వెంకటగిరి రూరల్‌లో దారి వివాదం.. అధికారుల ముందే ₹80 వేల గడ్డివాము అగ్నికి ఆహుతి!

వెంకటగిరి రూరల్ పరిధిలో తీవ్ర ఉద్రిక్తత: రెవెన్యూ, పోలీసుల సమక్షంలోనే తగలబడ్డ పశుగ్రాసం.. రైతుల కన్నీరు! తిరుపతి జిల్లా వెంకటగిరి రూరల్ మండలం పరిధిలోని పట్రపల్లి గ్రామంలో ఇంటి దారి వివాదం తీవ్ర ఉద్రిక్తతకు దారితీసింది. అధికారుల సమక్షంలోనే సుమారు ₹80,000 విలువైన పశుగ్రాసం (గడ్డి వాము) అగ్నికి ఆహుతి కావడం స్థానికంగా తీవ్ర కలకలం రేపింది. ఏడాది పొడవునా మూగజీవాల కోసం దాచుకున్న ఆహారం కళ్లముందే బూడిదవడంతో బాధిత రైతులు కన్నీరుమున్నీరవుతున్నారు. గ్రామంలోని ఓ ఇంటి దారికి సంబంధించిన వివాదంపై ఉన్నతాధికారుల ఆదేశాలు, హైకోర్టు ఉత్తర్వుల మేరకు సమస్యను పరిష్కరించి, దారిని క్లియర్ చేయడానికి రెవెన్యూ మరియు పోలీస్ అధికారులు శనివారం పట్రపల్లి గ్రామానికి చేరుకున్నారు. అధికారులు రంగంలోకి దిగిన సమయంలోనే అక్కడ నిల్వ ఉంచిన పశుగ్రాసానికి ఒక్కసారిగా నిప్పు అంటుకుని, క్షణాల వ్యవధిలో పూర్తిగా బూడిదైపోయింది. ​ఈ ఘటనపై బాధితులు, స్థానికులు రెవెన్యూ, పోలీస్ అధికారుల తీరుపై తీవ్ర ఆగ్రహం వ్యక్తం చేస్తున్నారు. ఎటువంటి ముందస్తు అనుమతులు లేకుండా, నిబంధనలకు విరుద్ధంగా వ్యవసాయ భూమిలో అగ్రికల్చర్ ల్యాండ్ నిర్మించిన ఒక వ్యక్తి ఇంటికి, అధికారులు ఏకపక్షంగా దారి ఇప్పించే ప్రయత్నం చేస్తున్నారని ​14 ఏళ్ల తర్వాత అత్యుత్సాహం ఎందుకనీ సంబంధిత రైతుల ఆరోపిస్తున్నారు. 2012లో నిర్మించిన ఇంటికి ఇన్నేళ్లు లేని తొందర ఇప్పుడు అధికారులకు ఎందుకు వచ్చిందని గ్రామస్థులు ప్రశ్నిస్తున్నారు. ముందస్తు ప్రణాళిక లేకుండా, ఉన్నపళంగా దారి ఇప్పించాలనే అత్యుత్సాహమే ఈ ప్రమాదానికి కారణమని వాపోతున్నారు. గ్రామంలో ఇలాంటి వివాదాలు తలెత్తినప్పుడు ఇరువర్గాలను పిలిచి, కూర్చోబెట్టి సామరస్యంగా పరిష్కరించాల్సిన బాధ్యత అధికారులపై ఉంది. కానీ, ఆ దిశగా ప్రయత్నించకుండా అధికారులు ఏకపక్షంగా వ్యవహరించి గ్రామంలో చిచ్చు పెట్టారని స్థానికులు ఆవేదన వ్యక్తం చేస్తున్నారు. ఏది ఏమైనప్పటికీ "నోరు లేని మూగజీవాల కోసం ఎంతో కష్టపడి దాచుకున్న రూ.80,000 విలువైన గడ్డి కళ్లముందే తగలబడిపోతుంటే అధికారులు చూస్తూ ఉండిపోయారు. తమ నష్టానికి ఎవరు బాధ్యత వహిస్తారు?" అని బాధిత రైతులు ప్రశ్నిస్తున్నారు. ఈ ప్రమాదానికి అసలు కారణం ఎవరు? గడ్డి వాముకి నిప్పు ఎలా అంటుకుంది? అనే కోణంలో విచారణ జరపాలని, తమకు న్యాయం చేసి, నష్టపరిహారం అందించాలని బాధిత రైతులు డిమాండ్ చేస్తున్నారు.