မန္တလေးမြို့ ရွှေဆိုင်ပိုင်ရှင်ရဲ့အိမ်က ရွှေ ၁၀ ပိဿာနဲ့ ငွေကျပ်သိန်း ၁၀၀၀ ဓားပြတိုက်သူတွေ ဖမ်းမိ၊

မန္တလေးမြို့၊ ချမ်းမြသာစည်မြို့နယ်၊ မြို့သစ်(၁)ရပ်ကွက်၊ ၁၀၁ လမ်းနဲ့ ၇၁ လမ်း၊ ဗိုလ်ချုပ်ရွာထဲနေ ချောင်ချောင် ရွှေဆိုင်ပိုင်ရှင်ရဲ့ နေအိမ်ကို စီးနင်းဝင်ရောက် ဓားပြတိုက်ကာ ရွှေ ၁၀ပိဿာကျော်နဲ့ ငွေကျပ်သိန်းထောင်ချီ ဓားပြတိုက်သူတွေကို ဖမ်းမိပြီလို့ စစ်အုပ်စုက သတင်းဖြန့်ပါတယ်။ စက်တင်ဘာလ ၁၀ရက် မနက် ၈နာရီဝန်းကျင်အချိန် မန္တလေးမြို့၊ ဗိုလ်ချုပ်ရွာထဲနေ ချောင်ချောင် ရွှေဆိုင်ပိုင်ရှင်ရဲ့ နေအိမ်ကို AD Van ဗင်ကားခဲရောင်နဲ့ လူခုနှစ်ဦးခန့် ရောက်လာပြီး သေနတ်နဲ့ချိန်ကာ ရွှေနဲ့ငွေတွေ လုယက် ဓားပြတိုက်သွားတာ ဖြစ်ပြီး စက်တင်ဘာလ ၁၄ရက် ညပိုင်းမှာ ဓားပြတွေကို မန္တလေးမြို့ပေါ်မှာပဲ ဖမ်းမိတာလို့ စစ်အုပ်စုက ဆိုပါတယ်။ ဓားပြတိုက်သူတွေဟာ ကျပ်သိန်းသောင်းချီ တန်ဘိုးရှိတဲ့ ရွှေနဲ့ ငွေတွေကို ဓားပြတိုက် လုယက်ပြီးနောက် မန္တလေးမြို့ပေါ်မှာပဲ ဆက်လက် နေထိုင်ချိန် ဖမ်းမိတာလို့ စစ်အုပ်စုရဲ့ သတင်းထုတ်ပြန်ချက်မှာ ဖော်ပြပါတယ်။ အဲ့ဒီ ဓားပြမှုနဲ့ ပတ်သက်ပြီး ကျူးလွန်သူတွေထဲ စစ်အုပ်စု လက်နက်ကိုင်တွေ ဖြစ်တဲ့ စစ်သား၊ ရဲနဲ့ ပျူစောထီး တွေ ပူးပေါင်းပါဝင်တာ ရှိ၊မရှိ မသိရသေးသလို မန္တလေးမြို့ပေါ်က တခြားသော ရွှေဆိုင် ဓားပြတိုက်မှုတွေနဲ့ ဆက်စပ်မှု ရှိ၊မရှိကိုလည်း စစ်အုပ်စု အသေးစိတ် မထုတ်ပြန်သေးပါဘူး။ #Mandalay_Free_Press_MFP