يعني اية المسيح ابن الله؟

أول حاجة (ولادة روحية) يعني مافيهاش زواج او جنس. ولادة تلقائية بالطبيعة من نفس جوهر الآب زي ولادة الفكر من العقل , يعني الآب ماتجوزش حد عشان ينجب الابن , ودا طبعا عكس كل العبادات الوثنية اللي فيها ثالوث ديما تلاقي الإله يتزوج إلهة او إنسانه ويعاشرها وينجب منها إله أو إنسان متأله!! تاني حاجة (ولادة مستمرة) زي ولادة شعاع النور من الشمس مستمرة على طول , وعشان كدة بنقول في قانون الايمان "مولود من الآب" مش الذي ولد من الآب!! لان الولادة مستمرة. تالت حاجة (بدون انفصال) لإن الابن لا ينفصل أبدا عن الآب , مثل ولادة الفكر من العقل , الفكر يولد من العقل ويخرج من العقل في صورة كلام او كتابة ومازال في نفس الوقت موجود في العقل لا يفارقه ابداا. والدليل من كلام الرب يسوع لما قال: "الآبَ الْحَالَّ فِيَّ" (يو10:14) وقال أيضا: "صَدِّقُونِي أَنِّي فِي الآبِ وَالآبَ فِيَّ" (يو11:14) وقال أيضا: "أنا والآب واحد" (يو30:10) فإزاي هيكون فيه انفصال!! مستحيل طبعا. رابع حاجة (بدون سابق ومسبوق) يعني الابن أزلي بأزلية الآب وماكانش فيه وقت ولا لحظة واحدة الآب موجود لوحده بعد كدة ولد الابن , والنص الكتابي واضح جدا في الحتة دي في سفر الأمثال يعني في العهد القديم بيتكلم عن ابن الله انه الحكمة وبيقول: "اَلرَّبُّ قَنَانِي أَوَّلَ طَرِيقِهِ، مِنْ قَبْلِ أَعْمَالِهِ، مُنْذُ الْقِدَمِ. مُنْذُ الأَزَلِ مُسِحْتُ، مُنْذُ الْبَدْءِ" (أم22:8-23) وقناني يعني ولدني وأول طريق الله هو الأزل مش محتاجة شرح يعني!