi nzuri ya kuzungumza labda mkuu wangu anaweza kuelezea jambo hilo."