MIILI ASKARI WALIOUAWA KWA RISASI YAAGWA

Mkuu wa Wilaya ya Mpwapwa, Sophia Kizigo ameongoza waombolezaji kuuaga miili ya askari wawili wa Jeshi la Polisi waliouawa kwa kupigwa risasi na mtuhumiwa wa unyang’anyi wa kutumia silaha, wakiwa kwenye oparesheni ya kumkamata. Kamishna wa Utawala na Rasilimali Watu wa Jeshi la Polisi, Tatu Jumbe aliyemwakilisha Mkuu wa Jeshi la Polisi nchini (IGP), Camillus Wambura amelaani mauaji ya polisi hao, akisisitiza umuhimu wa jamii kufichua wahalifu katika mitaa yao. Kwa upande wake, Kamanda wa Polisi Mkoa wa Dodoma, Kamishna Msaidizi Mwandamizi, George Katabazi amesema tukio hilo ingawa ni la kusikitisha, halitawavunja moyo katika jitihada za kupambana na uhalifu. Polisi wawili, Koplo Jairo Kalanda na Konstebo Alfred John waliuawa katika mapambano ya risasi Desemba 18, 2024 walipokwenda kumkamata mtuhumiwa Atanasio Malenda (30), nyumbani kwake katika Kijiji cha Msagali wilayani Mpwapwa.