MIRADI MIKUBWA YA KIMKAKATI KUPITIWA NA MWENGE WA UHURU DODOMA

MIRADI MIKUBWA YA KIMKAKATI KUPITIWA NA MWENGE WA UHURU DODOMA Na Mwandishi Wetu, Dodoma RS Mkoa wa Dodoma umeupokea rasmi Mwenge wa Uhuru 2026 leo tarehe 31Mei 2026 katika Uwanja wa Shule ya Msingi Mtera, iliyopo Halmashauri ya Wilaya ya Mpwapwa, ukitokea Mkoa wa Iringa. Mwenge huo unatarajiwa kukimbizwa umbali wa kilomita 1,595.3 katika wilaya zote saba na Halmashauri nane za Mkoa huu, huku ukipita kuzindua, Kukagua,kuweka mawe ya msingi miradi ya maendeleo yenye thamani ya zaidi ya shilingi bilioni 23.2 Akizungumza wakati wa mapokezi ya Mwenge huo, Katibu Tawala wa Mkoa wa Dodoma, Dkt. Khatibu Kazungu, alisema Mkoa wa Dodoma umejipanga kuonyesha mafanikio makubwa ya utekelezaji wa miradi ya kimkakati inayotekelezwa kwa fedha zinazotolewa na Serikali ya Awamu ya Sita chini ya uongozi wa Rais wa Jamhuri ya Muungano wa Tanzania, Mhe. Dkt. Samia Suluhu Hassan. Dkt. Kazungu alisema miradi hiyo imeendelea kuufungua Mkoa wa Dodoma kiuchumi, kuimarisha utoaji wa huduma za kijamii na kuufanya kuwa kitovu muhimu cha uwekezaji na utalii Nchini. “Tunamshukuru na kumpongeza Mhe. Dkt. Samia Suluhu Hassan kwa kuendelea kuuletea Mkoa wa Dodoma fedha nyingi za maendeleo ambazo zimewezesha utekelezaji wa miradi mikubwa ya kimkakati yenye manufaa makubwa kwa Wananchi,” alisema Dkt. Kazungu. Aidha, alibainisha kuwa wananchi wa Mkoa wa Dodoma wameendelea kuenzi na kuzingatia ujumbe wa Mwenge wa Uhuru unaohimiza uzalendo, umoja, mshikamano na ushiriki wa Wananchi katika shughuli za maendeleo. Alisisitiza kuwa amani na umoja wa Kitaifa ni msingi muhimu wa maendeleo ya kiuchumi na kijamii, akieleza kuwa mazingira ya utulivu na mshikamano ndiyo yanayowezesha Taifa kuvutia uwekezaji na kufikia maendeleo endelevu. #DodomaFahariyaWatanzania #WekezaDodomaStawishaDodoma #KazinaUtuTunasongaMbele #MwengewaUhuru2026