RAIS DKT. MWINYI AWAKARIBISHA WAWEKEZAJI WA NCHI ZA KIARABU KUWEKEZA ZANZIBAR

Rais wa Zanzibar na Mwenyekiti wa Baraza la Mapinduzi, Dkt. Hussein Ali Mwinyi, amewakaribisha wawekezaji na wafanyabiashara kutoka nchi za Kiarabu kuwekeza Zanzibar, akibainisha kuwa Zanzibar ina mazingira bora na fursa nyingi za uwekezaji katika sekta mbalimbali za maendeleo. Dkt. Mwinyi ameyasema hayo Ikulu Zanzibar alipokutana na Mabalozi wa nchi za Kiarabu wanaoziwakilisha nchi zao nchini Tanzania, waliofika kwa ajili ya kumsalimia pamoja na kumpongeza kwa hatua kubwa ya maendeleo inayofikiwa na Zanzibar hivi sasa. Amesema Zanzibar inaendelea kuimarisha mazingira ya biashara na uwekezaji kupitia maboresho ya miundombinu, sera rafiki za uwekezaji pamoja na kuimarika kwa huduma mbalimbali zinazowawezesha wawekezaji kufanya shughuli zao kwa ufanisi. Aidha, amezipongeza nchi hizo za Kiarabu kwa kuendelea kuimarisha uhusiano wake na Tanzania, ikiwemo Zanzibar, pamoja na mchango wao katika kusaidia utekelezaji wa miradi mbalimbali ya maendeleo. Kwa niaba ya Mabalozi hao, Balozi wa Saudi Arabia nchini Tanzania, Mhe. Yahya Ahmed Okesh, amempongeza Rais Dkt. Mwinyi kwa uongozi wake ulioleta maendeleo makubwa katika uchumi wa Zanzibar, miundombinu na ustawi wa wananchi. #Zanzibar #Uwekezaji #DktHusseinMwinyi #NchiZaKiarabu #Maendeleo #ASAMOnlineTV