RAIS MWINYI ASISITIZA MATUMIZI YA TEHAMA KATIKA MAHAKAMA KUHARAKISHA UTOAJI WA HAKI

Rais wa Zanzibar na Mwenyekiti wa Baraza la Mapinduzi, Mhe. Dkt. Hussein Ali Mwinyi, amesema matumizi ya Teknolojia ya Habari na Mawasiliano (Tehama) katika mfumo wa utendaji wa Mahakama ni eneo muhimu linalopaswa kupewa kipaumbele ili kuharakisha upatikanaji wa haki na kuongeza ufanisi wa utoaji wa huduma. Rais Dkt. Mwinyi ameyasema hayo leo, Juni 22, 2026, alipokutana na Jaji Mkuu wa Tanzania, Mhe. Jaji George Masaju, aliyefika Ikulu Zanzibar kwa ajili ya kujitambulisha. Amesema Mahakama ya Zanzibar ina fursa kubwa ya kujifunza kutokana na mafanikio yaliyopatikana katika Mahakama ya Tanzania katika matumizi ya Tehama, jambo litakalosaidia kuharakisha utoaji wa haki kwa wananchi na kupunguza gharama za kiutendaji. Aidha, Rais Dkt. Mwinyi ameusifu ushirikiano uliopo kati ya Mahakama ya Zanzibar na Mahakama Kuu ya Tanzania, akisisitiza umuhimu wa kuuendeleza ili kuongeza tija katika utekelezaji wa majukumu ya taasisi hizo. Ameeleza kuwa Serikali ya Mapinduzi ya Zanzibar imeendelea kuwekeza katika matumizi ya Tehama pamoja na kuboresha miundombinu ya Mahakama katika ngazi mbalimbali ili kuhakikisha wananchi wanapata haki kwa haraka, kwa urahisi na katika mazingira bora yaliyo karibu na maeneo wanayoishi. Akizungumzia maendeleo ya miundombinu ya Mahakama, Rais Dkt. Mwinyi amesema ujenzi wa Mahakama ya Rufaa Pemba utasaidia kuimarisha mazingira ya kazi kwa majaji na kuongeza ufanisi katika utoaji wa haki kwa wananchi wa Pemba. Kwa upande wake, Jaji Mkuu wa Tanzania, Mhe. George Masaju, ameipongeza Serikali ya Mapinduzi ya Zanzibar na Mahakama ya Zanzibar kwa ushirikiano wanaouonesha, huku akieleza kuwa uamuzi wa kuwa na Mahakama Kuu Pemba ni wa busara na wenye manufaa makubwa kwa wananchi. Ameahidi kusimamia kwa karibu utekelezaji wa mradi huo ili kuhakikisha wananchi wanapata huduma za mahakama kwa urahisi zaidi na kwa gharama nafuu. #Zanzibar #Mahakama #Tehama #HakiKwaWote #DktMwinyi #GeorgeMasaju #UtawalaBora #AsamOnlineTV #Tanzania