LUMBERSA YATAJWA KUWA CHANZO CHA WAKULIMA KUPUNJWA MAPATO

Waziri Mkuu, wa Jamhuri ya Muungano wa Tanzania, Mhe. Dkt. Mwigulu Nchemba amesema mfumo wa uuzaji wa mazao usiotumia vipimo rasmi maarufu kama “Lumbesa” umekuwa moja ya njia inayochangia kuwaibia wakulima na wazalishaji wa mazao Nchini. Kutokana na hali hiyo, Dkt. Nchemba amewataka Watanzania kuachana kabisa na utamaduni wa kuaminiana katika biashara za mazao na badala yake kutumia vipimo rasmi na mifumo inayotambulika kisheria ili kuhakikisha wanapata thamani halisi ya mazao yao. Akizungumza Mei 19, 2026 katika kilele cha maadhimisho ya miaka 20 ya Bodi ya Stakabadhi za Ghala yaliyofanyika jijini Dodoma,Waziri Mkuu alisema Serikali imejipanga kikamilifu kukomesha matumizi ya mfumo huo usio rasmi ambao umekuwa ukiwakosesha wakulima haki zao. Aidha, ameuagiza Wakala wa Vipimo Nchini (WMA), Wizara ya Viwanda na Biashara, Wizara ya Kilimo pamoja na Ofisi ya Waziri Mkuu-TAMISEMI kushirikiana kwa karibu kuhakikisha mfumo wa Lumbesa unatokomezwa Nchini. “Tanzania haina uhaba wa vifungashio,ina viwanda vya kutosha vya kuzalisha vifungashio vya kutoshekeza mahitaji ya soko la bidhaa Nchini". Katika hatua nyingine, Serikali imetangaza kuanzisha mfumo wa malipo ya awali kwa wakulima wanaouza mazao yao kupitia mfumo wa Stakabadhi za Ghala, hatua inayolenga kuondoa changamoto ya wakulima kucheleweshewa fedha baada ya kupeleka mazao yao maghalani. Dkt. Nchemba alisema uamuzi huo umefikiwa baada ya Serikali kufanya majadiliano na wadau mbalimbali wa sekta binafsi, zikiwemo taasisi za kifedha pamoja na Benki ya Ushirika, kwa lengo la kuhakikisha wakulima hawapati tena adha ya kukopwa mazao yao bila malipo ya haraka. Amesema maboresho hayo yataongeza imani ya wakulima katika mfumo wa Stakabadhi za Ghala, kuongeza tija kwenye biashara ya mazao na kuchochea ukuaji wa uchumi wa wananchi na Taifa kwa ujumla. #DodomaFahariyaWatanzania #KeroyakoWajibuWanguTabasamunaSamia #KazinaUtuTunasongaMbele