Колоректалды қатерлі ісік: алдын алу және ерте анықтау

Колоректалды қатерлі ісік — бұл тоқ ішек пен тік ішекті зақымдайтын ауру. Көбінесе ол полиптерден дамып, ұзақ уақыт бойы ешқандай белгілерсіз өтуі мүмкін. Аурудың кейінгі кезеңдерінде ішек жұмысының өзгеруі, нәжісте қанның пайда болуы, іштің ауыруы, жалпы әлсіздік сияқты белгілер байқалуы ықтимал. Ұлттық скрининг бағдарламасына сәйкес, 50 жастан бастап ерлер мен әйелдерге, шағымдары болмаса да, әр екі жыл сайын тексеруден өту ұсынылады. Скрининг нәжістегі жасырын қанды анықтауға арналған талдауды қамтиды, ал нәтиже оң болған жағдайда пациентке колоноскопиядан өту көрсетіледі. Колоректалды қатерлі ісікті емдеу аурудың сатысына, ісіктің орналасуына, қатар жүретін ауруларға байланысты және хирургиялық емдеуді, химиотерапия мен сәулелік терапияны қамтуы мүмкін. Ауру неғұрлым ерте анықталса, емнің тиімділігі соғұрлым жоғары болады. Ұлттық ғылыми онкология орталығында жыл сайын колоректалды қатерлі ісікке байланысты 150-ден астам ота жасалады. Әрбір клиникалық жағдай дәрігерлердің мультидисциплинарлық командасында талқыланып, науқастың өмірін сақтауға және ағзаны сақтайтын оталарға басымдық бере отырып, оңтайлы әрі жекелендірілген ем тактикасы таңдалады. Тұрақты скринингтен өту және салауатты өмір салтын ұстану — ауруды ерте анықтаудың және табысты емдеудің басты кепілі.