Romeo Skënderasi & Kostika Zdruli - Natën e mirë

Kënga "Natën e mirë" është një nga këngët e dashura korçare. Korçarët nuk kanë dëshirë ta këndojnë, sepse duan që kënga të mos, pushojë, por asnjë festë me këngë korçare nuk mbyllet pa kënduar këtë këngë. Ndoshta pas saj mund të kujtohen edhe disa të tjera, por përpara se "të prishet muhabeti" kjo këngë do të këndohet sërisht. Melodia është marrë nga një këngë serbe "Bolujem ja bolujes ti". Ritmi i saj është 3/4, ndërsa në Korçë këndohet ose apiacere, ose me ritëm, në të dy rastet ndihet koha 4/4. Tematikave tekstit që këndohet është komplet i ndryshëm. Ndër vite këtë këngë e kam dëgjuar në disa variante. Dy variante janë regjistruar edhe te Radio Korça. Kënga këndohet me të paktën tri strofa dhe refrenin. Kam përfshirë në tekst rreth gjashtë strofa. Këndohen edhe fjalë të tjera, por nuk kam dashur të marr të drejtën e bartësve, që i këndojnë këto fjalë pasi kanë përfunduar së kënduari të tjerët.