MAKONDA AFUNGUA MILANGO YA BONGO MOVIES ULAYA

UFARANSA: WAZIRI wa Habari, Utamaduni, Sanaa na Michezo, Paul Makonda, amewataka wasanii wa tasnia ya filamu nchini (Bongo Movie), wakiwemo waigizaji, waandishi wa miswada ya filamu 'scripts', waongozaji, waandaaji na wasambazaji wa filamu, kujiandaa kutumia fursa mpya zitakazowawezesha kuingia katika soko la kimataifa, hususan nchini Ufaransa na mataifa mengine ya Ulaya. Makonda ametoa wito huo katika Ubalozi wa Tanzania nchini Ufaransa baada ya kufanya mazungumzo na uongozi wa waandaaji wa Cannes International Film Festival, yakilenga kujenga ushirikiano wa kuikuza tasnia ya filamu ya Tanzania na kuiwezesha Bongo Movie kushiriki kikamilifu katika soko la filamu duniani. Akizungumza baada ya mazungumzo hayo, Makonda alisema Serikali inalenga kufungua fursa kwa wadau wote wa tasnia ya filamu kuanzia waandishi wa miswada, waigizaji, waongozaji, waandaaji hadi wasambazaji ili kazi zao zipate nafasi katika masoko makubwa ya kimataifa. “Tumekuwa na mazungumzo mazuri sana. Lengo letu ni kuona tasnia nzima ya filamu inanufaika kwa kuwapa fursa waandishi wa scripts, waigizaji, waandaaji na wasambazaji wa filamu kuingia katika soko la dunia. Bongo Movie ni tasnia inayowagusa na kuwaingizia kipato maelfu ya Watanzania,” amesema Makonda. Aliongeza kuwa mafanikio yaliyowekwa na mastaa wa filamu nchini, akiwemo marehemu Steven Kanumba, Ray Kigosi, Irene Uwoya, Kajala Masanja, Aunt Ezekiel, Steve Nyerere pamoja na wengine wengi, yameitangaza Tanzania ndani ya Afrika na sasa wakati umefika wa kuitangaza zaidi katika soko la dunia.