TBA YAWEKA MKAKATI WA MAKAZI BORA KWA WOTE IFIKAPO 2050

DAR ES SALAAM: WAKALA wa Majengo Tanzania (TBA) imesema imejizatiti kuhakikisha ifikapo mwaka 2050 kila Mtanzania anaishi kwenye makazi bora kupitia utekelezaji wa miradi mikubwa ya nyumba na ushirikiano na sekta binafsi. TBA imesema mkakati huo unalenga kujenga uchumi jumuishi kwa kuvutia wawekezaji wa sekta binafsi kushiriki katika maendeleo ya makazi na miundombinu, hatua inayotarajiwa kuongeza upatikanaji wa nyumba zenye viwango bora kwa wananchi. Imeeleza kuwa tayari limetenga maeneo 149 ya uwekezaji nchini, huku awamu ya kwanza ya utekelezaji ikianza na maeneo 38 ya uendelezaji yaliyopo katika mikoa 20. Kwa mujibu wa TBA, utekelezaji wa mpango huo utachochea ukuaji wa sekta ya ujenzi, kuongeza ajira, kuvutia uwekezaji na kuchangia maendeleo endelevu ya miji na makazi nchini, sambamba na kuhakikisha Watanzania wengi zaidi wanapata makazi salama na yenye hadhi.