النصوص الكتابية والعقائد

اولا: خطايا الأنبياء والقديسين في ضعفهم احنا لا نؤمن بعصمة الأنبياء ولا الرسل , ممكن يغلطوا ويتوبوا زينا عادي , انما احنا نؤمن بعصمة الوحي لانه من الروح القدس. ثانيا احنا نتعلم من القصص دي إننا نعيش في مخافة الله وان محدش كبير على الخطية ولو حد اخطأ لازم يلحق نفسه ويتوب. ثانيا: قصص فيها عبارات على لسان ناس مش أنبياء ولا قديسين في قصة تجربة أيوب لما جم اصحابه على اساس يقفوا معاه ويعزوه , فواحد من اصحابه اسمه صوفر النعماتي , الراجل الطيب دا جه يكحلها عماها , فقال لأيوب "أَمَّا الرَّجُلُ فَفَارِغٌ عَدِيمُ الْفَهْمِ، وَكَجَحْشِ الْفَرَا يُولَدُ الإِنْسَانُ" (أي12:11) وكلامه دا طبعا غلط ولا يمكن ان يعتبر تعليم او عقيدة , وكمان ضايق ايوب جدا وقال عنهم "مُعَزُّونَ مُتْعِبُونَ كُلُّكُمْ" (أي2:16) وغير كدة هل يليق ان حد يقول ان الانسان مابيفهمش زي الجحش!! بالطبع لأ , لأن الانسان ربنا كرمه وقال عنه "وَقَالَ اللهُ: نَعْمَلُ الإِنْسَانَ عَلَى صُورَتِنَا كَشَبَهِنَا" (تك26:1). ودا للرد على الحبايب اللي ماسكين كلمة صوفر النعماتي وعمالين يغنوا ويردوا على نفسهم ويقولوا الكتاب المقدس بيوصف الانسان بالحجش وينقلوها من بعض زي اللبانة وهم للاسف مش فاهمين حاجة!! ثالثا: كلام على لسان قديسين ولكن في خطيتهم او في جهلهم في موقف انكار بطرس للمسيح , مذكور كدة : "فَابْتَدَأَ يَلْعَنُ وَيَحْلِفُ: «إِنِّي لاَ أَعْرِفُ هذَا الرَّجُلَ الَّذِي تَقُولُونَ عَنْهُ! (مر71:14) , يعني بطرس الرسول العظيم قعد يشتم ويحلف انه مايعرفش المسيح!! آه كانت خطية كبيرة لكنة تاب عنها وبكى بكاء مر , لكن ليه ماناخدش الكلمة اللي بطرس قالها إِنِّي لاَ أَعْرِفُ هذَا الرَّجُلَ الَّذِي تَقُولُونَ عَنْهُ , ونبروزها ونذخرفها ونحفظها للعيال في مدارس الأحد؟؟ مش دي عبارة في الكتاب المقدس!! مش دي موحى بها من الروح القدس برضو ولا لأ؟؟ اكيد موحى بها , لكن بتحكي حاجة غلط عملها بطرس الرسول فماينفعش نطلع من النص دا بعقيدة او وصية , انما نتعلم فقط اننا مانعملش زي بطرس في ضعفه وننكر المسيح , لان المسيح قال "مَنْ يُنْكِرُني قُدَّامَ النَّاسِ أُنْكِرُهُ أَنَا أَيْضًا قُدَّامَ أَبِي الَّذِي فِي السَّمَاوَاتِ" (مت33:10). رابعا: رأي العامة أو رأي أشخاص غير مؤمنين ماينفعش أبدا نطلع بعقيدة أو تشريع من كلام العامة أو غير المؤمنين , مثال على كدة في انجيل متى مذكور كدة في دخول المسيح اورشليم : "فَقَالَتِ الْجُمُوعُ: هذَا يَسُوعُ النَّبِيُّ الَّذِي مِنْ نَاصِرَةِ الْجَلِيلِ" (مت11:21) فالجموع مش مؤمنين لسة انه هو المسيح انما سمعوا عن معجزاته فقالوا دا مجرد نبي!!. فهل ينفع ناخد العبارة دي على لسان العامة ونقول ان الرب يسوع مجرد نبي!! بالطبع لأ. خامسا: باقي القصة في امثال السيد المسيح الرب يسوع لما بيعلم بأمثال كان يحكي قصة تأملية وبعدها يقول المغزى أو الوصية من المثل , لكن باقي قصة المثل لا يمكن أبدا اننا نطلع منها بعقيدة أو تشريع. مثال على كدة مثل وكيل الظلم , المسيح عايز يعلمنا اننا نستخدم ما احنا وكلاء عليه في حياتنا دي ولا نمتلكه فعليا اللي هو المال في اننا نأمن حياتنا الأبدية بأننا نتعلم العطاء ومانكونش عبيد للمال , حلو كدة؟ بس في القصة وكيل الظلم اللي المسيح امتدحه فعليا سرق صاحب الوكالة اللي هو سيده وخسره كتير لما زور في صكوك المديونية!! فهل احنا نقدر نطلع بوصية او شريعة من باقي القصة؟ بالطبع لأ , والمسيح لم يمتدح السرقة , انما امتدح فقط حكمة التفكير , وكمان وصف وكيل الظلم بأبناء هذا الدهر انما احنا ابناء النور. سادسا: الأوامر الخاصة مثال تاني لطيف خالص , في العهد القديم كان ربنا بيصبر على الشعوب اللي بتخطئ ولو ماتابتش كان بيعاقب شعوب بشعوب , ففي وقت معين ربنا قرر ان شعب عماليق لازم يتباد تماما , فأمر شاول الملك انه يضرب شعب عماليق : فَالآنَ اذْهَبْ وَاضْرِبْ عَمَالِيقَ، وَحَرِّمُوا كُلَّ مَا لَهُ وَلاَ تَعْفُ عَنْهُمْ بَلِ اقْتُلْ رَجُلًا وَامْرَأَةً، طِفْلًا وَرَضِيعًا، بَقَرًا وَغَنَمًا، جَمَلًا وَحِمَارًا (1صم3:15) فتلاقي الحبايب بقى يقولولك ياااي شوفتو الكتاب المقدس بيؤمر بالقتل وكمان قتل النساء والأطفال , دا إيه العنف ضااا؟! طاب ماتيجو نشوف النص دا هل ممكن نطلع منه بعقيدة جهاد مثلا ولا لأ , الله هنا أمر شاول الملك عن طريق صموئيل النبي , هل انا وانت شاول الملك؟ طايب يلا بينا نروح نضرب عماليق!! هم فين عماليق اصلا؟! يعني لا فيه شاول ولا فيه عماليق!! يبقى النص دا او الامر دا أمر خاص لحدث معين لا يمكن ابداا اننا نطلع منه بعقيدة او تشريع. سابعا : أنصاف الآيات يعني احنا لما نعوذ نفهم عقيدة معينة , مثلا طبيعة المسيح , هل ينفع نجيب نص واحد او جزء من نص ونعتمد فقط عليه في فهم عقيدة مهمة وفيها تفاصيل كتير زي طبيعة المسيح؟! طبعا لا , وانصاف الآيات للاسف وقعت ناس كتير في هرطقات صعبة جدا , مثلا اريوس مسك جزء من نص قال فيه المسيح : لأن أبي أعظم مني , وقال بسسس المسيح ليس هو الله والكنيسة واجهته وواجهت أتباعة لحد انهاردة أي حد بينكر ألوهية المسيح ويجيب جزء من نص وعايز يعتمد عليه نقوله لا ياحبيبي , اقرأ الكتاب المقدس كللله وهات كل النصوص اللي بتشرح طبيعة المسيح , لما قال انا والاب واحد ومن راني فقد راى الاب , وقال قبل ان يكون ابراهيم انا كائن وغيرها نصوص كتييير وجمعها وافهم معناها وانت في النهاية توصل بنفسك للفهم الدقيق لعقيدة طبيعة المسيح. وقيس كل كدة كل الايمان المسيحي , لازم تقرأ كل النصوص اللي تخص الموضوع في الكتاب المقدس عشان تفهم كويس. المسيح بيحبك وبيدور عليك ... كن مستعد .. سلام