"Dita e hapur për publikun" në batalionin e Forcave Speciale

Në prag të festave të fundvitit, në batalionin e Forcave Speciale në Zall-Herr u zhvillua sot një aktivitet i veçantë dhe mbresëlënës i titulluar "Dita e hapur për publikun". Të pranishëm ishin: ministrja e Mbrojtjes, znj. Mimi Kodheli, shefi i Shtabit të Përgjithshëm i Forcave të Armatosura, gjeneralmajor Jeronim Bazo, gjeneralë, drejtorë drejtorish dhe ushtarakë nga Ministria e Mbrojtjes dhe Shtabi i Përgjithshëm i FA, si dhe mjaft të ftuar të tjerë. Në këtë aktivitet ishin ftuar dhe morën pjesë nxënësit e shkollës 9-vjeçare "Mustafa Kemal Ataturk" në Zall-Herr. Ministrja e Mbrojtjes, znj. Mimi Kodheli dhe shefi i Shtabit të Përgjithshëm të FA, gjeneralmajor Jeronim Bazo zhvilluan një bashkëbisedim të ngrohtë me fëmijët dhe nxënësit e pranishëm. Në fjalën e saj, ministrja Kodheli pasi ka falënderuar fëmijët për pjesëmarrjen u shpreh: "Sot është një ditë e veçantë për ju. E di që bëni shumë ekskursione, por shumëkush prej jush nuk ka ardhur në një njësi ushtarake për të parë nga afër se çfarë bën pjesa më e mirë e Forcave të Armatosura Shqiptare në ruajtjen tuaj, të familjeve tuaja dhe atdheut". Shumë prej nesh këtu, ka vijuar më tej znj. Kodheli, kur kanë qenë në moshën tuaj kanë pasur një tjetër perceptim për ushtrinë. Që në moshën 14 vjeç ne na jepej një pushkë druri në krahë dhe mundoheshim të silleshim si ushtarë të vegjël. Sot kjo nuk është e nevojshme, sepse sot vendi, jeta juaj, e ardhmja juaj mbrohet nga ushtarë profesionistë, ushtarakë të përgatitur, të cilët janë vetëm në funksion të së sotmes dhe të ardhmes tuaj sa më të sigurtë. Duke iu drejtuar edhe njëherë fëmijëve, ministrja Kodheli theksoi: "Unë shpresoj që të kaloni një ditë të mirë, të keni se çfarë të tregoni kur të ktheheni pranë familjeve dhe prindërve tuaj. Uroj që kur të rriteni edhe pak, të vijë një ditë që shumëkush prej jush të ketë dëshirën të jetë pjesë e Forcave të Armatosura, të jetë pjesë e një karriere, e cila mund t'ju mundësojë një të ardhme më të mirë, duke qenë pjesë e këtyre forcave. Këtë mund ta mbërrini vetëm duke mësuar, studiuar dhe duke u përpjekur të jeni fëmijë të mirë për prindërit tuaj, për veten tuaj, shokët dhe shoqet tuaja dhe në këtë mënyrë të bëheni pjesa më e mirë e shoqërisë shqiptare në ditët dhe vitet që do të vijnë", - ka përfunduar fjalën e saj ministrja Kodheli. Fëmijët e pranishëm i përshëndeti edhe shefi i Shtabit të Përgjithshëm i FA, gjeneralmajor Jeronim Bazo. Në fund të këtij aktiviteti fëmijët dhe të pranishmit e tjerë ndoqën nga afër një kompleks demonstrimesh ushtarake, të cilat u realizuan me mjaft përkushtim dhe profesionalizëm nga trupat e batalionit të Forcave Speciale.