ယနေ့ ( ၅ - ၇ - ၂၀၂၆ ) အတွက် မိုးလေဝသခန့်မှန်းချက်များ

မိုးလေဝသခန့်မှန်းမော်ဒယ်တွေမှာတွေ့ရှိချက်အရ တောင်တရုတ်ပင်လယ်မှာဖြစ်ပေါ်နေတဲ့ တိုင်ဖွန်းမုန်တိုင်း မေဆတ် MAYSAK ဟာ ဗီယက်နမ်မြောက်ပိုင်း နဲ့ တရုတ်နိုင်ငံ တောင်ပိုင်း ကမ်းခြေကနေ ကုန်းတွင်းကို ဝင်ရောက်နေပြီဖြစ်သလို ဘင်္ဂလားပင်လယ်အော် အနောက်မြောက်ပိုင်က အားကောင်းတဲ့ လေဖိအားနည်းရပ်ဝန်းကလည်း အိန္ဒိယနိုင်ငံ၊ သြရိဿပြည်နယ် (Odisha) ဘူဘန်နီဆွာမြို့ (Bhubaneswar) အနီးကနေ ကုန်းတွင်းပိုင်းကို ဒီနေ့မှာပဲ ဝင်ရောက်နေပြီဖြစ်ပါတယ်။ အားကောင်းတဲ့ လေဖိအားနည်းရပ်ဝန်းရဲ့ အရှိန်ကြောင့် မြန်မာ့ကမ်းရိုးတန်းတစ်လျှောက် မိုးတိမ်တိုက်တွေ အားကောင်းစွာ ဖြစ်ထွန်းနေသလို လေဖိအားနည်းရပ်ဝန်းနဲ့ တိုင်ဖွန်းမုန်တိုင်း မေဆက် တို့ရဲ့ ရာသီဥတုစနစ်နှစ်ခုကြား မုတ်သုံမြောင်တန်း တစ်ခု သွယ်တန်းနေပါတယ်။ ထိုင်းမိုးလေဝသဌာနရဲ့ မြေပုံအရ မုတ်သုံမြောင်တန်းဟာ ချင်းပြည် စစ်ကိုင်းတိုင်းအောက်ပိုင်း မန္တလေးတိုင်းနဲ့ ရှမ်းပြည်တို့ကို ဖြတ်သန်းသွားပြီး လာအိုနဲ့ ဗီယက်နမ်မြောက်ပိုင်းကတဆင့် တိုင်ဖွန်းမုန်တိုင်းဆီသွယ်တန်းနေတာဖြစ်ပါတယ်။ ဒီအခြေအနေကြောင့် ရခိုင်ပြည်မြောက်ပိုင်း ချင်းပြည် မကွေးတိုင်းအထက်ပိုင်း စစ်ကိုင်းတိုင်းအောက်ပိုင်း မန္တလေးနဲ့ ရှမ်းပြည်တို့မှာ မိုးသည်းထန်စွာရွာသွန်းနိုင်ခြေမြင့်မားနေပါတယ်။ အထူးသဖြင့် ဇူလိုင် ၅ ရက်အထိ မြန်မာနိုင်ငံအောက်ပိုင်း ကမ်းရိုးတန်းဒေသတွေနဲ့ မြစ်ဝကျွန်းပေါ်ဒေသတွေမှာ လေပြင်းတိုက်ခတ်တာနဲ့အတူ မိုးတိမ်တိုက်ကြီးတွေ စဉ်ဆက်မပြတ် ဝင်ရောက်နေမှာဖြစ်ပါတယ်။ လက်ရှိ မြန်မာနိုင်ငံအပေါ်မှာ မုတ်သုံလေအားကောင်းနေခြင်းအပြင် မုတ်သုံမြောင်တန်း မိနေတာကြောင့် လာမယ့် ၇ ရက်အတွင်း ကချင်ပြည် ချင်းပြည် ရခိုင်ပြည်နဲ့ အနောက်ဘက်ကမ်းရိုးတန်းတွေအပြင် ရှမ်းပြည် ကရင်ပြည် မွန်ပြည်နဲ့ တနင်္သာရီတိုင်းတို့မှာ မိုးအဆက်မပြတ်ရွာသွန်းနိုင်တာကြောင့် မြေပြိုခြင်း တောင်ကျချောင်းရေ ပြင်းထန်စွာကျဆင်းခြင်းနဲ့ မြစ်ချောင်းများ ရေကြီးရေလျှံခြင်းများ ဖြစ်ပေါ်နိုင်ပါတယ်။ ဧရာဝတီမြစ်ဝကျွန်းပေါ်ဒေသတွေနဲ့ ရန်ကုန် ပဲခူး စတဲ့ ဒေသတွေမှာလည်း မိုးများရာကနေ မိုးအလွန်များနိုင်တာကြောင့် အနိမ်ပိုင်းလမ်းများ ချိုင့်ဝှမ်းရပ်ကွက်တွေမှာ ရေဝပ်ခြင်းတွေ ကြုံတွေ့ရနိုင်ပါတယ်။ ဒါကြောင့် သဘာဝဘေးအန္တရာယ်တွေကို ကြိုတင်သတိပြု ပြင်ဆင်ကြဖို့နဲ့ စိုက်ပျိုးရေးလုပ်ငန်းခွင်များနဲ့  သဘာဝဘေးစီမံခန့်ခွဲမှုကဏ္ဍများမှာလည်း ကြိုတင်ကာကွယ်မှုများ စနစ်တကျ ပြုလုပ်ထားသင့်ပါတယ်။ ဒီနေ့မှာတော့ ရခိုင်ပြည်နဲ့ ချင်းပြည်တို့မှာ နေရာအနှံ့အပြား မိုးအသင့်အတင့်ကနေ မိုးများနိုင်မှာဖြစ်ပြီး ဧရာဝတီတိုင်း ရန်ကုန်တိုင်း ပဲခူးတိုင်း မွန်ပြည် ကရင်ပြည်မြောက်ပိုင်းနဲ့ နေပြည်တော်တို့မှာ နေရာအနှံ့အပြား မိုးအနည်းငယ်ရွာသွန်းနိုင်ကာ နေရာကွက် မိုးသည်းထန်နိုင်ပါတယ်။ တနင်္သာရီတိုင်း စစ်ကိုင်းတိုင်းအထက်ပိုင်း ကချင်ပြည် ရှမ်းပြည်မြောက်ပိုင်းနဲ့ အရှေ့ပိုင်းတို့မှာ နေရာစိပ်စိပ်ကနေ နေရာကြဲကြဲ မိုးအနည်းငယ်ရွာသွန်းနိုင်ပြီး ကျန်ပြည်နယ်နဲ့ တိုင်းတွေမှာတော့ နေရာကွက်ကျား မိုးအနည်းငယ်ထစ်ချုန်းရွာသွန်းနိုင်ပါတယ်။ နောက်နှစ်ရက်အတွင်းမှာတော့ ရခိုင်ပြည်တစ်ခုလုံးမှာ မိုးပိုလာနိုင်ကာ မိုးအလွန်များနိုင်မှာဖြစ်ပြီး ရန်ကုန်တိုင်း ပဲခူးတိုင်းတောင်ပိုင်း မွန်ပြည်နဲ့ ကရင်ပြည်တို့မှာလည်း မိုးအသင့်အတင့်ကနေ မိုးများနိုင်မှာဖြစ်ပါတယ်။ မြစ်ရေအခြေအနေမှာတော့ ဧရာဝတီမြစ်ရေဟာ မြစ်ကြောင်းတလျောက် ၅ စင်တီမီတာ ကနေ ၁၀ စင်တီမီတာ ၁ လက်မ ၂ လက်မ ဝန်းကျင်ခန့်သာ မြင့်တက်နိုင်ပါတယ်။ ချင်းတွင်း မြစ်ကြောင်းတလျောက်မှာလည်း မြစ်အထက်ပိုင်း မော်လိုက်မြို့အထိ အနည်းငယ်ကျနိုင်ပြီး ကျန်မြစ်ကြောင်းတလျောက် အနည်းငယ်မြင့်တက်နိုင်ပါတယ်။ ဒုဋ္ဌဝတီမြစ်၊ မြစ်သာမြစ်၊ ရွှေကျင်မြစ်၊ ပဲခူးမြစ်၊ သံလွင်မြစ်၊ သောင်ရင်းမြစ်၊ ငဝန်မြစ်၊ တိုးမြစ်၊ ဘီးလင်းမြစ် တို့ကတော့ အနည်းငယ်စီမြင့်တက်နိုင်မှာဖြစ်ပြီး စစ်တောင်းမြစ်၊ နန့်ယင်းမြစ်နဲ့ နန့်ကောင်းမြစ်တို့မှာတော့ အနည်းငယ် အတက်အကျသာရှိနိုင်မှာဖြစ်ပါတယ်။ PSM News ကို မေးမြန်းထားတဲ့ မိုးလေဝသအခြေအနေတွေကို လာမယ့် ဇူလိုင်လ ၇ ရက်နေ့အထိတင်ပြရမယ်ဆိုရင် မန္တလေးတိုင်းက ကူမဲမြို့နယ်အတွင်းမှာ နေရာကွက်ကျား မိုးအနည်းမျှသာ ရွာသွန်းနိုင်ပြီး ရွာရန်ရာနှုန်း ၄၀ ခန့်ရှိပါတယ်။ တံတာဦးမှာတော့ မိုးရွာနိုင်ခြေနည်းနေပေမဲ့ နေရာကွက်ကျား မိုးအနည်းတော့ ရွာသွန်းနိုင်ပါတယ်။ မိတ္ထီလာနဲ့ သာစည်မြို့နယ်တွေမှာတော့ မိုးအနည်းငယ်ရွာသွန်းနိုင်ပြီး မွန်းလွဲ ညနေပိုင်းတွေမှာ မိုးတိမ်တောင်တွေကြောင့် မိုးအသင့်အတင့်ရွာသွန်းနိုင်ပါတယ်။ ဒိုက်ဦးမြို့နယ်အတွက် တစ်ပတ်စာ အခြေအနေမှာ ဒီတစ်ပတ်အတွင်း မိုးအနည်းငယ်ကနေ မိုးအသင့်အတင့် နေ့စဉ်ရွာသွန်းနိုင်ပြီး နေရာကွက် မိုးသည်းထန်နိုင်ပါတယ်။ မကွေးတိုင်းက ဆိပ်ဖြူမြို့နယ်အတွင်းမှာတော့ မိုးရွာနိုင်ခြေအလွန်နည်းပါးနေပြီး မိုးရွာပါကလည်း မိုးပါးပါးမျှသာကျနိုင်ကာ နေ့အပူချိန် ၃၃ ဒီဂရီဝန်းကျင်ခန့် မြင့်တက်နိုင်မှာ ဖြစ်ပါတယ်ရှင်။ ပင်လယ်ပြင်အခြေအနေမှာတော့ မြန်မာကမ်းရိုးတန်းတလျောက်နဲ့ ကမ်းလွန်ပင်လယ်ပြင်တို့မှာ မကြာခဏ မိုးသက်လေပြင်းများတိုက်ခတ်နိုင်ပြီး တစ်နာရီ ၃၅ မိုင် ကနေ မိုင် ၄၀ အထိ လေပြင်းများတိုက်ခတ်နိုင်ပါတယ်။ လှိုင်းအမြင့်မှာလည်း မြန်မာကမ်းရိုးတန်းတလျောက်နဲ့ ကမ်းလွန်ပင်လယ်ပြင်တို့မှာ လှိုင်းအမြင့် ၁၁ ပေကနေ ၁၄ အထိ ရှိနိုင်ပြီး လှိုင်းအလွန်ကြီးနိုင်တာကြောင့် ပင်လယ်ပြင်အတွင်း လှိုင်းကြီး လေထန်အန္တရာယ်မြင့်မားနေပါတယ်။ ဒါ့ကြောင့် ပင်လယ်ပြင်အတွင်း သွားလာနေကြတဲ့ ကမ်းနီးကမ်းဝေးရေလုပ်သားတွေနဲ့ ပင်လယ်ပြင်အတွင်း သွားလာကြသူတွေအနေနဲ့ ပင်လယ်ပြင်ကို မထွက်ကြဖို့ အထူးသတိပေးတိုက်တွန်းလိုက်ရပါတယ်ရှင်။ PSM ရဲ့ ပရိတ်သတ်များရှင် မိုးလေဝဖြစ်စဉ်တွေဟာ များသောအားဖြင့် ၇၀ ရာခိုင်နှုန်းခန့်သာ မှန်နိုင်ပြီး အချိန်နဲ့အမျှ ပြောင်းလဲနိုင်ပါတယ်။  #psm_weather #psm_myanmar #psm_news