ယနေ့ ( ၁၀ - ၇ - ၂၀၂၆ ) အတွက် မိုးလေဝသခန့်မှန်းချက်များ

ဩစတြေးလျ မိုးလေဝသဗျူရို (BOM) ရဲ့ ထုတ်ပြန်ထားတဲ့ မြေပုံအရ မိုးတိမ်ဖြစ်ထွန်းမှုကို အဓိကအားပေးတဲ့ ကမ္ဘာလုံးဆိုင်ရာ အပူပိုင်းလေထုလှုပ်ရှားမှုလှိုင်း MJO လှိုင်းဟာ ပစိဖိတ်သမုဒ္ဒရာ အနောက်ဘက်ခြမ်းဖြစ်တဲ့ Phase 7 အပိုင်းမှာ ရှိနေပြီး ဇူလိုင်လကုန်ပိုင်းအထိ ဆက်လက်အားကောင်းနေမှာ ဖြစ်ပါတယ်။  MJO လှိုင်းအားကောင်းနေမှုနဲ့အတူ မိုးတိမ်ဖြစ်ထွန်းမှုကို လှုံ့ဆော်ပေးတဲ့ (OLR) တန်ဖိုးတွေအရ  လာမယ့် ဇူလိုင်လလယ်ပိုင်းအထိ မြန်မာနိုင်ငံတစ်ဝှမ်းလုံးမှာ မိုးရွာသွန်းမှုတွေ ဆက်လက်အားကောင်းနေဦးမှာဖြစ်ပြီး၊ ဇူလိုင်လ ၁၇ ရက်နေ့နောက်ပိုင်းကျမှသာ မိုးအား အနည်းငယ် ပြန်လည်လျော့ပါးသွားနိုင်မယ့် အလားအလာ ရှိနေပါတယ်။ လက်ရှိ ပစိဖိတ်သမုဒ္ဒရာ ဖိလစ်ပိုင်ပင်လယ်ပြင်အတွင်း ဖြစ်ပေါ်နေတဲ့ တိုင်ဖွန်းမုန်တိုင်းကြီး “ဗာဗီ” (BAVI) ကလည်း ဗဟိုချက်လေဖိအား ၉၃၀ ဟက်တိုပါစကယ် (930 hPa) အထိ ကျဆင်းနေပြီး အနောက်-အနောက်မြောက်ဘက်သို့ တစ်နာရီလျှင် ၁၀ နော့ (၁၈ ကီလိုမီတာခန့်) နှုန်းဖြင့် ရွေ့လျားနေပြီး၊ လာမယ့် ဇူလိုင်လ ၁၀ ရက်နဲ့ ၁၁ ရက်ဝန်းကျင်တို့တွင် ထိုင်ဝမ်ကျွန်း အရှေ့မြောက်ဘက်ကနေ တရုတ်နိုင်ငံတောင်ပိုင်းဆီကို ဖြတ်ကျော်ဝင်ရောက်သွားနိုင်သွားနိုင်မှာဖြစ်ပါတယ်။ ဗီယက်နမ်နိုင်ငံ မြောက်ပိုင်းမှာ ကုန်းတွင်းလေဖိအားနည်းဆဲလ်တစ်ခု တည်ရှိနေတာကို ထိုင်းမိုလေဝသဌာနရဲ့ မြေပုံမှာ တွေ့ရှိရပြီး လေဖိအားနည်းဆဲလ်နဲ့ တိုင်ဖွန်းမုန်တိုင်း ဗာဗီတို့ရဲ့ ပေါင်းစပ်ဆွဲအားကြောင့်  အနောက်တောင်မုတ်သုံလေဟာ ဆက်လက်အားကောင်းနေဆဲဖြစ်ပါတယ်။ တိုင်ဖွန်းမုန်တိုင်း ကုန်တွင်းဝင်ရောက်ပြီး အားလျော့ပျက်သွားချိန်မှာ အနောက်တော်မုတ်သုံလေ အားလျော့သွားမှာဖြစ်ပေမဲ့ လာမယ့် လာမယ့် ဇူလိုင်လ ၁၃ ရက် ၁၄ ရက်နေ့ဝန်းကျင်မှာ ဘင်္ဂလားပင်လယ်အော်မြောက်ပိုင်းမှာ လေဖိအားနည်းဆဲလ်တစ်ခု ဖြစ်ပေါ်လာမှာကို ရက်ဝေးခန့်မှန်းချက်အတွေမှာ တွေ့ရပါတယ်။ ဒါကြောင့် အနောက်တောင်မုတ်သုံလေဟာ ဘင်္ဂလားပင်လယ်အော် အလယ်ပိုင်းနဲ့ မြောက်ပိုင်းတွေမှာ ခတ္တမျှအားလျော့သွားနိုင်ပေမဲ့ ကျန်ဘင်္ဂလားပင်လယ်အော်နဲ့ ကပ္ပလီပင်လယ်ပြင်တို့မှာ အားကောင်းကောင်းနဲ့ စီးဝင်နေဦးမှာ ဖြစ်ပါတယ်။ ဒါ့ကြောင့် ရှေ့လာမယ့်ရက်ပိုင်းအတွင်း ရခိုင်ပြည်၊ ချင်းပြည် အပါအဝင် မြစ်ဝကျွန်းပေါ်ဒေသများနဲ့ မွန်ပြည်၊ တနင်္သာရီတိုင်းတို့မှာ မိုးရွာသွန်းမှုများ အရှိန်ကောင်းကောင်းဖြင့် ဆက်လက်တည်ရှိနေဦးမှာ ဖြစ်ပါတယ်။  မြန်မာနိုင်ငံအလယ်ပိုင်း ဒေသတွေမှာတော့ ဒီရက်ပိုင်းအတွင်း မုတ်သုံလေနဲ့အတူ စီးဝင်လာတဲ့ အစိုဓာတ်တွေဟာ ရခိုင်ရိုးမကို ဖြတ်ကျော်နိုင်ခြင်းမရှိဘဲ ရခိုင်ပြည်အတွင်းမှာသာ မိုးသည်းထန်စွာ ရွာသွန်းခဲ့တာကြောင့် မိုးနည်းနေဦးမှာ ဖြစ်ပါတယ်။ ဒီနေ့မှာတော့ ရခိုင်ပြည် ချင်းပြည်တောင်ပိုင်း စစ်ကိုင်းတိုင်းက  နာဂဒေသတွေနဲ့ ကချင်ပြည်မြောက်ပိုင်းအပြင် မန္တလေးတိုင်း တောင်ပိုင်း နေပြည်တော်နဲ့ ပဲခူးတိုင်းအရှေ့ခြမ်းတို့မှာ နေရာအနှံ့အပြား မိုးအသင့်အတင့်ကနေ မိုးများနိုင်မှာဖြစ်ပါတယ်။ နောက်နှစ်ရက်အတွင်းမှာတော့ ရခိုင်ပြည်အပါအဝင် မြန်မာနိုင်ငံ အောက်ပိုင်းနဲ့ တောင်ပိုင်းဒေသတွေမှာ မိုးပိုလာဖို့ ရှိနေပြီး စစ်ကိုင်းတိုင်း ကချင်ပြည်နဲ့ ရှမ်းပြည်တို့မှာလည်း မိုးရွာသွန်းမှုတွေ ကျယ်ပြန့်လာနိုင်မှာ ဖြစ်ပါတယ်။ PSM News ကို မေးမြန်းထားတဲ့မိုးလေဝသအခြေအနေကို ပြောရမယ်ဆိုရင် စစ်ကိုင်းတိုင်းက ကလေးမြို့နယ်မှာတော့ လာမယ့် ဇူလိုင်လ ၁၃ ရက်နေ့အတွင်း မိုးအနည်းငယ်ကနေ မိုးအသင့်အတင့် ရွာသွန်းနိုင်ကာ နေရာကွက်ပြီး မိုးများနိုင်မှာ ဖြစ်ပါတယ်။ မကွေးတိုင်းက စလင်းမြို့နယ်အတွင်းမှာတော့ မိုးရွာနိုင်ခြေ မရှိသလောက်နည်းနေပေမဲ့ မနက်ဖြန်မှာတော့ နေရာကွက်ကျား မိုးပါးပါးမျှသာ ကျနိုင်ပါတယ်။ သာစည်နဲ့ ပျော်ဘွယ် မှာတော့ ဇူလိုင်လ ၁၂ ရက်နေ့အတွင်း နေရာကွက်ကျား မိုးအနည်းရွာနိုင်ပြီး တံတာဦးမှာတော့ ဒီနေ့နဲ့ မနက်ဖြန်မှာသာ နေရာကွက်ကျား မိုးအနည်းငယ်မျှ ရွာသွန်းနိုင်ပေမဲ့ မိုးရွာသွန်းမှုနည်းနေဦးမှာဖြစ်ပါတယ်။ ပဲခူးတိုင်းက လက်ပံတန်းမှာတော့ ဒီနေ့မှာ မိုးရွာဖို့ မရှိသလောက်နည်းနေပေမဲ့ နောက်ရက်တွေမှာတော့ နေရာကွက်ကျား မိုးအနည်းငယ်ရွာသွန်းနိုင်ပါတယ်။ ကမ္ဘာလုံးဆိုင်ရာ ရေကြီးမှုသတိပေးစနစ် (GloFAS) ရဲ့ မြစ်ရေကြီးမှုခန့်မှန်းချက်မြေပုံအရ နေပြည်တော် တပ်ကုန်းမြို့နယ်နဲ့ ဝန်းကျင်တစ်ဝိုက်မှာ စိုးရိမ်ရလောက်တဲ့ ရေကြီးရေလျှံမှုအန္တရာယ်ရှိနိုင်တာကြောင့် အထူးသတိထားဖို့ လိုအပ်ပါတယ်။  စစ်တောင်မြစ်ဝှမ်းအထက်ပိုင်းဒေသတွေဖြစ်တဲ့ နေပြည်တော်၊ တပ်ကုန်း၊ ပျဉ်းမနားနှင့် လယ်ဝေးဒေသတစ်ခုလုံးရဲ့ မြစ်ချောင်းကွန်ရက်များပေါ်မှာ ၅ နှစ်တာကာလအတွင်း ဖြစ်ပွားလေ့ရှိတဲ့ ရေကြီးနိုင်ခြေ ၇၆ ရာခိုင်နှုန်းရှိနေပြီး ဇူလိုင်လ ၂၂ ရက် ၂၃ ရက်ဝန်းကျင်မှာ ရေဘေးအန္တရာယ်အမြင့်ဆုံး အခြေအနေကို ရောက်ရှိနိုင်တာကိုတွေ့ရတာကြောင့် ကြိုတင်ပြင်ဆင်မှုတွေ ပြုလုပ်ဖို့နဲ့ ပြင်ဆင်ထားသင့်တာတွေ ပြင်ဆင်ထားကြဖို့ တိုက်တွန်းလိုပါတယ်ရှင်။ မြန်မာ့ပင်လယ်ပြင်အခြေအနေမှာတော့ မြန်မာကမ်းရိုးတန်းတလျောက်နဲ့ ကမ်းလွန်ပင်လယ်ပြင်တို့မှာ မိုးသက်လေပြင်းများတိုက်ခတ်နိုင်ပြီး တစ်နာရီ မိုင် ၃၀ အထိလေပြင်းများတိုက်ခတ်နိုင်ကာ လှိုင်းကြီးနိုင်ပါတယ်။ လှိုင်းအမြင့် ၉ ပေကနေ ၁၂ ပေခန့်ရှိနိုင်တာကြောင့် ပင်လယ်ပြင်အတွင်း လှိုင်းကြီးလေထန် အန္တရာယ်ရှိနိုင်တာကြောင့် ကမ်းနီးကမ်းဝေးရေလုပ်သားတွေနဲ့ ပင်လယ်ပြင်ခရီး သွားလာကြသူတွေအနေနဲ့ အတတ်နိုင်ဆုံး ပင်လယ်ပြင်အတွင်းသွားလာခြင်းမပြုကြဖို့ အထူးသတိပေး တိုက်တွန်းလိုက်ရပါတယ်ရှင်။ PSM ရဲ့ ပရိတ်သတ်များရှင် မိုးလေဝဖြစ်စဉ်တွေဟာ များသောအားဖြင့် ၇၀ ရာခိုင်နှုန်းခန့်သာ မှန်နိုင်ပြီး အချိန်နဲ့အမျှ ပြောင်းလဲနိုင်ပါတယ်။  #psm weather #psm myanmar #psm news